Moix bi ndwencieng、ndwenngeih、sam nyied sam roxnaeuz soucou sat le, Guengjsae raeuz mbangj dieg minzcuz vunznoix cungj gag heuhcomz guh hangh yindung ciengj bauqva. Vunzlai daengx mbanj roxnaeuz gij mbanj henzgyawj cangndang moqsupsup angqvauvau dwk comz daengz dieg ciengj bauqva humxyawj, nauhyied dangqmaz. Bi 2006, ciengj bauqva Bouxcuengh ndaej lied haeuj buek daih’it swcigih gaep feihvuzciz vwnzva yizcanj mingzloeg.

Ciengj bauqva Bouxcuengh dwg doengh dieg Guengjsae、Gveicouh、Huznanz haenx hangh hozdung dijyuz cienzdoengj ndawbiengz minzcuz vunznoix Cuengh、Yauz、Dung ndeu, aeu Namzningz Si Yunghningz Gih Cunghhoz Yangh vunzlai Mbanjcuengh ciengj bauqva ceiq mizmingz, riuzcienz daengz seizneix gaenq miz 600 lai bi lizsij. Youq mwh Ciuhmingz satbyai Ciuhcingh codaeuz, ranghdieg Cunghhoz Yangh couh miz vunzmbanj aeu daeuh daj baihrog bakdou vanqsaj ngutngaeu haeuj ranzdajcawj, hopngomx gangraemx, heuhguh “yinx lungz dauq”; youh aenvih ndwenngeih co’ngeih dwg ngoenzseng “saenz dojdeih”, gij miuhsaenz dojdeih gizneix engq dwg hoenzyieng mbouj gat, baenzneix ciengj bauqva Mbanjcuengh cuengqcaeq saenzsien vunzlai guh’angq neix couh menhmenh hwng hwnjdaeuj. Aenvih ciengj bauqva hozdung gawq cuengqcaeq saenzlungz caeuq saenz dojdeih, youh dakgeiq gij maqmuengh gyaeundei vunzlai, caemhcaiq miz gij goengnaengz caeuq gijdij dijyuz、guh’angq、 yawjngonz haenx, diuzmingh de hoenghhwd, cigdaengz seizneix lij hwnghoengh mbouj byaiz.

Ngoenzciet ciengj bauqva gak dieg cix mbouj doxdoengz, miz ndwencieng cosam, caemh miz ndwencieng cibngux、ndwenngeih congeih、ndwenngeih cibngux caeuq ndwensam cosam. Youq ngoenzciet ciengj bauqva, Mbanjcuengh lauxnyaeq saimbwk, bouxboux cungj cangndang moqsup lengjgyaeu, bae gizdieg guh hozdung hophumx yawjngonz hemq gyayouz. Aen “bauqva” ciengj bauqva Bouxcuengh dwg aen gengxdiet luenz ciggingq 5 lizmij baenzneix, baihrog aeu baengzhoengz roxnaeuz couzhoengz heuxcug, cuengq youq gwnz aensoengqbauq “deihlienz” coux siu rimmwd haenx, diemjdawz le rongxnyingz hwnj gwnzmbwn; deq bauqva doek roengzdaeuj le gyoengq bouxsai rengzak camgya ciengj bauqva haenx couh doengzcaez buetcaenx hwnjbae, mwngz dued gou ciengj, roxnaeuz rag fwngz rag din, roxnaeuz beg mbaq got hwet, mbangj mbat baenz bang vunz benggot youq giz ndeu, mbangj baez cibgeij vunz doxbeg doxdaeb baenz dong, ciengzmienh gyukgyad luenhlad, daengx ciengz sing hemq sing swenj mbouj dingz. Ciengj bauqva Bouxcuengh cienzdoengj haenx mbouj hanh vunzsoq, mbouj faen mbiengjdoih, moix bauq cungj ciengj, sam bauq guhsat, dwg gvihaeuj “gag dwk gag hoenx”. Gizdieg doengciengz senj youq haenzdah、doenghreih doenghnaz roxnaeuz gwnz bo dieg haemq gvangq bingz haenx, cix mbouj dingh gyaiqbien. Bauqnding doek roengz dieg seiz, mbangjseiz doek roengz ndaw daemz、gwnz ranz、gwnz gofaex…Mboujlwnh dwg doek daengz gizlawz, daihgya cungj buet bae ciengjdued. Boux sien ciengj ndaej aen bauqnding haenx, lij itdingh ginggvaq gyoengqvunz gyaeplaengz ciengjdued cij ndaej, cigdaengz miz boux he dawz bauqnding soengq daengz aen daizcaizbuenq ndaw miuh cij suenq hingz. Riuznaeuz ciengj ndaej bauqdaeuz siengcwngh “gitsiengz habeiq”, bauq daihngeih siengcwngh “rumz dingh fwn yinx”, bauq daihsam siengcwngh “dajndaem dajciengx fungsou”, mbangj dieg caemh faenbied siengcwngh “fatcaiz、 demlwg、 hab’eiq” daengj. Sam bauq cungj ciengj sat le, sing loxlez、sing hemqswenj、sing gyonglaz、sing bauqrengh couh caez yiengj gyukgyad, gyoengqvunz mbangj yiengjsouh gij angqyangz ndaejhingz, mbangj cukhoh gij ndaejhingz bouxwnq, baenz bang baenz gyoengq, gangjgangj riuriu, nanznanz mbouj nyienh biek bae.

Ciengj bauqva hangh hozdung dijyuz ndawbiengz Bouxcuengh neix, aenvih gij cingzdoh haenqhwd ciengjdued de beij ndaej hwnj gij doxdax dwk giuzmakgyamj guekgya baihsae, habngamj yawjngonz, ndaej hekyouz guekrog、lauxhangz mumaeq hozdung dijyuz ndawbiengz guekrog haenh dwg “giuzmakgyamj baihdoeng”. Daj Gaiq Daihsam Daengx Guek Minzcuz Vunznoix Cienzdoengj Dijyuz Yindungvei hainduj, ciengj bauqva baenz le gij hanghmoeg doxdax cingqsik ndawde hangh ndeu lo.