Vwnzva nyenz dwg vwnzva Bouxcuengh aen bouhfaenh gyoeb- baenz youqgaenj ndeu. Gij beix- nuengx Bouxcuengh ranghdieg song hamq Dahraemxhoengz, ca mbouj geijlai mbanjmbanj miz nyenz, gvaq cieng gvaq ciet, saehhoengz saehbieg, ranzranz cungj roq nyenz, biujdap gij cingz angqyangz roxnaeuz siengsim haenx, gij mbanj song hamq Dah- raemxhoengz baenzneix couh baenz le ranghdieg cwkcaem naekna yisuz vwnzva nyenz Bouxcuengh. Bi 2006 ndwen 5, fungsug nyenz Bouxcuengh ginggvaq Gozvuyen baecinj ndaej lied haeuj buek daih’it guekgya gaep feihvuzciz vwnzva yizcanj mingzloeg.

Nyenz caemh heuhguh gyong- doengz、nyienz. Guengjsae dwg gij dieg youqgaenj ciuhgeq cauhguh caeuq sawjyungh nyenz ndawde aen ndeu, vunzcoj Bouxcuengh “Buz- vunz” dwg boux caeuqguh nem boux sawjyungh ceiq caeux haenx, daengz seizneix gaenq miz 2700 lai bi lizsij. Youq ndawsim beixnuengx Boux- cuengh raeuz, nyenz dwg siengcwngh saenz, aende ndaej nemhawj le rengzsaenz. Gvaqlaeng nyenz saetbae gij goengnaengz siengcwngh gienzlig le ma daengz ndaw gyang vunzlai, daengz seizneix lij youq ndawbiengz sawjyungh, dwg beixnuengx Boux- cuengh Guengjsae raeuz gij fungsug sibgvenq gvaq ndwencieng caeuq ndwensam cosam daengj ngoenzcit angqhoh hozdung ndawde noix mbouj ndaej ndeu, baenz le cungj vwnzva lemqce minghhoengh yinxvunz ndeu. Vwnzva nyenz riuzcienz seizgan nanz、ranghdieg gvangqlangh、yingjyangj laeglwd, gwnzbiengz noix raen.

Aennyenz dwg aeu doengz caeuqguh, iqhung mbouj doxdoengz, aen ceiq hung ciggingq baenz 100 lizmij doxhwnj, aen ceiq iq ciggingq ngamq cib lingz lizmij, aennaek geijcib gaen daengz geij bak gaen cungj miz, yiengh aennyenz naek- caem, guh ndaej gyaqciq, baenzaen itbuen faen najnyenz、hwetnyenz、aeknyenz caeuq ga’nyenz seiq bouhfaenh. Gyangsim najnyenz cungj miz deudoed riz gvaengzrongh daengngoenz; henzbien nyenz caeuq miz duzgoep、bouxgwihmax、vaiz rag benjnod daengj gij dajcang baenzaen; ndangnyenz miz duznon、duzbya、gova、aenleij daengj deudoed hop- humx, lai cungj lai yiengh, gij doz neix cungj dwg youq gwnz vunq gaekdeu roxnaeuz atyaenq gisuz guh baenz, yungh cungj banhfap deudoed saeqnaeh, siengqveh lumjliq gienj- giet, sienqdiuz rengzrwd, biujyienh ok gij dinfwngz akraeuh boux- caeuqguh. Gij aennyenz yiengh Bwzliuz、yiengh Lingzsanh、yiengh Lwngjsuijcungh goengcoj Boux- cuengh raeuz caeuqguh haenx, ndaej cwngguh “gij daibyauj mboengq ceiq sang yisuz aennyenz”. Baenzneix ndaej rox, aennyenz nangq daengz le lienhgvang、caeuqguh、singhag、lizsij、yisuz nem gij gohgisij、gaujgujyoz、minzcuzyoz、yinzleiyoz daengj caeuq de doxgven haenx, gig miz gijdij vwnzva youqgaenj.

Aennyenz dingzlai dwg dangguh aen yozgi cujyau ndaw yozdui daeuj sawjyungh, baez roq sing gyong gokgug caemhcaiq miz cietbek. Fouxnyenz yienghdoengh ciuq hingz- sik de miz baenz roek caet cungj, ndawde foux vunzlai dwg cungj yienghdoih mbauqsau humx baenz gienluenz, caemh miz yiengh buenq- luenz、yiengh baizvang、yiengh baizdaengj、camca doiqdiuq、yiengh seiqfueng daengj; yamqdin diuqfoux onjwt rengzrwd, yienghfoux cocat lingzvued, gijdoengh fukdoh hung, gijcingz naekgywg; mwh diuq daengz seiz ceiq angq bouxroqgyong lij buenx hemq gij sing angqyangz gikdoengh haenx, gijcingz hwnj- roengz fubfab, ciengzmienh hoengh- hwd gamjdoengh vunz. Dunghlanz Yen Aidung、Cangzloz Yangh rangh- dieg neix beixnuengx Bouxcuengh moix bi ndwencieng coit、cibngux、samcib geij ngoenz neix cungj banh cietnyenz ngoenzciet cienzdoengj hoenghhwd neix, gyoengq daegmbauq gak aen mbanj gapdoih ram nyenz hwnj dingjbya bae, nyenz hung doiq nyenz hung, nyenz iq doiq nyenz iq, doxdax roq nyenz baenz geij ngoenz geij hwnz, doengzseiz mbauqsau caemh ra doih doiq fwen, sing nyenz sing fwen youq luegrungh gwnz bya haprwenz, nauhyied dangqmaz.

Vwnzva nyenz gaenq baenz gij hauhbiu ranghdieg Dahraemxhoengz gak minzcuz doxgiet doxnyinh haenx. Song cien lai bi daeuj, vwnzva nyenz aeu vwnzva ndaemnaz guh goek, aeu gij fuengsik caemh maj caemh hoengh, doxhuz cix mbouj doxdoengz haenx baenz le aen dozdaeh gak minzcuz vwnzva doxbaedauq rangh- dieg Dahraemxhoengz, habngamj gij yaekaeu cingsaenz vwnzmingz vunzlai gak cuz.