——Bouxraiz Bingzciengz Lingz Siuyangh

De, boux vunzhohroen ndeu, cuengqroengz faggvak fagcanj gaem- hwnj gonjbit, youq ndaw suen raiz faenzcieng yaeng’yaeng fouxdoengh cihsaw, foux ok roeg heuh va hom, foux ok rumz saw ronghndwen cingx, foux ok benq homfwtfwt ndeu. De mingz heuh Lingz Siuyangh, dwg boux vunzhohroen Gunghlu Giz Denz- yangz Yen ndeu, seizhoengq, de maij youq ndaw homsaw cimhra faenh dinghcaem gvihaeuj bonjfaenh haenx, vanzlij gaghag Sawcuengh, byaijhwnj diuzroen yungh Sawcuengh raiz faenz- cieng, gaenh geij bi neix, lienzdaemh youq《Gvangjsih Minzcuz Bau》banj Sawcuengh fatbiuj faenzcieng Saw- cuengh 20 lai bien, youq 《Sam Nyied Sam》banj Sawcuengh fatbiuj faenz- cieng Sawcuengh 8 bien.

Mbouj doxduenq cix dox- bungz, lingx cienzraizgauj lingx ok duenh yienzfaenh Saw- cuengh ndeu

Bi 1992, Lingz Siuyangh gauh- gauj saetbaih. De camgya gaujsi ciugoeng bihaenx, bienqbaenz boux vunzhohroen ndeu. Gij cunghcij guhhong vunzhohroen dwg “hoh ndei roen、bauj doengrat”, Lingz Siuyangh doiq gij hong bonjfaenh caengz ngwxngax gvaq, hoeng seiz- hoengq de miz aen gyaezmaij daegbied ndeu: Doegsaw yawj bauqceij. Hoeng mwhhaenx gij cienzhong noixnet de gaeubae gij cienzgwndaenj le gaenq mbouj lw geijlai lo, cawx saw yawj bauqceij couh bienqbaenz gij maq- muengh sang lai. Aencamh hohhen dingh miz dangjbau, ndaw camh miz cibgeij boux doengzsaeh, gyoengqde cungj vih ndwenngoenz nyaengqnyat, mbouj ndaej vangq yawj bauqceij, gij bauqceij《Yougyangh Yizbau》《Gvangjsih Yizbau》 couh bienqbaenz gij “fukleih” Lingz Siuyangh boux dog lo. Lingz Siuyangh ceiq maij yawj banj gyahdingz《Yougyangh Yizbau》, baenz aen baenz aen gojgaeq caeuq gyahdingz mizgven haenx, youq ndaw bingzfanz yawj ndaej raen caenleix, youq ndaw saeh’iq yawj ndaej raen caencingz. Ngamq hainduj Lingz Siuyangh doeksaet dangqmaz: Gij gojgaeq iq baenzneix bingzfanz hix ndaej hwnj bauqceij ha? Ndigah couh miz ok gij siengjfap “gij gojgaeq baenzneix gou goj raiz ndaej”.

Bi 2010, lwg Lingz Siuyangh hwnj siujyoz lo, gij seizgan gvihaeuj de haenx couh bienq lai di lo.“Gou mbouj rox saekdi caepndat gaemhwnj gonjbit hainduj raiz faenzcieng.”Lingz Siu- yangh riu naeuz. Bien faenzcieng daih’it de cinjdeng dwg gangj dwg “luenh raiz” gij simcingz bonjfaenh, de aeu gij utheiq bonjfaenh youq ndaw ndwenngoenz、guhhong、gamjcingz bungzdaengz haenx cungj yungzhaeuj ndaw faenzcieng bae, doeklaeng fak bae hawj banj gyahdingz《Yougyangh Yizbau》. Siengj mbouj daengz gvaq- bae aen singhgiz ndeu, 《Roxnyinh Sienghaih》bien faenzcieng daih’it de daengh hwnj bauqceij lo. Daj neix le, Lingz Siuyangh couh maij hwnj raiz faenzcieng lo, “gaiq daeuhfouh iq” lienzdaemh hwnj bauqceij. Lingz Siuyangh ciengzseiz buet bae youz- cwngsoj lingx cienzraizgauj, nanz le couh caeuq Siujluz bouxsoengqsaenq youzcwngsoj dangdieg neix sugrox lo.

Ngoenz ndeu, Siujluz doiq Lingz Siuyangh naeuz: “Cejlingz, mwngz baenzneix maij raiz faenzcieng, sawqsawq yungh Sawcuengh raiz faenzcieng ba!”

“Sawcuengh? Sawcuengh dwg gijmaz doxgaiq?” Lingz Siuyangh doeksaet cam naeuz.

“Sawcuengh couhdwg cihsaw Bouxcuengh raeuz, hix couhdwg naeuz gij Vahcuengh raeuz gangj haenx goj ndaej raiz baenz cihsaw.”

“Bouxcuengh raeuz miz cihsaw ha? Gij Vahcuengh raeuz gangj raiz baenz cihsaw ndaej ha?” Lingz Siuyangh caen dwg mbouj gamj saenq.

“Dangyienz miz. Yifung Cin yienh raeuz couh miz boux bouxraiz Sawcuengh ndeu, de ciengzseiz fatbiuj cozbinj Sawcuengh, mbawdan fakcienz cienzraizgauj de goj dwg gou soengq, cienzraizgauj lij gig lai bo.” Siujluz naeuz.

Gij vah Siujluz yienznaeuz mbouj miz sim, hoeng cix dazyinx Lingz Siuyangh byaij hwnj le diuzroen gag- hag Sawcuengh.

Hwnjdin, gaghag Saw- cuengh caijsoq ndei bungz lauxsae ndei

Dingq Siujluz bouxsoengqsaenq neix gaisau le, Lingz Siuyangh sikhaek hwnj muengx saeuj, doeklaeng ra raen Sawcuengh dahraix. Sawcuengh baenzlawz gyoeb、baenzlawz doeg? Aensim roxnyinh geizheih hawj de laebdaeb saeuj roengzbae, doeklaeng saeuj ndaej aen sibinz “hag 900 coenz Vahcuengh” ndeu. Haiok aen sibinz baez dingq, Lingz Siuyangh youh doeksaet baez moq lo: “Neix mbouj dwg vahcoj gou ha? Vahcoj gou gingqyienz miz cihsaw?! Hoeng gou cix mbouj rox saekdi.”

Ginggvaq cobouh roxyiuj, de rox Sawcuengh dwg cihsaw gyoepyaem. Lingz Siuyangh cau 22 cih singmeh caeuq 108 cih yinhmeh Sawcuengh roengzdaeuj, baez ndaejhoengq couh hai dennauj yawj, riengz dennauj doeg, sijsaeq faenbied gij yaemdoeg gyoengqde. Singmeh lij suenq geiq ndaej ngaih, yinhmeh cix miz di hoj lo.

Mwhhaenx, Lingz Siuyangh youq muengx roxyiuj le Vangz Civeij boux secangj Aen Vwnzyozse Vunzguhnaz Nazlauz Cin Sihlinz Yen neix, hawj de siengj mbouj daengz dwg Vangz Civeij rox Sawcuengh. Lingz Siuyangh lumj vaxdawz diuznyangj gouqmingh nei, baenzlawz cungj aeu baiq de guh lauxsae. Hoeng Vangz Civeij cix giemhaw naeuz, guh lauxsae mbouj gamj guh, hoeng cix bang Lingz Siuyangh doigawj boux lauxsae ndeu ndaej. Yienghneix, de doigawj Yiz Ciz boux vunz youq Bingzgoj Densidaiz guhhong neix hawj Lingz Siuyangh lo.

“Yiz lauxsae dwg boux vunz gig simndei ndeu, de naeuz seizneix vunz haengj hag Sawcuengh gig noix, cijaeu miz vunz haengj hag, gouz daengz de, de cungj haengj son. Dingq gij vah de le, gou gamjdoengh liux lo.” Lingz Siuyangh naeuz. Yiz Ciz aeu gij swhliu hag Sawcuengh dajyaenq okdaeuj ding baenz cek soengq hawj Lingz Siuyangh, vanzlij son de gaijcingq gij singmeh yinhmeh de doeg mbouj biucinj haenx. Yiz Ciz lij soengq mbangj bauqceij《Gvangjsih Minzcuz Bau》banj Sawcuengh caeuq mbangj 《Sam Nyied Sam》banj Sawcuengh hawj de, daengq de aeu lai doeg lai yawj cij daezsang suijbingz ndaej. Youq neix le, Lingz Siuyangh ciengz- seiz youq muengx cam Yiz Ciz, Yiz Ciz cungj baenzbaenz bang de gaijgez nanzdaez.

Singmeh、yinhmeh gihbwnj sug- rox le, Lingz Siuyangh hainduj sawq bae yawjdoeg. Ngamq hainduj, bien faenzcieng cien cih saw ndeu de aeu yungh sam seiq diemj cung cij doeg ndaej liux. De mbouj miz banhfap guh ndaej daengz “raen cih ok sing, raen saw rox eiqsei”. Yienznaeuz gij ruqyaeng yawjdoeg gig menh, hoeng doiq aen swz ndeu roxnaeuz coenz vah ndeu, moix baez gyoep ok gij yaem de doeg rox gij eiqsei de le, Lingz Siuyangh cungj nyaenx mbouj ndaej sim’angq. Yienznaeuz yawjdoeg gig gwnrengz, hoeng de vanzlij roxnyinh Sawcuengh miz yinxdaeuz, yied doeg yied raen caenciet. Ndigah, de haengj doeg haengj yawj mbouj raen baeg saekdi.

Henmaenh, guh boux boux- raiz yungh vahcoj raiz faenz- cieng ndeu

Bi ndeu le, Lingz Siuyangh gaemhwnj gonjbit, yungh Sawcuengh daeuj lwnhgangj gij gojgaeq bonj- faenh. Bi 2011 ndwen 11 ngoenz 30, bien faenzcieng Sawcuengh daih’it Lingz Siuyangh youq《Gvangjsih Minzcuz Bau》banj Sawcuengh daengh okdaeuj.

Vihliux daezsang gij suijbingz Sawcuengh, Lingz Siuyangh gonqlaeng camgya le aenban son fanhoiz Sawcuengh Swcigih Minzyijveij banh haenx caeuq aenban son yungh Sawcuengh raiz faenzcieng Gvangj- sih Sam Nyied Sam Cazcise banh haenx.

Yungh vahcoj raiz faenzcieng hawj Lingz Siuyangh swnh sim swnh fwngz, lumj duzbya youq ndaw raemx nei. Daj neix geij bi, gij cozbinj Lingz Siuyangh lienzdaemh youq gwnz bauqceij ganhvuz Sawcuengh fatbiuj.

Seizneix Lingz Siuyangh cungj yungh Cuengh、Gun song cungj saw raiz faenzcieng. Goeng bouxgeq caeuq Lingz Siuyangh dox sugrox ndeu, aenvih daeg lwg youq rog guhhong haenx song ndwen lai mbouj dwk denva hawj de, de euqgyaengj nyinhnaeuz dwg soujgih vaih lo, euq hawj canghcoih bang de coih soujgih. Lingz Siuyangh yungh gij bitmaeg saeqnaeh boux bouxraiz mehmbwk ndeu, gij cingzgamj lingzsingj, yungh Sawgun raiz baenz 《Soujgih Vaih Lo》, yungh Sawcuengh raiz baenz《Soujgih Vaih Lo》, ciq daeuj hemqheuh lwg- mbwk lwgsai gaej aenvih nyaengq- foed cix lumzlawq gvansim gyaezhoh vunzgeq. Cozbinj Sawgun《Soujgih Vaih Lo》 bi 2016 youq 《Sam Nyied Sam》banj Sawgun geiz daihbet fatbiuj, cozbinj Sawcuengh《Soujgih Vaih Lo》bi 2017 youq《Sam Nyied Sam》banj Sawcuengh geiz daihsam fatbiuj.

“Boux vunzhohroen bingz- ciengz ndeu, boux vunzhenmaenh yungh vahcoj raiz faenzcieng ndeu, gij gojgaeq gou gig bingzfanz, bauqlwnh gij gojgaeq bingzfanz baenzneix dij ndaej lwi?” Lingz Siuyangh riu cam gicej.

Lingz Siuyangh youh naeuz:“Couhcinj dajcauh cozbinj vwnzyoz Sawcuengh cawqdingh camrid, hoeng de gaenq dwg ndaw sengmingh gou bouhfaenh ndeu, gou yaek laebdaeb raiz roengzbae.”