“Byaseng Hwngzyen” youh heuhguh “songgaiq”, itcig ndaej vunz Hwngzyen naeuz dwg “byaekyienh”, de daiqbiuj gij suijbingz ceiq sang dinfwngz loenghbyaek caeuq vwnzva gwnndoet、ceiq sang gvigek daihhek Hwngzyen. Youq Namzningz, caiqlij daengx ranghdieg Lingjnamz, gij vunz sug Hwngzyen haenx cungj dawz byaseng caeuq Hwngzyen cuengq doxcaemh, naeuz Hwngzyen dwg byaseng、byaseng dwg Hwngz- yen. Byaseng Hwngzyen baenz le ranghdieg Saenamz cungj gijgwn daegbied ndeu, Namzningz Si cib daih gijgwn feihgwn daeuzmingz, Guengjsae cib daih gijgwn feihgwn ndawde cungj ndeu. Bi 2013, “byaseng Hwngzyen” ndaej lied haeuj Namzningz Si buek daihngeih feihvuzciz vwnzva yizcanj baujhoh mingzloeg.

Byaseng Hwngzyen bonjlaiz dwg ciuhgeq gyoengq canghdwkbya gwnz Dahyi’gyangh Hwngzyen haenx cungj banhfap fouznaih wngqdoiq saedceij ndeu. Mbouj miz youz gyu ciengq meiq, cijndei gwn ndip. Mbouj liuh daengz, cungj “gwnfap” daiq miz gij siengsim lairaeuh neix, ginggvaq seizgan dongjcung, cug- ciemh bienqbaenz le cungj byaek mizmingz cienzdoengj seizneix gyawjgyae okmingz ndeu. Ciuq gaisau, youq 500 bi gaxgonq, byaseng gaenq baenz Hwngzyen “byaek daenz daiz” noix mbouj ndaej lo.

Dahyi’gyangh dwg Hwngzyen ngaraemx youqgaenj ndeu, raemxdah sawrwenx、lae ndaej git, gij bya ndaw dah noh laengrieng gengget、 byotbet, ndawde byacingcuk suenq dwg ceiq ndei. Byaseng Hwngzyen baenzneix okmingz、feihgwn, caeuq gij guhfap dinfwngz daegbied、senj liuh boiq liuh cingsaeq de miz gvanhaeh maedciet, couh dwg senj aeu byacingcuk、 byava’gveiq、 byavanx daengj doengh cungj bya noh saed nyangqnyet byotbet、saeknoh hausek ronghsaw youq ndaw Dahyi’gyangh maj, gaiq nohbya yaek aeu ronq ndaej mbang lumj fwed duzbid nei, caiq boiq coeng hing gyaeujsuenq、lwgmanh youz gyu ciengq meiq、makcengz、mbahozceu daengj boiq- liuh caeuq naednoh moeggva、youz- duhdoem daengj dwzcanj Hwngzyen gungh ngeihcib lai cungj boiqliuh, bouh ceiq youqgaenj de dwg ronq nohbya, caxraeh ronq mbat nduj mbouj ronq gat, mbanj cax daihngeih cij ronq gat, hawj song gaiq nohbya lienz baenz gaiq ndeu, baez mbe nohbya couh lumj duzmbaj nei. Loengh byaseng seiz, saehfouh gaemcax sien aeu saencax bek duzbya ngunh bae, mbon hwk gvet gyaep, ciepdwk daet donh rieng le venj hwnjdaeuj cuengq lwed seuq, hawj nohbya baujciz singjsien, yienzhaeuh cigciep aeu caxraeh hehdae aeu nohbya roengzdaeuj, aeu ceijsa suek dwk sup raemxlwed hawq le cij ronq ndei cang deb, baij baenz gak cungj gak yiengh doenghduz doenghgo ndei yawj, hawj bouxhek engq haengjgyaez.

Mwh gwn byaseng, sien nip gaiq nohbya ndeu cuengq ndaw vanjliuh gyaux miz youzduh ciengqyouz caeuq meiq daengj haenx cimq yaep ndeu le, caiq nip hwnj cuengq roengz aen vanj iq wnq bae, nip di byaeksei mbawsijsu、yiengzcoeng、lauxbaeg、duhdoem ceuj daengj gienj hwnj- daeuj le oet haeuj ndaw bak, menhmenh nyaij gwn, caenh rox- nyinh feihdauh singjsien sangjbak, miz cungj ganjgyoz feihgwn gangj mbouj ok bak ndeu hawj mwngz yiengjsouh dangqmaz.