Vangz Sauzsen, vunz Boux- cuengh, bi 1976 youq Mbanjfungliz Vangzyauz Cin Cauhbingz Yen Hocouh Si okseng, seizneix dwg cwnghez veijyenz Cauhbingz Yen, yinzda daibyauj Hocouh Si. Bi 2013 de daj Guengjdoeng dauqma mbanj- ranz cauhnieb, cauhbanh Guengjsae Ginhhaij Yozgi Youjhan Gunghswh vanzlij dang boux cungjginghlij aen gunghswh neix dem, seizneix youq Cauhbingz yienhsingz gaenq miz song aen cangj gyagoeng, bingzyaenz moix bi guh gizdah、youzgwzlijlij 23 fanh lai aen, doenghgij huq neix gai bae daengz Ouh Meij、Dunghnanzya daengj 20 lai aen guekgya, moix bi bingzyaenz souhaeuj miz 2100 lai fanh maenz, hawj 90 lai boux vunz lajmbanj dangdieg mbouj miz hong guh haenx youq dangdieg couhnieb vut gungz baenz miz. Aenvih guh ndaej ndei, bi 2015 Vangz Sauzsen ndaej Gozvuyen Nungzminzgungh Gunghcoz Lingjdauj Siujcuj bingz baenz “Boux Nungzminzgungh Maenhndei Daengx Guek”.

Haenqrengz lienh din- fwngz, daj canghcangboiq baez yamq baez yamq guh daengz cangjcangj

Vangz Sauzsen youq ranz guhnaz Bouxcuengh Mbanjfungliz Vangzyauz Cin ndeu okseng, bi 1995 seizcou, daxboh aenvih binghnaek dai bae, youq seiz daxmeh ndangnyieg caeuq daegnuengx dahnuengx nienzoiq doiq coglaeng roxnyinh moenghmangh mbouj rox baenzlawz guh, Vangz Sauzsen dangguh lwgdaeuz ndaw ranz, de hwnjroen bae daengz Cuhsanhgoz dajgoeng, raphwnj mbaqrapnaek ciengx ranz, mwhhaenx de cuhcungh lij caengz bizyez, gangj Vahbujdungh lij cab miz Vahcuengh.

Youq ndaw Guengjdoeng Vaz- swngh Yozgi Youjhan Gunghswh Cauging Si, Vangz Sauzsen bienq- baenz bouxcangboiq ndawde boux ndeu. Haenx dwg de baez daih’it roxyiuj gizdah, doiq gij hong saeq lumj siuqva nei, de ngamq hainduj caen dwg mbouj rox baenzlawz roengz fwngz, yienghneix de deihdeih daengq bonjfaenh: Ciengeiz aeu nyinhcaen caiq nyinhcaen. “Mwhhaenx aen gizdah ndeu aeu gai 200 lai maenz ngaenz, gij cienzhong bonjfaenh cij 800 lai maenz, daegnuengx dahnuengx ndaw ranz lij caj gou geiq cienz bae gyau cienzhag ne, danghnaeuz guh loeng deng gyaepdeuz baenzlawz guh?” Vangz Sauzsen naeuz. Cauxguh aen gizdah ndeu aeu ginggvaq yenzcailiu hailiuh、gij gaenz aen gizdah、habdoengz、yaemliengz dinghvih、youzcaet、cangboiq daengj 200 lai diuz gunghsi. Siengjdaengz gij maqmuengh daxmeh ndaw ranz、gij ingbaengh daegnuengx dahnuengx, Vangz Sauzsen haenqrengz hag caeuq muzlienh dinfwngz, ginggvaq mbouj- duenh vuenh gangjvei、sugrox moix diuz gunghsi cauxguh, haeuj cangj 4 bi le, Vangz Sauzsen daj boux mbouj sug hangz mbouj miz saekdi giekdaej ndeu bienqbaenz boux “roxcaez” gij dinfwngz cauxguh gizdah, hix daj bouxcangboiq bingzciengz ndeu swng- hwnj daengz cujyin cehgenh.

Bi 2000, Guengjdoeng Bozdauh Yozgi Gunghswh ok cienzhong sang “vat” Vangz Sauzsen bae. Madaengz aen gunghswh moq, Vangz Sauzsen mbouj dwg sikhaek dang boux cangjcangj aen cangj yozgi ndaw habdoengz iekdingh haenx, cix dwg daezok daj cawjguenj aen bumwnz cangboiq guh hwnj gonq. Guh cawjguenj le, Vangz Sauzsen daiqlingx daihgya dauqcungz cingjleix aen cang yo gij yozgi gaenq guhbaenz haenx vanzlij daenghgeiq guhbaenz cek saw, guh cingcinj guenjleix, daj neix hwnj, aen bumwnz cangboiq dangguh aen bumwnz haedsim aen cangj yozgi neix ciuq gvigawj guh saehcingz, caezcingj miz diuzleix, bouxboux cungj ndaej fatok gij cozyung bonjfaenh, yauqik ngoenz ndei gvaq ngoenz. 3 ndwen gvaqlaeng, Vangz Sauzsen dang boux cujyin aen cehgenh, byongh bi gvaqlaeng, cingqsik dang cangjcangj aen cangj yozgi, cienzmienh guenjleix gij hong cauxguh gizdahdienh caeuq gizdahfaex gunghswh.

Dauqma mbanjranz hai- banh aen cangj yozgi, cingj yungh ranzgungzhoj dangdieg gonq

Ginggvaq lai bi haenqrengz buekguh, Vangz Sauzsen caeux couh youq diegrog baenzranz laebnieb, gvaqhwnj ndwenngoenz fouqmiz, hoeng de cix mbouj aenvih yienghneix roxnyinh habhoz, bi 2013, daiq gij gingniemh caeuq dinfwngz youq diegrog haenqrengz buekguh 18 bi cwkrom ndaej haenx, de daiq yah lwg dauqma mbanjranz, youq gunghyezgih baihbaek Cauhbingz Yen douzcienz 60 lai fanh maenz haibanh le “aen gunghcangj loqsiengj” yozgi (Hocouh Si Ginhhaij Yozgi Youjhan Gunghswh) bonjfaenh. Banh gunghcangj cauhnieb mbouj dwg lumj siengj nei baenzneix ngaih, couzrom cienzngaenz、cwng dieg senj ranz、daphwnq ranzcangj、son’gyauq yenzgungh……Moix gienh saeh cungj hawj Vangz Sauzsen yungh bae haujlai goengrengz, hoeng ceiq hawj de in’dot haenx dwg vunzlai mbouj lijgaij, mbangj beixnuengx baengzyoux nyinhnaeuz Vangz Sauz- sen miz cienz lai、gvanghyungz dauqma mbanjranz, bonjfaenh hix wnggai miznaj doxcaez souhyungh, iugouz mbouj ndaej rimhoz couh ok simyak, hix miz vunz doiq Vangz Sauzsen douzcienz haibanh gungh- cangj haeksat gangjvang gangjiemq, naeuz lwg dajgoeng lajmbanj cunghyoz caengz bizyez ndeu yaek hai gunghswh dwg siengj ndwi. Doiq doenghgij vahbemx neix, Vangz Sauzsen mbouj dawz haeuj rwz, yunghsim siengj banhfap couzrom cienzngaenz banh gunghcangj. Goengmbwn mbouj vei boux miz sim, bi 2013 ndwen 7, aen gizdah daih’it aen gunghswh Vangz Sauzsen cauhguh haenx youq Cauh- bingz Yen okseiq lo.

Ngamq hainduj, aen gunghswh de bi ndeu guh 2 fanh aen gizdah, souhaeuj ca douzhaeuj gig lai, ndigah de couh doiq huq guh dinfwngz gaijmoq, cawxhaeuj faexraeu Gyah- nazda caeuq faexgomak、faexdinbit bonjdieg daengj faex ndei, caux ok baenzdauq huq ndei. Seizneix, aen gunghswh Vangz Sauzsen moix bi guh gizdah、youzgwzlijlij 23 fanh lai aen, moix bi bingzyaenz souhaeuj 2100 lai fanh maenz, ndaej daengz gyoengq bouxhek ndaw guek rog guek maij.

Youq mwh ciugoeng, Vangz Sauzsen cungj dwg siengjdaengz gij vunz dangdieg youq Guengjdoeng dajgoeng、ndaw ranz miz vunzgeq lwgnyez dawzranz haenx gonq, caemhcaiq cungdenj ngeixnaemj ranzgungzhoj dangdieg. Liu Sanyi boux doengzmbanj Bouxcuengh ndaej 40 lai bi neix ciengzgeiz youq rog dajgoeng, ndaw ranz miz bouxgeq lwgnyez, vunzgeq lwgnyez cungj youq ranzcoj mbouj miz vunz goq. Bi’gvaq codaeuz, Liu Sanyi dauqma ranz gvaq sam nyied sam, Vangz Sauzsen couh bae ra de, cingj de louz roengzdaeuj youq ndaw gunghswh bonjfaenh guh hong, seizneix, Liu Sanyi mboujdan moix ndwen canh ndaej cienzhong 3200 lai maenz, vanzlij ndaej swnh gyawj ciuqgoq vunz ndaw ranz. Boux doengzmbanj Vangz Meijhungz bineix 50 lai bi, ndaw ranz vunz lai reih noix, ndwenngoenz gvaq ndaej gig hoj, daj seiz bae daengz Ginhhaij Gunghswh guh hong le, moix ndwen souhaeuj 3000 lai maenz doxhwnj, ndwen- ngoenz miz baujcang lo.

Swnjcienz Vahcuengh daj bonjfaenh guh hwnj, roengz- rengz coi lwgnyez hag vahcoj

Dauqma daengz mbanjranz Vangz Sauzsen cij fwt raen, okbae cauhnieb lai bi, yienznaeuz suenq ndaej hwnj dwg gvanghyungz dauqma, hoeng mboujdan lwg yah mbouj rox gangj Vahcuengh, bonjfaenh hix gangj mbouj baenz geijlai lo. Ndigah, youq gyaeujmbanj byaihongh、ndaw reih gyang naz、gwnz daizlaeuj, de dauq hag Vahcuengh moq, lij gig haeujsim baujhoh、swnjcienz caeuq yungh Vahcuengh Sawcuengh dem. De nyinhnaeuz, riengz gij cincwngz cwngzcinva、gozciva gyavaiq caeuq aen minzcuz mbouj doengz doxaeu、doiq rog lienzhaeh gyalai, danghnaeuz mbouj guh baujhoh、sonyinx, swnj- cienz Vahcuengh Sawcuengh couh yaek bungz hojnanz. Saw vah aen minzcuz ndeu dwg gij dungxcaiz gietsig geij cien bi aen minzcuz neix, danghnaeuz aen minzcuz ndeu saetbae gij vwnzva de, neix couhdwg naeuz aen minzcuz neix saetbae goekrag lo. Ndigah, Vangz Sauzsen couh dingh aen muzbyauh ndeu hawj bonjfaenh: Youq lwgnyez bae doegsaw gaxgonq aeu son de hag rox vahcoj mbanjranz gonq. Riengz bi’ndwen gyalai, de yied daeuj yied roxnyinh lumz mbouj ndaej vahmbanj, seizneix moix baez dauqma ranzcoj, de cungj caeuq gyoengq vunzmbanj gangj Vahcuengh、eu Fwencuengh.

Vangz Sauzsen nyinhnaeuz, gij fwen ciuhgeq dwg gij hemqheuh ban vunz cojcoeng Bouxcuengh youq ndaw ndwenngoenz hwnj bya roengz naz, de sengmaj ok le gij fwen Bouxcuengh. “Danghnaeuz dan eu fwen cungj raen mbouj miz yinx geijlai, mbouj ndaej gij aeuyungh lai yiengh bouxcoz daihneix naemj dingq、naemj yawj haenx ndaej habhoz, gou cingq gaenxmaenx damqcaz aeu gizdah boiq yaem’wenq yungzhaeuj ndaw yienj- ciengq fwen Bouxcuengh bae.” Vangz Sauzsen naeuz.