Gaxgonq moix bi ndwencieng co’ngeih banhaet, Bouxlongj bae caeq dojdeih le, moix ranz aeu soengq bohmo aen faengx ndeu.

Miz baez ndeu, miz ranz he gungzhoj lai, mbouj miz haeuxcid suek faengx. Hoeng, vihliux mbouj saetnaj, cijndei aeu daeuhnyangj daeuj suek song aen “faengx”, aen ndeu daiq bae caeq dojdeih, aen ndeu soengq hawj bohmo. Bohmo daengz ranz, yaek hai aen “faengx” ranz neix soengq daeuj gwn, baez raen daeuhnyangj couh rox lo. Ngoenz daihngeih, bohmo neix haenh aen faengz ranz neix youq ndaw haeuxcid dwk daeuhnyangj ndeigwn raixcaix. Bi moq gyoengqvunz hix baenzneix suek faengx soengq hawj bohmo, hoeng de aen he hix mbouj aeu. Doeklaeng gij fungsug soengq faengx hawj bohmo couh mbouj miz lo. Hoeng, caezgya cungj maij gwn faengx dwk daeuhnyangj.

Mboujgvaq hix miz vunz gangj gaxgonq Bouxlongj doxcomz youq ndaw bya, gizyouq heiqdoeg lai, gyoengqde aeu daeuhnyangj gyaux haeuxcid suek faengx, naeuz gwn gij faengx neix ndaej dingj heiqdoeg. Mboujguenj aen riuz lawz dwg caen, aen fungsug neix dauqdaej ndaej cienz roengzdaeuj, seizneix lij miz vunz baenzneix suek faengx.