Mbwn ngamq rongh, ndaw rog rongz duzmoed couh hainduj muengz hwnjdaeuj lo: Gyoengq moed miz di dawz gij nyapnyaj ndaw rongz buen coh rog, miz di cingq baet diuz loh baihnaj bakcongh. Cij miz duz moed iq guh ndaej mbouj haeujsim. De doq menhyedyed gwed nyapnyaj, doq niemh gij feih gijgwn ngoenzlwenz.

Yenzlaiz ngoenzlwenz banringz, duzmoed aemq duznyaenh daengz ndaw reihfaiq, duznyaenh cingj duz- moed gwn gij raemxraiz diemzsisi. Duz moed iq neix baez gwn couh daengx mbouj roengzdaeuj.

Baez siengj daengz raemxraiz, gij sim de gaenq mbin daengz ndaw reihfaiq bae lo. Yaep he, de saedcaih nyaenx mbouj ndaej lo, swnh daihgya muengz guh hong, byawz hix mbouj ndaejhoengq dam de, couh cienq- ndang deuz ok, laeglemx coh reihfaiq raih bae.

“Daengx roengzdaeuj, mwngz bae gizlawz?” Duzmoed iq ngamq lizhai bakcongh, baihlaeng couh miz duz- moed hemq de.

Duzmoed iq baenq gyaeuj baez yawj, duz moed souj dou gyaep gvaqdaeuj, de cij dingz yamq.

“Mwngz vihmaz mbouj souj gijliz? Seizneix cingq baet ranz. 8 diemjcung cij ndaej okrog bae ra gijgwn.” Duzmoed souj dou laengz gij roen de.

“Vihmaz aeu daengz 8 diemjcung cij ndaej okrog?” Duz moed iq cam.

“Neix dwg gvidingh.” Duzmoed souj dou yiemz naeuz, “Ngoenzneix dwg ngoenzrengx, raeuz aeu 6 daengz 7 diemjcung hwnqcongz, 8 daengz 9 diemjcung okbae ra gwn. Gyoengq- vunz gaenqgawq gij hozdung raeuz yawj dienheiq. Danghnaeuz mwngz bouxdog luenhdaeuj, gyoengqvunz couh loek nyinhnaeuz gij dienheiq yaek bienq, neix couh vaih saeh lo. Duz moed iq, gyoengq duzmoed raeuz dwg boux yawhbauq dienhheiq, mwngz aeu gyaez aen mingzdaeuz neix ha!”

Duzmoed iq cijndei dauqbae, laebdaeb guh hong, hoeng de mbouj angq saekdi. Seizgan okbae daengz lo, gyoengq duzmoed faenfaen okrog bae ra gijgwn. De gipmuengz coh reihfaiq raih bae. De daeuj daengz reihfaiq baez yawj, doeksaet yat, mbouj rox daj gizlawz daeuj baenzlai dahcej- raiz —— nengzgoemj.

Gyoengqde gaemh duznyaenh duz dem duz, yaep he, couh gwn bae dingzlai. Duzmoed iq ngeix: Dangh- naeuz deq gyoengq nengzgoemj neix gwn duznyaenh sat, gou bae gizlawz gwn raemxraiz diemz ne? De doq sing hung hemq naeuz:“Dahcejraiz, gyoengqsou dwg bouxcaeg, sou vihmaz aeu gaj dai duznyaenh iqetet neix?”

Duz nengzgoemj ndeu hozunq naeuz:“Duzmoed iq beixnuengx, mwngz loek lo. Bouxcaeg mbouj dwg dou, dwg duznyaenh. Mwngz yawj gij ganjfaiq deng duznyaenh gwn neix. Bouxguhnaz daegdaengq cingj dou daeuj sousib gyoengq duznyaenh bouxcaeg iq neix. Mwngz vihmaz vunzdig vunzgaeq mbouj faen, fanj- dauq ndaq dou ne?”

Duzmoed iq ngiengxgyaeuj baez yawj, gij ganjfaiq deng duznyaenh gwn baenz go baenz go rozbyom caez. Hoeng, ndawsim de lij siengj gwn gij raemxraiz diemz, siengsim naeuz:“Gou caiq hix mbouj ndaej gwn raemxraiz diemz lo.”

Duz nengzgoemj neix ngauz- gyaeuj naeuz:“Caen moengjdoengj, mwngz cij guenj swhgeij gwnndoet, cix mbouj goq gofaiq dailix! Ngoenzneix mwngz ganq duznyaenh, ngoenzlaeng bouxguhnaz beg guh hong daengx bi!”

Fajnaj duzmoed iq mbouj rox seizlawz hoengzgywggywg, mbouj rox han dauq coenz lawz.