2 nyied 9 hauh, Liujcwngz Yen Bwzyangz Gvangjcangz nauhyied raixcaix, 60 boux canghsijcih、Suhhez veiyenz yienhciengz yub maeg vih vunzlai sij cih “fuk” caeuq doiqlienz mbouj aeu cienz.

Ciuq cam rox, bineix 1 nyied, Liujcwngz Yen Cungjgunghvei lienzhab Yienh Vwnzlenz haiguh le aen hozdung soucomz “bak fuk doiqlienz haenhdanq Liujcwngz” aeu “haenhdanq seizdaih moq ciengqgok Liujcwngz moq” guh cawjdaez haenx, gungh soucomz ndaej doiqlienz 395 fouq. Ginggvaq Liujcouh Si、Liujcwngz Yen song gaep lauxhangz bingzdingh, bingzsenj ok it、 ngeih、sam daengj ciengj、youhsiu ciengj、haeujgvaengh ciengj gungh 100 boux vunz.

Cungjgunghvei dawz 100 fouq doiqlienz soucomz、bingzok haenx cienzbouh yungh haeuj mbat hozdung “fanh‘fuk’ doiqlienz soengq fanh ranz” haenx. Gyoengq lauxsae caeuq hagseng daj Liujcouh Si Suhfaz Yisuzyen、Gyaho Suhyen、Liujcwngz Yen Cizgungh Suhfaz Hezvei veiyenz daengj comz youq itheij, ciuq gij neiyungz vunzlai senj haenx, yienhciengz yub maeg sij doiqlienz, dan banhaet couh soengq le 11000 cih “fuk” caeuq doiqlienz mbouj aeu cienz.

(Dwng Gwzyi/邓克轶)