Dava Yauzcuz Swciyen Gung- conh Cunh dwg “Mbanjranz ceijsa” okmingz Guengjsae raeuz, gij guhfap ceijsa、ceiqlungz、ceijfaiq de, ciep- swnj caeuq fatyiengz le gij dinfwngz guh ceijsa baenz cien bi lizsij cojcoeng de, ndaej haenh dwg “gaiqbienqrin lix” fap guhceij Cung- guek.

Ceijsa Gungconh lizsij gyae- nanz, ndaw guek rog guek okmingz. Gijde daj Ciuhdangz hainduj, daengz Ciuhcingh satbyai hwnghoengh, baenz vunzlai Cuengh、Yauz dang- dieg hangh hongsaeh hung ndeu. Aen sigij gonq caetcib、betcib nienzdaih, gvaengh Gungconh miz 1000 lai ranz guh hong gyagoeng ceijsa, gai bieng- yubyub, hawj gyoengq nungzminz ndaej demsou vutgungz. Gij yienzliuh ceijsa （youh heuhguh ceijnaenggou、ceijfaiqhau、ceijnaeng）、ceijlungz、ceijfaiq dwg naeng faexsa、naeng doenggo cwx、gienghgau doenghgo、hoi daengj, ndawde naeng faexsa dwg yienzliuh guhceij ceiq gihbwnj caemh dwg ceiq youqgaenj haenx. Faexsa youq heuhguh faexmoubiz, mingzhag heuh faexgou, gvihaeuj loih faex gonengznuengx loenq mbaw, nyinz- ndaij naengfaex nyangqnyat saeq- raez, dwg yienzliuh ceiqndei guhceij, Guengjsae gak dieg daegbied dwg diegbya baihsaebaek cungj maj miz, Gungconh nem gij diegbya henzgyawj de faexsa couh gig lai. Swhyenz faexsa lairaeuh vih hongsaeh guhceij Gungconh daezhawj le yienzliuh gaeuq yungh; caiqgangj guhceij, dangz dinfwngz ndeu dwg yausu ceiq youqgaenj de, dangz dinfwngz guhceij de cungj dwg ciuq bouqfwngzguh ciuhgeq “cimqsa、cawjsa、swiqsa、genjsa、muhgiengh、guhraemxceij、lauzceij、atraemx、nemdak、biengj- ceij、geqceij、dabcax、raedceij” daengj 21 dangq hong daegbied gyagoeng ndaej baenz, gij ceijsa guhbaenz haenx nyinzndaij raez, mbawceij hausak nyangqnyat, sup- raemx supdumz ndei, doengheiq unqnup, saeqnaeh naihyungh, re nduknaeuh re nondwk, supmaeg vaiq, fouz doeg mbouj bienq saek, louzyoz ndaej nanz, baenz cungj ceij daihgeq daihneix aeudaeuj sij gij mbawheiq youqgaenj、sawcoengcug nem sawging fuzgyau daugyau、ceijbiu sauqmoh ceijei cuengqcaeq caeuq ceijduksuek doxgaiq daengj. Cawz vunzlai dang- dieg cawx yungh le, ceijsa Gungconh miz haujlai gai bae daengz ndaw gih rog gih, lij cienj gai daengz doengh- dieg Gangj Au Daiz, Dunghnanzya gak guek nem Ouhcouh、Feihcouh daengj dieg bae.

Bi 2006, ceijsa Gungconh dangz dinfwngz dajguh de ndaej lied haeuj buek daih’it swcigih gaep feihvuzciz vwnzva yizcanj mingzloeg. Miz laux- hangz nyinhnaeuz ceijsa Gungconh baenz dauq dinfwngz dajguh ciuhgeq de swnjciep ndaej caez youh ndei, raen ndaej mbouj lai, ceijsa youh gig ndei, daez naeuz aeu gyarengz baujhoh caeuq haifat, byaij ok diuz roen comz miz ginghci、ndawbiengz、lijyouz daengj cungj guh ndaej baenz ndeu okdaeuj, coicaenh ginghci ndawbiengz dangdieg cienzmienh hwngfat. Muengh “gaiqbienqrin lix” vwnzmingz ciuhgeq— ceijsa Gung- conh youq ndawbiengz ciuhneix ngoenz moq gvaq ngoenz neix dauq seng mbat moq, hwngfat cangq- noengq, baenz Dava caiqlij Guengjsae mbawmingzcoh vwnzva lijyouz gyaeundei okmingz ndeu.