Boh Sung Naz hwnqmbonq hai dou, raen rog dou ndwn miz daegmbauq he, doeksaet caez. Huz Ging lienzmuengz naeuz:“Daxau, gou dwg daegyoux Sung Naz, bonjlaiz banringzgvaq couh ndaej daengz, hoeng gou baez daih’it daeuj, byaij loeng lo.” Boh Sung Naz yienznaeuz miz di mbouj maij de, hoeng seizneix hwnz lo, lijdwg hai dou hawj de haeuj ranz.

Ngoenz daihngeih, Huz Ging gaenx guh hongranz, caemhcaiq lij bek aek doiq bohmeh Sung Naz mieng naeuz:“Boh’au mehsimj, sou cuengq- sim ba, seizneix yienznaeuz gungzhoj, hoeng gou haengj roengzrengz, cungj miz ngoenz he gou dingh hawj Sung Naz gvaq ndaej saedceij ndei!”

Doeklaeng Huz Ging youh laeb- daeb daengz ranz Sung Naz bae song mbat, rox roen le hix mbouj byaij loeng gvaq lo. Bohmeh Sung Naz roxnyinh daegmbauq neix dwg vunz ndei, rox doiq dahlwg ndei, couh doengzeiq songde doxaeu lo. Bohmeh Huz Ging rox miz dahsau nyienh haq hawj lwg gaeq, baenzlawz mbouj angq. Doxaeu le, ndawsim Huz Ging angqvauvau, bungz vunz youh gangj youh riu.

Doxaeu bi ndeu le, daeglwg Siujmungz okseng lo. Ngamq guh bohmeh, songde roxnyinh vaiqvued vuenyungz dangqmaz. Sim’angq gvaq le, songde youh yousim lo. Siujmungz okseng seiz ngamq miz 3 gaen lai, songde yawj mbouj raen, cungj dwg siujsim yubyub menhmenh lumh de, lau baez mbouj haeujsim couh sieng de. Miz mbat ndeu, Sung Naz swiq naj Siujmungz, ribfwngz miz di raez, mbouj haeujsim bungq fajnaj iqet oiqneb Siujmungz, miz diuz riz iq he. Siujmungz in ndaej sikhaek sing hung daej hwnjdaeuj, baenzlawz lox cungj mbouj daengx. Sung Naz dingq ndaej gig siengsim, doeklaeng baez gek song sam ngoenz couh raed ribfwngz.

Lij miz mbat ndeu, Sung Naz okbae cawx byaek, Huz Ging youq ranz ciuqgoq Siujmungz. Sung Naz okdou mbouj geij nanz, Huz Ging fwt geiq ndaej geij ngoenz gonq baengz- youx de soengq hawj geu buhlwgnyez cuengq youq aen daiz iq gyaeujcongz, de siengj dawz bae saeg, mbouj liuh daengz bungq doek cenj raemx gwnz daiz iq roengz gwnz congz. Siujmungz deng rwed dumz, youq gwnz congz seiqguengq luenh dik luenh cak daejnganga hwnjdaeuj.

Sung Naz okdou gip lai lumz dawz cienz, de baenqndang maranz aeu cienz raen lwg daej, doq cam. Huz Ging najmong gangj de bungq cenj raemx doek, rwed deng lwg. Sung Naz doq hawj Siujmungz vuenh buhvaq doq ndaq Huz Ging:“Mwngz boux vunz neix guh saeh hawj gou di he hix mbouj ndaej cuengqsim, gou ngamq okdou mbouj geij nanz lwg couh deng rwed. Caeklaiq mbouj deng raemx- goenj rwed, danghnaeuz lwg deng sieng gou mbouj nyiuz mwngz!” Sung Naz ndaq ndaej Huz Ging mbouj gamj han, lumj moegyou nei dinghdingh naengh youq gizhaenx.

Sung Naz ndaq gaeuq le, sawq- mwh sing hung daej hwnjdaeuj:“Gaej gangj mwngz, baezgonq gou hix mbouj haeujsim. Raeuz song gvanbaz cungj dafangz, ndwenngoenz gaenq gvaq ndaej gig gunnanz lo, mboujlwnh baenzlawz, raeuz itdingh aeu ganqhoh ndei Siujmungz, doeklaeng de couh- dwg lwgda raeuz, dwg maqmuengh raeuz ha!” Dingq