101. Dangh cienz dingj ndaej mingh, vuengzdaeq gyaeu cien bi.

102. Meuz hix miz ngoenz raeuj, bit hix miz ngoenz nit.

103. Vunzlai doxgiet baenz gang, beixnuengx mbouj huz baenz ceij.

104. Rangz raez sang baenz cuk, raemx lae gyae baenz dah.

105. Vunzgvai mizseiz hix saetsuenq.

106. Mbwn cingx vih rumz, mbwn bumz vih fwn.

107. Duzbaeu ciengxlwenx mbouj rox byaij soh.

108. Va rang yinx rwi lienh, noh haeu ciu nyaen daeuj.

109. Roeglaej gwn raemx daemz mbouj hawq, nengznyaen haeb ve vaiz mbouj in.

110. Goemq ndaej bak boemh, fung mbouj ndaej bak vunz.

111. Yiet lai mboujyawx menh byaij.

112. Ronggya hen faexcuk, mehyah hen bouxgvan.

113. Son vaiz rox roengz naz, son lwg youq seiziq.

114. Vunz gungz ok roet mbouj rang.

115. Naeng dap noh cij baenz gaiq, gvai dap ngawz cij baenzgya.

116. Danggya cij rox fwnz haeux bengz, ciengx lwg cij rox bohmeh ndei.

117. Nou haeb nou couh raeg, caeg dwk caeg cij dai.

118. Seng lwg ndang meh in, ciengx lwg boh dwgrengz.

119. Mbouj byaij sam yamq laep, nyienh byaij caet yamq rongh.

120. Vunzsai fouz geiq, seiq nyied coih ranz; vunzbaz fouz geiq, daihhanz

doz faiq.

121. Mbwn cingx mbouj dak goek, fwn doek ndaq mbwn doeg.

122. Vunz lai rengz couh hung, ma lai haeb yiengz dai.

123. Cib aen seng’eiq, mbouj beij ndaemnaz.

124. Ndaemnaz mbouj daengz haenz, haeuxgwn mbouj daengz cieng.

125. Aenq dungx gwn haeux, aenq ndang dawzrap.

126. Boh dai fai lak, meh dai caiz sat.

127. Gvaq raemx yawj boux gonq.

128. Rieng nou baenz baez foeg mbouj hung.

129. Raen lai cij gvai, guh lai cij rox.

130. Congz lungz mboujyawx rungz ma raeuj.

131. Samcib mbouj sang dwg vunz daemq, seiqcib mbouj fouq dwg vunz gungz.

132. Yawj byaek gwn haeux, dag ndang caiz buh.

133. Gek hangz lumj gek bya.

134. Ndaw bya faex gyoeng noix, faex saed lai.

135. Goemq vaih cib fan denz, mbouj rox aen sim gvan.

136. Gyaeuj congz miz daeuj haeux, dai le miz vunz dam; gyaeuj congz miz aeuq

haeux, dai le miz vunz daej.

137. Ngauz va ngauz doenj, son vunz son sim.

138. Yo saw hingz gvaq yo gim.

139. Doxnyingz mbouj in naq, doxndaq mbouj louz vah.

140. Sam nyied gaej doxgauq, seiq nyied gaej coux bawx.

141. Cek ranz dauq hwnj ranz, nanz ndaej deq moegliuh.

142. Gwn ndaej louz ngoenzcog, hong gaej deq ngoenzlaeng.

143. Youq gizlawz raemj fwnz, youq gizlawz aeu gaeu.

144. Rwi mbouj ciuz va doek namh, roeg mbouj ndwn gwnz nam.

145. Mauh ndei mboujyawx liengj rwix.

146. Cib boux doxyaeng mboujyawx boux he rox suenq.

147. Cib boux rox gwn mboujyawx boux he rox gangj, cib boux rox gangj

mboujyawx boux he raen ndaej gvangq.

148. Byawz dingq gij vah mehsien, ranz lienz vunz cungj loemqlak.

149. Giuz vanz giuz, roen vanz roen.

150. Mwngz guh ndaej coit, gou guh ndaej cibngux.

（caengz sat）