Liuz fuyencangj bineix 45 bi, guh fuyencangj gaenq miz 5 bi lo, geij ngoenz neix de cingqging guh yencangj.

Hwnz ndeu, de laebdaeb guh 3 aen fangzhwnzloq. Aen daih’it loq raen swhgeij daenj yijyih gang liengj, aen daihngeih loq raen swhgeij youq gwnz ciengz hai danci, aen daihsam loq raen swhgeij caeuq dahnax laeng doiq laeng lohgangh ninz.

Haet daihngeih de baez ndiu, couh lwnh sam aen loq neix hawj mehyah de nyi, cam mehyah de gij loq neix dwg maz eiqsei. Mehyah de dingq le dinghdingh yawj de yaep ndeu, naeuz:“Loq raen daenj yijyih lij gang liengj, neix dwg doyawz; loq raen youq gwnz ciengz hai danci, neix dwg byaij haeuj lohgungz bae; loq raen caeuq dahnax caemh ninz, neix dwg mwngz doeng ngeix sae siengj.” Mehyah de gangj daengz neix, bwnda nyaeuqnyat dwk danqheiq naeuz:“Ai! Daj gij loq neix daeuj yawj, mwngz siengj guh yencangj hoj lai lo.”

Liuz fuyencangj baez dingq couh ngunh bae lo, mehyah de sikhaek dawz de bae yihyen ciengjgouq. Guh sat gak cungj genjcaz, hix caz mbouj ok dwg maz bingh. Ngoenz ndeu gvaqbae lo, Liuz fuyencangj lij caengz singj dauq, canghyw hix mbouj rox baenzlawz guh.

Gyanghaemh, yahdaiq dingq- naeuz lwggwiz bingh lo, youq mbouj baenz ninz mbouj onj. Haet laeng romhromh ganj daeuj yihyen yawj lwggwiz. Deq de rox lwggwiz vihmaz bingh seiz, fwt bongx mbaq lwggwiz mbat ndeu, angq dwk naeuz:“Loq ndei! ndei! Daenj yijyih caemh- caiq gang liengj dwg sueng baujyiemj; youq gwnz ciengz hai danci dwg mwngz ak gvaq vunz; caeuq daxnax laeng doiq laeng ninz, mwngz haet- haemh aeu fanndang.” Vah yahdaiq ngamq gangj sat, Liuz fuyencangj couh singj gvaqdaeuj lo.

Liuz fuyencangj baez singj, raen yahdaiq riunyumnyum coh de, sawq- mwh “ho ho” sing hung riu 3 baez, bingh sikhaek ndei, gaenlaeng couh ok yihyen maranz lo. Mbouj geij nanz, Liuz fuyencangj caen habhoz dwk ndaej guh yencangj dahraix. 5 bi neix daeuj, gij saedceij ranz Liuz yencangj gvaq ndaej diemzswdswd.

Seizneix cingq dwg gij seizgeiz vuenhgaiq youqgaenj. Hwnz ndeu, Liuz yencangj youh laebdaeb guh 3 aen fangzhwnzloq, gij loq neix caeuq gij loq 5 bi gonq doxdoengz, mbouj ca saekdi.

Haetromh baez ndiu, Liuz yen- cangj lwnh gij saeh neix hawj mehyah de nyi, mehyah de baez dingq, gikdoengh dwk got bouxgvan ndaetrad, youq goekrwz bouxgvan gangjsebseb:“5 bi gonq daxmeh gou naeuz gij loq neix dwg loq ndei, caen dahraix. Mwngz laebdaeb guh yencangj miz muengh lo!” Seizneix Liuz yencangj yiet ninz youq gwnzmbonq, song da cim coh denhvahbanj ngeixngwdngwd, cij riunyumj mbouj ok sing.

Mehyah de vuenheij dangqmaz, baez hwnqmbonq couh dwk denva lwnh gij saeh neix hawj daxmeh de nyi. Hoeng, daxmeh de mbouj gangj saek coenz vah, cij danqheiq, de lix ndaej nanz, bungq saeh ndaej lai, de rox gwnzbiengz saehndei mbouj miz mbat moq.

Mbouj geij nanz, Liuz yencangj mboujdan mbouj ndaej lienznyaemh guh yencangj, lij deng songgvi lo.

Loq