Vangz Civeij, bouxsai, vunz Bouxcuengh, bi 1974 ndwen 7 seng, vunzguhnaz, cungcien bizyez. Bi 1991 ndwen 7 cuhcungh bizyez hainduj lienh raiz faenzcieng, daengz seizneix gungh fatbiuj vwnzyoz cozbinj 500 lai bien. Bi 2014 oksaw cek sawcomz bonjfaenh 《Gij Riz Youzlangh》; bi 2012 ndwen 5 banh baenz “Aen Vwnzyozse Vunzguhnaz Nazlauz Sih- linz Yen”, neix dwg aen vwnzyozse Gvangjsih daih’it vunzguhnaz; bi 2015 ndwen 4 aeundaej aen cwng- heuh “Vunzgyaeploqsiengj Yawjdoeg Ceiq Gyaeundei Gvangjsih”; bi 2015 ndwen 7 gyahaeuj Aen Hezvei Cozgyah Guengjsae; bi 2016 ndwen 4, haeuj aen ban son raiz faenzcieng vwnzyoz minzcuz vunznoix daih 23 geiz Luj Sin Vwnzyozyen bae hagsib. Seizneix youq Nazlauz Yangh Sihlinz Yen Baksaek Si dieg henz Dah- dozniengzgyangh gyaeundei neix youq.

Bihaenx cunghgauj saet- baih le

Vangz Civeij youq diegbya Bingzgoj Yen Baksaek Si ndeu okseng, mwh lij iq, mbanjbya mbouj doeng dienh, mbouj doeng raemx, mbouj doeng loh, de couhdwg youq gizdieg yakrwix baenzneix doeg liux siujyoz caeuq cuhcungh. Mwhhaenx, de ciengzseiz miz aen siengjfap baenzneix, aeu gauj okbae, gaijbienq gij minghyinh bonjfaenh. Yienghneix, de youq laj aen daeng’youzhaeu haenqrengz doegsaw. Hoeng bi 1991 mwh cunghgauj, de lij dwg saetbaih lo. Aenvih ndaw ranz gig ndoq, mbouj miz ngaenz bae boujhag, de cijndaej dauqma ranz guh hong lo.

Mwhhaenx, Vangz Civeij sieng- sim dangqmaz, cungj roxnyinh goeng- mbwn doiq bonjfaenh mbouj goeng- bingz. Ndigah, de couh aeu siengsim hozndat daeuj cunghaeuj ndaw raiz faenzcieng bae. Couh yienghneix, de diemj hwnj aen daeng’youzhaeu, youq gyanghwnz seiz gyoengqvunz ninz- ndaek le hainduj gvaq cungj ndwen- ngoenz caeuq bingzciengz mbouj doxdoengz lo. Bohmeh gig lijgaij de, gyoengqde moix baez bae haw, cungj bang de cawx youzhaeu caeuq ceij- saenq ma. Youq laj bohmeh gujli de itcig genhciz douzgauj hawj bause. Goengfou mbouj vi boux miz sim, 《Gaej Gangj Gak Boux Gak Lengq》hot sei daih’it de neix dauqdaej youq《Yougyangh Yizbau》fatbiuj lo. Ndwen ndeu le de sou ndaej 5 maenz cienzgauj bause fathawj lo, de yungh 3 maenz ngaenz daeuj cawx ceijsaenq caeuq youzbiuq, yungh 2 maenz ngaenz daeuj cawx mienh ma ranz caeuq bohmeh doxcaez yiengjsouh faenh goengrengz daih’it ciuhvunz neix.

Daj seizhaenx hwnj, gij doenghlig raiz faenzcieng Vangz Civeij couh yied daeuj yied lai lo. Bihaenx, de ndaej bingz baenz boux dunghsinyenz maenhndei Yougyangh Yizbau.

Ngaiz mbaw bauqceij “Sawyinghgoz” ndeu ngaeu bae lingzhoenz

Aenvih ciengzseiz douzgauj, couh yienghneix menhmenh maij hwnj bauqceij lo. Mwhhaenx, Vangz Civeij ciengzseiz youq bakroen mbanjranz caj bouxsoengqsaenq, baez dingq ndaej nyi aenlingz yiengj, couh caj mbouj ndaej bae coux bouxsoengq- saenq lo. Couh yienghneix, menhmenh couh caeuq bouxsoengqsaenq doxsug lo, gij bauqceij bouxsoengqsaenq soengq haenx hix dwg de yawj gonq cij soengq bae hawj bouxdinghyawj.

Miz ngoenz ndeu, Vangz Civeij cingq fanyawj bauqceij, sawqmwh, de ngaiz mbaw bauqceij “Sawyinghgoz” ndeu yinxdawz lo. De yawj bae yawj dauq, baenzlawz cungj yawj mbouj rox saek aen swz, couh cam boux- soengqsaenq, gij neix dwg gij bauqceij byawz ni? Mbanjbya hix miz vunz yawj rox Sawyinghgoz ha? Bouxsoengq- saenq naeuz, dwg boux lauxsae daiqgoq mingz heuhguh Yiz Ciz ndeu dingh. De dingq le boiqfug boux lauxsae gig miz dungxcaiz neix dangqmaz, ndigah gietdingh baiq Yiz Ciz guh lauxsae, son bonjfaenh hag Vahyinghgoz. Ngoenz daihngeih banhaemh, de byaijhaeuj aendou Lungzliz Siujyoz Mbanjbahloz Bingz- goj Yen, gizhaenx seiq baih cungj miz bya heux, miz 20 boux hagseng, cungj dwg vunz Bouxcuengh. Caj Vangz Civeij gangjmingz vihmaz daeuj ra de liux, Yiz Ciz ngeizvaeg lo:“Mwngz dwg gangj gij bauqceij neix ha? Neix dwg《Gvangjsih Minzcuz Bau》(banj Sawcuengh), cihsaw gwnzde mbouj dwg Sawyinghgoz, dwg Sawcuengh, dwg cihsaw vahcoj Bouxcuengh raeuz.” Liux le de yungh Vahcuengh doegok bien faenzcieng de fatbiuj youq gwnz bauqceij ndeu. Vangz Civeij dingq le, couh maij hwnj faenh bauqceij “Sawyinghgoz” neix lo.

Youq diegrog youzlangh sim geiq Sawcuengh cingz mbouj bienq

Daj bungz Yiz Ciz caeuq 《Gvangjsih Minzcuz Bau》le, Vangz Civeij couh gietdingh hag Sawcuengh, hix aeu raiz ok faenzcieng Sawcuengh ndei. Hoeng, vihliux gvaq ndwen- ngoenz, bi daihngeih, de daiq hwnj gij siengjfap gaijbienq minghyinh lizhai mbanjranz, gonqlaeng youq Baksaek、Lungzlinz、Bwzhaij daengj dieg dajgoeng. Yienznaeuz gij dajveh hag Sawcuengh baez youh baez deng ngaiznyed, hoeng moix baez bae daengz dieg ndeu, saw cungj bienq- baenz baengzyoux de, moix baez vuenh dieg ndeu, de cungj haeujsim sourom sucaiz. Bi 2003, caeuq mehyah youqdingh Sihlinz Yen le, de gietdingh hainduj hag Sawcuengh. Yienghneix, de dwk denva hawj Yiz Ciz, lwnh gij siengjfap bonjfaenh hawj de rox. Yiz Ciz gig angq, mbouj daengz geij ngoenz, couh aeu gij doegfap singmeh yinhmeh Sawcuengh loeg haeuj loegyaemdaiq bae caeuq gij swhliu hag Sawcuengh doxcaez fak bae Sihlinz hawj Vangz Civeij lo.

Vangz Civeij baez ndaejhoengq couh riengz luzyinhgih doeg, mbouj geijlai nanz, de couh geiqndaej gij singmeh yinhmeh caeuq singdiuh Sawcuengh lo.

Daengxroengz yamqdin youzlangh, yungh Sawcuengh raiz faenzcieng ndaej fungsou

Daj Bwzhaij dauqma daengz Sihlinz le, Vangz Civeij couh miz gij siengjfap yungh Sawcuengh raiz faenzcieng lo, ndigah de aeuok gij swhliu Sawcuengh caeuq aen luz- yinhgih. Daengz seiz gyanghwnz gyoengqvunz cungj ninzndaek, de couh dinghcubcub dwk youq ndaw sim maegdoeg sawloih Sawcuengh, gaiq benjdou ndaw ranz、gwnz gyaeuj- mbonq nem rim gij singmeh、yinhmeh caeuq yinhbyauh Sawcuengh de yungh fwngz raiz haenx. Bi 2010 ndwen 8, daihhaj gaiq aenban son yungh Sawcuengh raiz faenzcieng Gvangjsih haiban, ginggvaq Yiz lauxsae doigawj, de bae aen ban neix hagsib lo. Doenggvaq beizyin, de gaemdawz le gij fuengfap yungh Sawcuengh raiz faenzcieng, gikok le gij saenqsim yungh Sawcuengh raiz faenzcieng de. Bi 2012 ndwen 12,《Gvangjsih Minzcuz Bau》 daengh yungh le《Yiz Ciz: Sawcuengh Hawj De Saedyienh Aen Loqsiengj Bienqbaenz Cozgyah》bien saehmoq Sawcuengh daih’it de neix, sawcuenh Sawcuengh de《Lwgvaiz》《Vamakdauz Gwnz Raemx》《Mehyah Danggya》 daengj hix laeb- daeb ndaej daengh youq gwnz 《Gvangjsih Minzcuz Bau》. Faenzcieng fatbiuj le, mbangj di vunzguhnaz dangdieg miz vwnzva haenx cungj boiqfug de dangqmaz, mehyah hix mbouj caiq naeuz de dwg vunzbag lo.

Vihliux hawj vunzguhnaz maij vwnzyoz dangdieg hix miz gihvei fatbiuj faenzcieng, bi 2012 ndwen 5, Vangz Civeij comz “cozgyah vunz- guhnaz” hwnjdaeuj, son gyoengqde raiz faenzcieng. Ngamq hainduj dwg 4 vunz， doeklaeng menhmenh gyalai. De leihyungh ngoenzhaw, dawz gij faenzcieng “cozgyah vunzguhnaz” raiz haenx gyoebcomz hwnjdaeuj, youq laj faex henz roen roxnaeuz ndaw bouq- faenj gaij gauj. Bihaenx, 《Caj》 bien sawcuenh Sawcuengh Cinz Lizciuh bouxcoz mehmbwk Mbanjhawgaeuq neix couh fatbiuj youq gwnz 《Sam Nyied Sam》, vanzlij aeundaej ciengj- maenhndei gaiq daih’it cwnghvwnz miz ciengj 《Sam Nyied Sam》. Daengz seiz Vwnzlenz Sihlinz Yen rox Mbanj- nazlauz miz bang bouxgyaez vwnzyoz baenzneix, gietdingh laebbaenz Aen Vwnzyozse Vunzguhnaz Nazlauz, hawj Vangz Civeij guh secangj.

Sawcuengh hawj de saedyienh aen loqsiengj bienqbaenz cozgyah

Vwnzyozse laebbaenz le, aeu- ndaej le gij haeujcoengh caeuq gvansim Lij Siujvaz boux vunz mwhhaenx guh fusuhgi Sihlinz Yenveij neix, de soengq saw bae hawj vwnzyozse, lij lienzhaeh vunzsimndei giyez soengq bae aen dennauj ndeu dem. Lij suhgi lij bauqmingz hawj《Lajmbanj Saekgim》seganh vwnz- yozse, bihaenx, seganh daih’it geiz okbanj. Gyoengq seyenz vwnzyozse doenggvaq aen bingzdaiz neix, daezsang le gij suijbingz raiz faenz- cieng bonjfaenh, gij cozbinj vwnzyoz gyoengqde gonqlaeng youq gwnz《Sam Nyied Sam》《Vwnzyoz Nanzfangh》《Yougyangh Yizbau》《Bauqcaeux Baksaek》daengj bauqceij ganhvuz fatbiuj. Vwnzyozse laebbaenz le, haujlai vunzguhnaz dangdieg couh miz gij sibgvenq “doengxngoenz fwngz ndeu gaem hongnaz, doengx- haemh fwngz ndeu gaem gonjbit” lo, neix hawj gyoengqde menhmenh lizgyae gij fungheiq doj、doeg caeuq damdoz gwnndoet guhcaemz gwnz- biengz lo.

Bi 2013 ndwen 3, gicej《Gvangj- sih Daihneix》caijfangj bauqlwnh le Aen Vwnzyozse Vunzguhnaz Nazlauz, daj mwhhaenx hwnj, mingzdaeuz Aen Vwnzyozse Vunzguhnaz Nazlauz couh cienz doh ndaw gih rog gih, lij ndaej lingjdauj swcigih dangjveij senh- conzbu yawjnaek dem. Youq 《Gvangjsih Daihneix》Cazcise neix bangcoh lajde, bi 2014 ndwen 4, 《Gij Riz Youzlangh》cek sawcomz daih’it Vangz Civeij ndaej okbanj lo. Bihaenx, youq ndaw “vunzgyaep- loqsiengj yawjdoeg ceiq gyaeundei Gvangjsih” aen hozdung bingzsenj Gvangjsih Gih Dangjveij Senhconzbu banh haenx, de baenz 11 boux “vunzgyaeploqsiengj” ndawde boux ndeu, bi 2015 ndwen 4, ndaej byaij hwnj aen daizlingxciengj “vunz- gyaeploqsiengj yawjdoeg Gvangjsih” Gvangjsih Densidaiz. Bi 2015 ndwen 7, de gyahaeuj Aen Hezvei Cozgyah Gvangjsih, saedyienh aen loqsiengj bienqbaenz cozgyah.

Diuzroen byaij gvaqdaeuj, ginglig gvaq gak cungj haemzhoj gwnz diuz- roen vwnzyoz, aeundaej le baenz- goeng caeuq mingzdaeuz, Vangz Civeij naeuz aeu gyo’mbaiq giengiengz, gyo- mbaiq ndwenngoenz, gyo’mbaiq vah- coj——Sawcuengh.