Youq gwnz diegnywj gvangqlangh, miz aen rienghyiengz ndeu, ndawde ciengx miz duzyiengz baenz cien baenz fanh, duzduz youh biz youh cangq.

Miz ngoenz he, banringzgvaq sawqmwh miz duz manaez yak he laeglemx ndonj haeuj riengh yiengz bae. Haep ndaej gyoengq duzyiengz cungj swenj “me me” caemhcaiq luenh buet hwnjdaeuj. Duz manaez neix cingq naemj coemj duz yiengz lawz daeuj gwn ceiq feih.

Sawqmwh miz duz yiengzlwg ndeu sikhaek coh manaez daemj gvaqbae. Duz yiengzlwg neix caen geizheih! Duz manaez neix baez raen duzyiengz mbouj lau de, gangjnaeuz lijdwg duz yiengzlwg dem. Duz manaez neix lwgda daengx hung saeqsim cim duz yiengzlwg neix, raen duz yiengzlwg neix caeuq yiengz wnq mbouj miz maz mbouj doxdoengz caemhcaiq youh biz youh oiq, baenzneix de fwd cung gvaqbae ajbak couh yaek haeb hoz duz yiengzlwg neix. Byawz rox, “au” sing heuh ndeu, duz manaez yak neix rouxringx youq laj namh doq dai bae lo.

Yenzlaiz neix dwg duz yiengz gihgi ndeu, caeuq yiengz caen doxlumj caez, dwg bouxcawj riengh- yiengz cawx dauq cienmonz doiqfouq manaez, danghnaeuz miz manaez cung hwnjbae haeb de couh deng den dai.