Ndwen 2 ngoenz 23(ndwencieng cobet), Lungzlinz Gak Cuz Swciyen Aen Yozvei Bouxcuengh youq yienh- singz minzcuz vwnzva dijyuz gvangj- cangz banh bi 2018 ndwencieng betyaem Bouxcuengh naenghciengq baij yienj, miz 17 aen doihbetyaem daj gak yanghcin caeuq yienhsingz daeuj haenx camgya yienjok, yinx ndaej baenz fanh boux vunz bae yawj.

Betyaem ciengq swz neiyungz fungfouq, haujlai dwg daj swz fwen daezlienh okdaeuj. Baez daengz haeuj ranzmoq、baenzgya、hohsouh daengj seiz angqyangz, vunzlai Bouxcuengh Lungzlinz cungj maij cingj ban betyaem daeuj guh’angq. Seizneix aen yienh neix haujlai mbanj Bouxcuengh riuzhengz fuengzcug guh aen doih- betyaem he, miz mbangj daengx ranz seiq daih caez camgya yienj, boq rag danz ciengq yienghyiengh guh, nauh- yied dangqmaz. Betyaem naengh- ciengq dwg cungj gizyi hingzsik beksingq Bouxcuengh Lungzlinz gyaezmaij he, youq aen yienh neix gaenq riuz miz sam bak lai bi lizsij.

Ndwencieng geizgan, banh cungj hozdung neix, mboujdan fungfouq gij vwnzva saedceij vunzlai, youh gyalai gij heiq hom ngoenzciet, ndaej daengz gyoengq vunzlai haenh.

(Dauz Dwzgvangh/陶德光)