Yienznaeuz ndawsim doiq ngoenzcog coux rim saenqsim caeuq maqmuengh, hoeng saedceij lij dwg gvaq ndaej baenzneix gunnanz, Huz Ging caeuq Sung Naz songde youq ndaw lumhlax hag rox vih Siujmungz daenj buh、dajcaemx caeuq cawj gijgwn bwnq de gwn……

Siujmungz okseng seiz ndangdaej miz di nyieg, ciengz mbouj dwg fatndat couhdwg baenz ae. Moix baez Siuj- mungz baenzneix seiz, Huz Ging doq aemq Siujmungz, caeuq Sung Naz itloh lumhlax bae yihyen ceiq gyawj. Gyoengqde ceiq lau gij bingh Siuj- mungz mbouj ndaej gibseiz bae yihyen hawj cangyw yw, Siujmungz dwg diuz saeu aen ranz neix, danghnaeuz de miz maz loeklak, gyoengqde hix mbouj rox baenzlawz lix roengzbae lo.

Hawj canghyw yawj bingh le, ciepdwk bwnq yw hawj Siujmungz dwg aen vwndiz. Canghyw hai yw seiz, songde gouz canghyw lai sai rengz sij fapgwn youq rog habyw, canghyw baez gangj cungj yw seizlawz gwn caemhcaiq gwn geijlai, songde couh bae lumh gij yiengh habyw、gij saw canghyw sij, sijsaeq fanfuk lumhlax haujlai baez, nyinhcaen geiq youq ndawsim, baenzneix hawj Siujmungz bwnq yw seiz couh mbouj yungzheih loek lo.

Saedceij ngoenz doek ngoenz gvaqbae, Siujmungz youq aen ranz daegbied neix menhmenh majhung lo. Cungj naeuz lwgnyez bouxgungz danggya caeux, Siujmungz ngamq ndaej 2 bi seiz, moix baez vunz daengx ranz okdou, Siujmungz cungj youq cungqgyang, yien fwngz bohmeh vih gyoengqde daiqloh, guh gij “lwgda” bohmeh.

Ciuhvunz youq aen seiqgyaiq laepngaungau neix, Huz Ging caeuq Sung Naz ndawsim roxnyinh geijlai doeknaiq, Siujmungz couhdwg aen daeng rongh baihnaj gyoengqde, dwg aen maqmuengh gyaeundei ngoenzcog gyoengqde, daeglwg neix hawj song gvanbaz vuenyungz caeuq saenqsim.

Siujmungz ngoenz beij ngoenz majhung, Huz Ging caeuq Sung Naz menhmenh soeng le gaemz heiq ndeu, gyoengqde aeu gij cienz geij bi neix dajgoeng ndaej hai aen diemq dafangz anmoz ndeu. Cungj gangj fanh saeh hainduj nanz, hai diemq geij ngoenz lo, mbouj miz geijlai vunz daeuj, aen diemq neix cengqgengz hai ndaej buenq bi lai, dauqdaej hawj mbouj hwnj ngaenzco, doeklaeng cijndei haep dou lo.

Hai diemq neix loem hawj Huz Ging bienq ndaej yied daeuj yied simnyap, mboujdan mbouj gyaez gangj vah, caemhcaiq lij ciengzciengz nyaenx mbouj ndaej doiq song mehlwg fat beizheiq. Rox swhgeij mbouj deng, doeklaeng Huz Ging sikhaek youh coh song mehlwg nyinhloek.

Raen bouxgvan baenzneix, Sung Naz gig sim’in, de mbouj miz saek coenz vah’ienq, lij lumj gaxgonq nei saeqsim goq song bohlwg gwndaenj. Huz Ging luenh fat beizheiq, Sung Naz hix mbouj caeuq de doxceng maz, saedceij couh baenzneix gvaq le buenq bi.

Miz ngoenz ndeu, Huz Ging dingqnyi aen yienh laenzgaenh miz haujlai boux dafangz guh anmoz byaij gai ndonj gyok daengz ndaw ranz fuzvu. De naemj le youh naemj, de hix siengj baenzneix guh, Sung Naz rox gij siengjfap de doq ngaekgyaeuj haenh ndei.

Baenzneix Huz Ging youh angq- fwngfwng daj goek hainduj lo, baez- neix de cungjsuenq byaij ok gij yingjyangj baezgonq hai diemq loem, ndawsim youh coux rim maqmuengh caeuq saenqsim.

Haetromh Huz Ging gaem aen lingzngauz he doq ngauz doq heuh gai doek gai menh byaij, naetnaiq le couh youq henz gai roxnaeuz youq laj raemhfaex yietnaiq, saek yaep youh laebdaeb coh naj byaij bae.

Vihliux lai guh di seng’eiq, Huz Ging ngoenzngoenz daengz gyang- hwnz 12 diemj cung yienghneix cij maranz, mboujlwnh doek fwn roxnaeuz ok rumz, daegbied baez naemj daengz song mehlwg, de caiq baeg hix roxnyinh swhgeij youh mizrengz guh lo.

Dingjlingz daegnuengx Sung Naz caeuq nuengxbawx hix youq yienh- singz guh di seng’eiq iq, ndigah ndaw ranz mbouj miz maz saeh seiz, Sung Naz couh heuh gyoengqde bang yawj Siujmungz, swhgeij hix riengz Huz Ging caez okbae byaij gai haeuj ranz guh anmoz.

Yienznaeuz baenzneix guh gig dwgrengz, gij ngaenz ndaej hix ngamq gaeuq daengx ranz sam boux vunz gwndaenj. Hoeng, song gvanbaz lij dwg guh ndaej bi lai. Hoeng, baenzneix bae anmoz deng ndit dak ngaiz fwn rwed, doeklaeng Huz Ging coh cwngfuj ciq ndaej 5000 maenz gihginh cauhnieb, youh siengj hai aen diemq anmoz moq. Huz Ging lau hai diemq youh deng loem, Sung Naz gujli de, hawj de cuengqsim mbeilaux bae guh.

Huz Ging caeuq Sung Naz ngoenzngoenz simhoengz ciep coux bouxhek, nyinhcaen saeqsim hawj bouxhek anmoz, gizgiz cungj guh ndaej hawj bouxhek rim hoz rim eiq, bouxhek boux cienz boux, gyoengqde yied daeuj yied lai, seng’eiq yied guh yied hoenghhwd hwnjdaeuj.

Menhmenh rom ndaej ngaenz le, gyoengqde youq yienhsingz cawx ranz, daengx ranz sam boux ndawsim hailangh, saedceij ngoenz beij ngoenz ndei.

Souj go gou youq hainduj dwen daengzlaeng baenzneix ciengq:

Mwngz dwg lwgda gou, daiq gou bae yawj seiqgeiq doxvuenh.

Mwngz dwg lwgda gou, daiq gou ndonj gvaq vunzlangh ndaetfwd.

Mwngz dwg lwgda gou, daiq gou yawj gij saw youq ndaw sawhaij gvangqlangh.

Mwngz dwg lwgda gou, hawj gou yawjraen aen seiqgyaiq neix couh youq baihnaj……

Danghnaeuz souj go neix hainduj dwg ciengq hawj Huz Ging caeuq Sung Naz dingq, baenzneix doeklaeng couhdwg song gvanbaz neix ciengq hawj daeglwg Siujmungz dingq lo.

Vunz lix youq gwnzbiengz, gij saeh mbouj swnhsim cib gienh miz bet gouj gienh. Hoeng, cijaeu ndawsim coux rim saenqsim caeuq maqmuengh, roengzrengz bae guh hong, ndwen- ngoenz mbouj rox gvaq mbouj roengzbae.（sat）