“Danghnaeuz gou yawj ndaej raen, couh ndaej gig yungzheih bae faenbied banngoenz caeuq banhaemh, ndaej rox youq ndaw vunzlai yien fajfwngz mwngz mbouj loek. Dangh- naeuz gou yawj ndaej raen, couh ndaej haici daiq mwngz bae youz, ndaej youq mwngz liuh mbouj daengz seiz daj baihlaeng got mwngz baez he……” Moix baez ndaejnyi souj go neix gou cungj nyaenx mbouj ndaej doek raemxda, ngeixdauq doiq gvanbaz gig daegbied he.

Doiq gvanbaz neix heuhguh Huz Ging caeuq Sung Naz.

27 bi gaxgonq Huz Ging okseng youq aen haw iq lajmbanj he. Ranz de gaenq miz song daeggo, bohmeh de gig maqmuengh miz dah lwgmbwk ndeu. Hoeng de okseng le, vunz daengx ranz lijdwg gig angqvauvau.

Huz Ging seiziq maj ndaej noengq, ndeigyaez dangqmaz, boux raen boux haenh, cungj siengj umj de mbat he daeuq de guhcaemz.

Vahsug naeuz “vunz miz nanh fuk mbouj dwg youq gyangngoenz couhdwg youq gyanghaemh”. Huz Ging ndaej 4 bi seiz, ngoenz he de daengx ndang fatndat, bohmeh de nyaengq guh reihnaz, ndawranz lwgnyez lai, goq ndaej lwg neix goq mbouj ndaej lwg haenx. Bingzseiz geij lwg neix baenz di bingh, bae bouqyw gwnz haw cawx di yw ma gwn ndwi, caih bingh gag baenz gag ndei.

Gwn ngoenz yw ndeu le, Huz Ging mboujdan mbouj raen ndei hwnjdaeuj, ndangdaej dauqfanj yied daeuj yied ndat, raemx haeux mbouj ndaej gwn saekdi, gyangngoenz ninz youq mbonq mbouj doengh, mizseiz ndaw bak lij luenh nam luenh gangj dem, dwglau raixcaix. Bohmeh de raen bingh de bienq naek, simgip lo, lienzhwnz soengq de bae yihyen ndaw singz.

Bouxlaux ciengz gangj lij noix mbouj dam, baenzduz cij coih. Doek- laeng Huz Ging gouq ndaej diuz mingh dauq, hoeng song ceh lwgda ciengxlwenx yawj mbouj raen lo. Canghyw naekgywg dwk doiq bohmeh de naeuz:“Song da lwg sou yawj mbouj raen lij suenq ndei, danghnaeuz caiq soengq daeuj gvaiz di, lienz mingh hix deng vut bae lo.” Bohmeh de dingq le, ienqhoij ndaej sing hung daej hwnj- daeuj.

Daj seizde hwnj, gij seiqgyaiq Huz Ging couh bienq ndaej laep- fubfub, yawj mbouj raen hix nanz lumh ndaej daengz, cij ndaej baengh song rwz bae dingq. Gwndaenj miz vunz goq, hoeng yawj mbouj raen guh maz cungj mbouj bienh.

Huz Ging daenj buh ciengz daenj buh baihlaeng daengz baihnaj, daenj haiz ciengz baihgvaz dwg gouh neix, baihswix dwg gouh haenx, nyex ndaej vunz nyaenx mbouj ndaej riu hwnj- daeuj. Lij miz lwgnyez cabheiq lij vut diuz dwngx de bae, gveng rin vanq namh coh de dem. Huz Ging ciengz gag daej, de roxnyinh ndwenngoenz mbouj miz saekdi eiqsei, mizseiz caen siengj gaggaj bae.

Lai bi daeuj, youq bohmeh、daeggo caeuq baengzyoux gvansim bangcoh baihlaj, Huz Ging mbouj caiq doek raemxda, de naemj doeng lo: Dafangz youh baenzlawz? De menh- menh hag rox ciuqgoq swhgeij gwndaenj, hix hag rox boq dig caeuq san loz. Bohmeh de laux lo, song daeggo hix gonqlaeng baenzgya lo, Huz Ging gietdingh hag cungj dinfwngz he daeuj ciengx ndang. De siengj daengz bouxdafangz anmoz, doq bauqmingz bae beizyin, hag ndaej couh bae aen diemq dafangz anmoz guh hong. Saedceij hix gvaq ndaej bae, ndawsim de gig vuenheij, mizseiz lij angqfwngfwng naemj: Danghnaeuz ndaej doxaeu couh engq ndei lo! Naemj sat, de youh gag danqheiq doeknaiq, swhgeij yawj mbouj raen, miz dahsau lawz nyienh ne? Boux nyienh gaen de mbouj dwg huk couhdwg ngawz.

Gij yienzfaenh lumjbaenz gwnz mbwn caeux couh dawz diuz mae yawj mbouj raen cug youq itheij nei, hawj song boux vunz gaenjgaenj doxlienz.

Miz baez ndeu, Huz Ging cingq hawj boux mehmbwk cungnienz he anmoz, mbouj rox vihmaz, boux hek neix fad sing hung ndaq de, naeuz de anmoz mbouj ndei, lij yawj mbouj hwnj de, byaep de dafangz dem. Huz Ging hix mbouj siengj caeuq de ceng baenzlai, cijndei nyaenxheiq youq dwk, mbouj gangj saek coenz. Seiz- neix, anmoz saefouh Sung Naz byaij gvaqdaeuj, riunyumnyum doiq boux hek neix naeuz:“Dahcej, de ngamq daeuj gizneix guh hong, miz di guh mbouj ndaej ndei. Danghnaeuz mwngz mbouj muenxeiq, couh vuenh gou daeuj bang mwngz anmoz.”

Dingq Sung Naz baenzneix gangj, boux hek neix hix mbouj ndei caiq ndaq lo, cijndei hawj Sung Naz daeuj anmoz. Huz Ging gig docih Sung Naz, youq ndawsim haenh de sim- soh.

Ranz Sung Naz youq yienh nden, Sung Naz beij Huz Ging iq 8 bi, caeuq de doxdoengz, hix dwg seiziq aenvih fatndat bae yw mbouj ndaej gib bienqbaenz