Dang mwngz byaij gvaq gwnzgai honghsaeq、gyaeujreih doenghnaz Yienh Bogbeg Yilinz Si, seiqseiz ndaej dingqnyi gij singciengq “yiduhya”“yiduhyala” heiqnyaebcaz Gveiqnamz daj gizgyawj roxnaeuz dieggyae cibiu gvaqdaeuj, youq henz rwz gvaengxgvax mbouj sanq…Gij heiqnyaebcaz riuzcienz youq rangh- dieg Bogbeg haenx youq canghheiq ndawbiengz euqmaenz caeuq maez- maij dwk henmaenh ndawde nga ndaet mbaw mwn, baenz cungj heiq vunzlai dangdieg haengj dingq gyaez yawj ndeu. Bi 2006, “Heiqnyaebcaz Gveiqnamz” ndaej lied haeuj guek- gya gaep buek daih’it feihvuzciz vwnzva yizcanj mingzloeg.

Heiqnyaebcaz Gveiqnamz dwg Guengjsae heiqdeihfueng Bouxgun ndawde cungj ndeu, youq Ciuhmingz satbyai daj Gyanghsih Gannanz cienz haeuj Bogbeg, daj ciengq max- faexcuk hwngfat baenz doq ciengq doq foux ciengq nyaebcaz, youq goekdaej “nyaebcaz lwnh ciuhgeq” gwnzde supaeu gijndei heiq- moegyou、heiqdeih、heiqvaiz dang- dieg cugbouh hwngfat hwnjdaeuj, ciemhciemh hwnghoengh, baenz lizsij citheiq Cungguek ndawde cungj heiq daegbied gag miz ndeu. Ciuq gij daegdiemj swzdak de, caemh heuhguh “yiduhya”. Seizneix youq 33 aen yanghcin ndaw diegguenj Bogbeg caeuq Yilinz Si gak yienhgih nem Ginhcouh、Vuzcouh、Namzningz daengj si mbangj yienhgih riucienz gvangqlangh, vunzraeuz couh sib- gvenq heuh de guh “heiqnyaebcaz Gveiqnamz”. Cungj heiq neix yienj- ciengq neiyungz aeu “cibngeih nyied nyaebcaz” guhcawj, ciuq caz haidaiz、haifwz、diemjcaz、nyaebcaz、ceujcaz、gaicaz gonqlaeng bae yienjciengq, daengx aen gofoux dwg doenggvaq gij baenzdauq guhhong ndaem caz, dakdaengh ok vunzguhhong sim- hoengz guhhong caeuq faenh sim- angq fungsou haenx. Cungj heiq neix gvihaeuj heiq ndawbiengz, bouxyienj youz siujseng、siujdan、siujcouj guh cawjyienj, doihyienj iq、 cietmoeg iq、gaiqdawz iq yienhda, ndigah caemh heuhguh “heiq sam siuj” roxnaeuz “ban sam giek”. Heiq- nyaebcaz Gveiqnamz ndawde yienj- ciengq gojgaeq lizsij roxnaeuz gojriuz ndawbiengz haenx ndaej heuhguh “nyaebcaz lwnh ciuhgeq”, dingzlai aeu heiqloenghriu caeuq heiqguh- nauh guhcawj, gij neiyungz de dingzlai dwg gojgaeq gangj dauhleix ndawranz, cingzciet sengdoengh, doengsug rox ngaih, gijheiq saedceij caeuq yienghsaek deihfueng noengz- nwd, sawheiq cienzdoengj miz 《Cangh Sam Gvaq Cieng》《Daeq- gyaeuj Ngeih Ciq Yah》《Lwgnyez Bae Ging Gaujsi》daengj 100 lai bonj, yienj baenz 365 ngoenz mbouj doxcungz. Linghvaih lij miz mbangj heiq souh diuhcaijdiu yingjyangj cix ok moq, lumjbaenz 《Gai Maehoengz》《Raemjfwnz Ndaej Yah》daengj, doeklaeng deng gij banheiq Begvah aenvih Daibingz Denhgoz Yindung saetbaih le deuznanh haeuj Guengj- sae haenx yingjyangj, okyienh le 《Boekluenh Yaemyieng》《Gauh Vwnzgij》 daengj citheiq hung, daengx citheiq funghgwz miz gaij- bienq haemq hung, mbouj caiq dwg gij heiq iq nyaebcaz doenghbaez lo.

Heiqnyaebcaz Gveiqnamz gij yozgi buenxdiuq de miz laz、gyong、cacemq、moegngawz、loxlez、aendig、ngeihyienz daengj, gaiqdawz miz sailaisaek、bienngaenz、beizva caeuq gaenfwngz daengj, ciuq ciengq max- faexcuk、foux saeceij、fouxlungz、dwkbienngaenz daengj gonqlaeng bae biujyienj; gij diuhciengq yienj- ciengq de it dwg diuhcaz, couhdwg gij diuh baenz dauq nyaebcaz, ngeih dwg capcaz, couhdwg aeu “diuhsaeq Nanzcangh”“seiqgeiq va’mbu” guh goekdaej, supaeu gij diuhsaeq ndaw- biengz dangdieg bienbaenz. Vah- ciengq aeu Vahmaxgai guhcawj, Begvah Bogbeg guhbouj, daegsaek deihfueng naekgywg.

Bogbeg soqlaiz miz aen mingz- daeuz ndei “mbanjranz yisuz nyaeb- caz Guengjsae”, daengx yienh seiz- neix miz duenzheiqnyaebcaz 130 lai aen gungh 2000 lai bouxyienj, moix bi yienjok 2000 lai ciengzbaez, rizdin byaij doh daengx guek gak dieg. Moix bungz hoihmiuh、ngoenz- seng Guenyaem、 guhsix daengj gvaq cieng gvaq ciet caeuq ngoenz hongsoeng, lajmbanj、gwnzhaw dangdieg yienjciengq heiqnyaebcaz cungj gig nauhyied, ciengzseiz miz duenzheiqnyaebcaz ndawbiengz bae lajmbanj biujyienj, mwh yienj daengz seiz angq, couh okyienj gij cingzgingj gamjdoengh vunz gwnz daiz laj daiz doengzcaez ciengq haenx, angqyangz raixcaix.