Youq Bahbez Yangh Denzyangz Yen diegyouq ndaw runghbya, miz boux gungcanjdangjyenz bingzciengz ndeu, ca mbouj geijlai moix ngoenz cungj yungh Vahbujdungh、Vah- cuengh doiq lajmbanj gvangjbo. De caengz aeu saek faen cienzhong ndaw aen camhgvangjbo gvaq, hoeng cix 29 bi lumj ngoenz dog nei, cap rag youq diegbya rinhung, dingj youq gvangjbo itsienq gihcwngz, doenggvaq boqyaem aeu gak hangh cwngcwz doiq nungz- yez 、vunzguhnaz、lajmbanj ndei, gak cungj nungzyez gisuz miz yungh aendangj cienzboq hawj vunzlai, daiq ndeicawq gig hung daeuj hawj vunzlai, ndaej gyoengq beixnuengx lajmbanj haenh baenz “sing’yaem ndei Mbanj- cuengh”.

Caeuq boqyaem giet yienzfaenh, gag guh fwen cienz ndawmbanj

“Moix ngoenz cungj dingq gvenq lo, gvangjbo moix ngoenz cungj cinjseiz yawhbauq dienheiq, ngoenz- haw hix boq haujlai neiyungz miz yungh.” “Gaej yawj aen ranzgvangjbo neix mbouj yienhda, hoeng yunghcawq cix gig hung bw! Dou daengx bi daj gyaeuj daengz byai cungj liz mbouj hai de.” Gangj daengz aen camhgvangjbo, vunzmbanj Bahbez Yangh cungj miz haujlai vah ndaej gangj.

Neix dwg gij bingzgyaq gyoengq vunzmbanj doiq Suh Vwnzfungh, hoeng youq raeblaeng neix, Suh Vwnzfungh mbouj rox miz geijlai haemh mbouj ndaej ninz lo.

Bi 1988, boux cancangj gaeuq aen camhgvangjbo Bahbez Yangh aenvih ngaiz diuh bae gizwnq, gij hong bouxboqyaem camhseiz mbouj miz vunz lawh, Suh Vwnzfungh ndaej 24 bi maij gvangjbo、sing’yaem ndei dingq, couh gagnyienh bae lawh lo.

Daj mwhhaenx hwnj, Suh Vwnz- fungh couh bienqbaenz boux guhhong dandog ndaw aen camhgvangjbo ndaw yangh lo. Aen ranzgvangjbo ndawde miz aen gozyinhgi ndeu、aen yinhgung ndeu、aen vahdoengz ndeu、aen daengqfaex ndeu、aen daiz ndeu, daj seizhaenx hwnj couh bienqbaenz diegcindi cujyau Suh Vwnzfungh dingjyouq lo.

Youq aen nienzdaih giepnoix bauqceij、densi、vangjloz, gvangjbo dwg gij fuengfap youqgaenj vunzlai ndawbya aeundaej cihsiz、liujgaij saenqsik seiqgyaiq baihrog.

Suh Vwnzfungh youq bi 1964 okseng, seng roengzdaeuj couh sing- yaem ndei dingq, youq mwh doeg cunghyoz lauxsae couh senj bae dang bouxboqyaem bi ndeu. Bi 1988, Suh Vwnzfungh camgya guhhong le baez daih’it caeuq gvangjbo doxrox, daengz aen camhgvangjbo ndaw yangh bang cancangj guhhong, caemhcaiq youq seiz aeuyungh mbeihung “rongh” ok gij sing’yaem ndei bonjfaenh.

Bahbez Yangh laeb yangh dox- daeuj couh cauhlaeb miz gvangjbo miz sienq. Youq aen camhgvangjbo guh- hong duenh seizgan ndeu le, Suh Vwnzfungh roxnyinh daengz guh ndei bouxboqyaem lajmbanj ndeu mbouj ngaih, “Cujyau dwg bonjfaenh mbouj rox yungh Vahcuengh、Vahgun dox fanhoiz geijlai, boq okdaeuj hix mbouj doengswnh.” Suh Vwnzfungh naeuz.

“Vunzlai maij eu fwen, dangh- naeuz mwngz yungh fwen daeuj gvangjbo, vunzlai couh engqgya maij dingq lo, aeu gak cungj saenqsik guh baenz fwen gvangjbo okbae, gij yaugoj senhconz hix couh engqgya ndei lo!” Mbangj vunzlai dangdieg ok genyi hawj Suh Vwnzfungh.

Ndaej daezsingj le, Suh Vwnz- fungh cawz caeuq cancangj miz gingniemh gvangjbo lai nem gij doengzsaeh Vahbujdungh gangj ndaej haemq ndei camson le, lij ciengzseiz roengz mbanj bae caeuq gyoengq vunzlai sugrox guh fwen、eu fwen haenx hag.

Goengfou mbouj vi boux miz sim. Byongh bi le, Suh Vwnzfungh hag rox guh fwen lo. Mbouj yungh daengz 10 faen cung, de couh aeu gij neiyungz cwngcwz aendangj guh baenz gij fwen swnh bak ndei dingq ndaej lo, caemhcaiq yungh gij hingzsik fwen eu okdaeuj, hawj doengzsaeh loeghaeuj ndaw dennauj bae, ngoenzhaw couh boq okdaeuj hawj gyoengqvunz bae haw dingq, hawj gyoengqde engqgya yungzheih ciepsouh, geiq ndaej neiyungz.

Yawjraen gij gingniemh saed- hengz bonjfaenh ndaej haengjdingh caeuq doigvangq, gij saenqsim Suh Vwnzfungh vih vunzlai fugsaeh couh engq doh lo. Gaengawq gij daegdiemj vunzlai dangdieg maij fwen, de hainduj sawq aeu gij neiyungz gvangjbo guh baenz fwen.“Bingh hung bingh iq cungj bangbouj, roekcib doxhwnj cungj ciengxlaux” coenz fwen neix dwg senhconz gij ndeicawq nungzbaujmoq caeuq nungzhozmoq;“Bungzdaengz doek fwn’gyoet, hen- hoh ndei cwzvaiz” coenz fwen neix dwg daezsingj vunzlai haeujsim re nit re caihaih…… Suh Vwnzfungh aeu gij bauqlwnh doxgven guh baenz fwen daeuj gvangjbo, gig ndaej vunzlai angqcoux caeuq gyaezmaij.

Cauhmoq boqyaem, “gvangjbo riuzdoengh” cienz doh aenmbanj

Bahbez Yangh diegyouq ndaw runghbya baihnamz Denzyangz Yen, lengq aen mbanj aenvih doekgungx lai, caengz doeng gvangjbo miz sienq; lengq aen mbanj yienznaeuz doeng lo, hoeng aenvih yungh nanz le, aen lahbah singsep hung vaih lo, caengz ndaej gibseiz cawx aen moq. Nanz le, lengq aen mbanj couh mbouj guh gvangjbo lo, cij miz gij gvangjbo ngoenzhaw ndaw yangh youq Suh Vwnzfungh genhciz lajde louz roengz- daeuj. Vihliux hawj gyoengq vunzlai moix aen mbanj Bahbez Yangh cungj ndaej dingq gvangjbo, Suh Vwnzfungh siengj daengz aen banhfap moq ndeu, couhdwg byaijok aen ranzgvangjbo, aeu mbangj saenqsik dinj loeghaeuj ndaw vahdoengz fwngzriuj bae, aeu bae daengz mbanj caengz doeng gvangjbo boq, vunzlai heuh cungj hingzsik gvangjbo neix baenz “gvangjbo riuzdoengh”.

“Mwh bae baez daih’it, ngamq haibak hemq geij coenz, haujlai vunz youq ranz cungj buet okdaeuj humxyawj, lengq vunz lij laihnaeuz dwg canghgaihuq daeuj gai ywnou.” Suh Vwnzfungh naeuz, de cadawz gij seizheiq vunzlai cungj daeuj humx- yawj, gyagaenj senhconz gij cihsiz re feiz, aeundaej yaugoj gig ndei.

“Bi gyau bak maenz nungz- baujmoq, lienz gyau cib bi ndaej ciengxlaux. Bouxwnq cungj gyau mwngz mbouj gyau, daengz seiz bouxwnq lingx cienz mwngz goih yawj.” Neix dwg gij damzraih senh- conz nungzhozmoq Suh Vwnzfungh gag guh. Seizneix, gij neiyungz “aen camhgvangjbo riuzdoengh” gaenq gya’gvangq daengz gij cwngcwz daj- veh ciengxseng、 gimqdoeg、 re bingh aiswh、seuqcingh lajmbanj daengj lai aen fuengmienh.

“Baihgwnz miz gijmaz cwngcwz ndei, ndaw yangh miz gijmaz saeh ngamq fatseng, gou cungj aeu daih’it seizgan lwnh hawj gyoengq beix- nuengx lajmbanj rox.” Suh Vwnzfungh naeuz, bouxsoengqsaenq baez daengz, de couh daiqhwnj cekbitgeiq buet coh yangh cwngfuj, baez youq couhdwg geij diemj cung. Daj gij saehhung guekgya daengz gij saehmoq gwnzbiengz, daj gij cwngcwz fuengcim dangj daengz gij fuengfap moq baenz miz, de cungj cingjleix cau roengzdaeuj liuxliux, liuxle guh baenz gij gauj gvangjbo. Couhlienz baeznaengz haeuj mbanj, de hix mbouj lumz daiqhwnj ceij bit, aeu gij vwndiz gyoengq beixnuengx lajmbanj haeujsim haenx geiq roengz- daeuj, leihyungh seiz yietnaiq dinjdet cazra swhliu, doenggvaq gvangjbo vih gyoengqde gaijgez vwndiz. Seizneix, gij gauj boqyaem Suh Vwnzfungh gaenq daeb baenz haujlai bog nanwt, gij bauqceij daet aeu haenx hix rom ndaej geij sieng lo.

Mbanjlungjduh Lungjvaiz Cunh dwg aen mbanj liz Bahbez Yangh ceiq gyae, aen mbanjhojndoq cij miz 7 ranz vunz neix ciengzgeiz doxdaeuj gyau- doeng mbouj fuengbienh, saenqsik mbouj doeng. Suh Vwnzfungh daiq- hwnj aen camhgvangjbo riuzdoengh de daeuj gizneix, gaenxmaenx senhconz gangjlwnh gij cwngcwz caeuq nungz- baujmoq nem nungzhozmoq doxgven haenx hawj vunz ndaw mbanj rox, daj mbouj lijgaij daengz ciepsouh caiq daengz doxcanj canhbauj, seizneix, vunzmbanj cungj yiengjsouh daengz gij ndeicawq cwngcwz lo.

Gij saehnieb daxboh daeglwg swnj, gvangjbo ndaw runghbya miz vunz ciep

Suh Cinlingj bineix ndaej 24 bi, mwh doeg siujyoz, de couh riengz “aen camhgvangjbo riuzdoengh” Suh Vwnzfungh daxboh roengz mbanj haeuj ranz lo. Hwnj daihhag le, moix baez cuengqgyaj ma ranz, Suh Cinlingj cungj maij gag bae bang daxboh cingjleix gaujgen, lij caeuq de naengh cimohdoz roengz mbanj bae boq, bang daxboh guh neix guh haenx. Caeuq daxboh doxcaez boq gvangjbo seizgan nanz le, Suh Cinlingj couh menhmenh roxyiuj daxboh lo.

“Gou yawj de doiq hong gig genhciz、gig miz naihsim、gig miz cwzyinganj、gig miz sijmingganj, ndawsim gamjdoengh dangqmaz.” Bi 2012 seizcou, Suh Cinlingj gaenq daihhag bizyez、youq aen veiswnghyen Dalwngz Yangh Yougyangh Gih Bak- saek Si guh canghyw, mbouj hawj daxboh daxmeh rox, caegcaeg bauq- gauj aen gangjvei swyez danhvei Giswngh Fuzvusoj Bahbez Yangh, swnhleih doenggvaq bitgauj、dangnaj gaujsi、genjcaz ndangdaej, seiz de lwnh aen siusik neix hawj daxboh nyi, caemhcaiq gangjok gij siengjfap de siengj ciep ban daxboh, Suh Vwnzfungh dan dwg damhdamh baez riu, dap naeuz:“Gou gaenq rox lo, gij saehcingz mwngz gietdingh guh haenx gou caengz guenj gvaq, hoeng mwngz aeu siengj ndei, guh gij hong gou neix daengx ciuhvunz aeu gwnhoj naih- haemz, souh ndaej hojndoq gadog. Suh Cinlingj giendingh naeuz, dang boux bouxboqyaem ndeu, dwg aen loqsiengj yo youq ndawsim gou ndeu, gou itdingh aeu hawj de bienqbaenz caen.”

Mehyah Suh Vwnzfungh hix aeueiq gij gietdingh daeglwg, “Gou dwg maqmuengh de (Suh Cinlingj) ndaej mbin ok runghbya bae, youq rog lai roemx di ndeu. Dauqma goj ndei, ceiqnoix mbouj yungh youq sam dieg nda rek cawj haeux lo.”

Suh Cinlingj dauqma daengz mbanjranz caeuq daxboh bienqbaenz doengzsaeh, cingqsik caeuq daxboh hag boqyaem, fatyaem、raiz gauj、diuz sawq sezbei daengj, Suh Vwnzfungh daiq daeglwg doxcaez raiz gauj、damqlwnh、gaij gauj, son de boqyaem baenzlawz fatyaem couh suenq ndei, doiq daeglwg iugouz gig yiemz mbouj lawq saekdi, gig haeksat yiemzrwd. Ndaej daengz daxboh son’gyauq, gij suijbingz boqyaem Suh Cinlingj daezsang gig vaiq.

“Gak boux beixnuengx, daihgya ndei! Aen camhgvangjbo Bahbez Yangh seizneix hainduj boq- yaem……” Sing’yaem neix yiengj doh gyangmbwn gwnzgyaeuj yangh cwngfuj Bahbez Yangh, “aen camh- gvangjbo riuzdoengh” Suh Vwnzfungh goj youq ndaw mbanj runghbya hainduj gvangjbo lo, sing’yaem de youq ndaw runghbya dauq rwenz nanznanz mbouj daengx.