Mbanjmungz miz canghsuenq- mingh ndeu, de gag haenh bonjfaenh dwg “saenzsien roengz lajbiengz”, ndaej rox gij saeh doenghbaez caeuq daengzcog, dauqcawq yaeuh vunz aeu ngaenz.

Miz baez ndeu, ndaw mbanj meh Daeghaij loq raen miz caeg haeuj ranz caeg doxgaiq, caemhcaiq gaj lan de dai bae. Meh Daeghaij roxnyinh mbouj gitleih, couh bae ra canghsuenqmingh. Canghsuenqmingh rox meh Daeghaij miz di ngaenz, couh gyajcang doeksaet luenh naeuz:“Aeya! Mbouj ndei lo.” Meh Daeghaij sawqmwh naj heu caez, cam de vihmaz mbouj ndei. Canghsuenqmingh naeuz:“Mbouj mauhgvaq 3 ngoenz, ranz mwngz yaek saetcaiz, baihdoengnamz miz caeg daeuj caeg huq mwngz.” Meh Daeg- haij dingq le, lumj deng byajbag nei ndang saenzdwddwd, gag naemj: Suenq ndaej caen lingz ha, caeuq gij loq gou doxdoengz. Meh Daeghaij couh gouz canghsuenqmingh bang de siu caihux. Canghsuenqmingh ngeix yaep ndeu le, naeuz:“Bang mwngz gou mbouj lau haemzhoj, gou ndaej bae gouz bing gwnzmbwn daeuj gaemh vunzyak, couh ndaej siu cainanh mwngz bae. Mboujgvaq, mwngz aeu ok di ngaenz hawj gou bae cawx di yieng caeuq ceijcienz.” Meh Daeghaij baez dingq couh dawz 10 maenz ngaenz hawj canghsuenqmingh.

Meh Daeghaij maranz le, couh lwnh gij saeh neix hawj Daeghaij nyi. Daeghaij mbouj mizsin, roxnyinh daxmeh deng canghsuenqmingh yaeuh lo, ndawsim gag maeuz hwnjdaeuj.

Gvaq le 3 ngoenz, canghsuenq- mingh daeuj ranz Daeghaij, doiq meh Daeghaij naeuz:“Caeklaiq gou heuh bing gwnzmbwn daeuj gaemh vunz- yak bae gaj, ranz mwngz cijndaej bingzan fouz saeh, mwngz aeu docih bing gwnzmbwn.” Baenzneix, cangh- suenqmingh youh yaeuh meh Daeghaij aeu bae 20 maenz ngaenz.

Ngoenz daihngeih, daeglwg canghsuenqmingh ngamq rim bi baenzbingh, mehyah de mbouj youq ranz, canghsuenqmingh couh umj daeglwg de bae yihyen ndaw singz yw. Ndaw mbanj seizhaenx caengz doengci, liz ndaw singz miz 8 goeng- leix gyae, gij loh youh gumxgumx gamxgamx, baeg dwk de ndang naiq ga naet caez, byaij geij yamq couh dingz roengzdaeuj yietnaiq. Liz ndaw singz lij miz 2 goengleix, daengz diuz lohnga he, miz mehmbwk oiq he gyaep hwnj, gangj de bae ranz daxmeh de youq ndaw singz, boux vunz he lau, siengj caeuq canghsuenqmingh caemh loh byaij, ndigah song boux doq byaij doq gangjgoj. Canghsuenqmingh gangj de umj lwg bae yihyen ndaw singz yw bingh.

Mehmbwk neix raen cangh- suenqmingh umj lwg gig dwgrengz, couh naeuz:“Godaih, neix dwg lwg mwngz ba! Yawj mwngz baenzneix baeg, gou bang mwngz umj lwg yaep he.” Canghsuenqmingh lumj doenghgo raen fwncin nei, doq docih mehmbwk neix, doq dawz lwg hawj mehmbwk neix bang umj, song boux laebdaeb byaij. Yaep ndeu, mehmbwk neix youh naeuz:“Godaih, seizneix hwngq lai, mwngz ga naiq byaij ndaej menh, lwgnyez souh mbouj ndaej, gou umj de byaij gonq, youq bakdou aen diemq- gaibaengz ndaw singz caj mwngz.” Canghsuenqmingh raen naj daeglwg rim hanh caez, couh dapwngq lo.

Mehmbwk neix daeuj daengz aen diemqgaibaengz, couh genj gij baengz gwnz gyaq hab’eiq, heuh bouxgai- baengz rau 5 ciengh, suenq ngaenz bae 35 maenz. Mehmbwk doiq boux- gaibaengz naeuz:“Gij baengz neix dwg cawx hawj daxmeh gou, de seizneix baenzbingh youq ranz, gou dawz baengz bae hawj de yawj hab mbouj hab gonq, cingj mwngz bang gou ngonz laeq lwgnyez neix.” Bouxgaibaengz siengj, miz laeq lwgnyez neix youq, lij lau de buet ha, couh naeuz:“Mwngz vaiq bae vaiq dauq ciengeiz gaej hawj gij baengz neix uq le youh mbouj cawx.” Baenzneix, mehmbwk neix ce lwgnyez canghsuenqmingh roengz couh dawz baengz byaij deuz lo.

Caiq gangj canghsuenqmingh byaij daengz bakdou diemqgaibaengz seiz, raen daeglwg swhgeij naengh youq henz bouxgaibaengz, mehmbwk haenx gaenq mbouj raen, de byaij gvaqbae umj daeglwg yaek byaij. Bouxgaibaengz baez raen, couh gaem fwngz canghsuenqmingh naeuz:“Vei! Ngaenz baengz mwngz caengz hawj gou, couh siengj umj lwgnyez bae?” Canghsuenqmingh deng loengh ndaej geizheih, couh cam:“Gij ngaenz baengz? Gou youh mbouj cawx baengz mwngz gvaq.” Bouxgaibaengz han naeuz:“Gij baengz haenx dwg mehyah mwngz aeu bae, de cuengq lwgnyez youq gizneix hawj gou bang ngonz.” Canghsuenqmingh youh caj yaep he mbouj raen mehmbwk haenx dauq, gig simgaenj, lau nguh gij bingh lwg, yw mbouj ndaej gib, couh dawz ngaenz okdaeuj hawj ngaenz baengz, umj lwg doq ganj bae yihyen.

Canghsuenqmingh umj lwgnyez byaij daengz gwnz gai seiz, Daeghaij byaij daengz baihnaj de naeuz:“Godaih, mwngz rox suenqmingh baenzlawz suenq mbouj ok ngoenzneix rox deng vunz yaeuh ne? Gaeu bae 30 maenz ngaenz mwngz yaeuh daxmeh gou, seizneix gou boiz hawj mwngz 5 maenz.” Canghsuenqmingh gaem 5 maenz ngaenz youq gyangfwngz, hauj- lai nanz gangj mbouj ok saek coenz vah.

Yenzlaiz, mehmbwk oiq haenx dwg dahlan meh Daeghaij. Daeghaij caeuq de siengj ok aen fap neix daeuj hawj canghsuenqmingh deng hit.