“Vaiq, hai caen vaiq, lumj dwg beij diegcoj gou lij vaiq bw!” Gwnz lezceh, dahsau doiq daegmbauq naengh youq henz ndang de gangj, gyaeuj de hix nyengq coh mbaq daegmbauq, song faj fwngz gaenjndaet got maenh gen daegmbauq. Faj fwngz daegmbauq ndeu got dahsau neix, faj fwngz wnq mbaeu mbengq bek laengfwngz dahsau, gangj:“Gij gisuz gauhdez Cungguek youq gwnz seiqgyaiq cungj mizmingz, dwg mbouj dwg youh vaiq youh maenh?” “Dwg ha!” Dahsau neix dap ndaej gig vaiq, hoeng de cix aenvih yaek daengz camh lo, yied daeuj yied youheiq, neix dwg de baez daih’it daeuj gizneix, caeuq bouxyoux de caez daeuj. Daegmbauq dwg boux vunz sijsaeq ndeu, de rox dahsau neix you maz, hoeng de hix mbouj rox baenzlawz bae nai, gizsaed de hix you.

Con gvaq ndoi hung bya daemq, gij faex heu baihrog menhmenh deng gij naz lawh, hix okyienh geij gan ranz caeuq geij boux vunz, lezceh hai haeuj diegbingz, baihnaj aiq couhdwg cehcan luba. Lezceh lumj bikmax nei vaiq, daengz camh lo. Song bouxcoz dauq ranz lumj dwk naq nei, daengz camh roengz lezceh, mboujguenj vunz lai rumz nit, heuhci coh ranzmbanj daegmbauq bae lo.

Song boux dawz haujlai doxgaiq dauq. Baez daengz dou ranz daeg- mbauq, goeng daegmbauq, bouxlaux cij miz aen rwz hoeng ndang lij cangq ndeu okdaeuj coux gyoengqde. Dahsau neix doq doiq goeng daegmbauq gungj hwet riunyumj. Goeng daeg- mbauq raen dahsau neix baenzneix roxsoq, ndawsim de gig angq, doiq daegmbauq naeuz:“Lan gou da raeh, lingx ndaej bouxyoux ndei dauqma yawj gou!” Daegmbauq riu dap:“Dwg ha, goeng, dou dauqdaeuj caeuq mwngz gvaqcieng.”Goeng daegmbauq dingqnyi gig angq, naeuz:“Ndei! Ndei! Ndei! Neix mwngz youq denva caeux couh gangj gvaq lo. Mwngz bae baihgyae guh hong, mbouj dauq ranz gvaqcieng hix miz 3 bi lo! Baihrog nit, sou vaiq haeujdaeuj!” Sam vunz couh haeuj ranz lo.

Ranz daegmbauq bonjlaiz couh miz goenglan 2 boux ndwi, bohmeh daegmbauq youq de lij iq couh dai lo, dwg goeng ciengx hung de. Seizneix daegmbauq daiq bouxyoux dauq, goeng daegmbauq roxnyinh ndaw ranz rox nauhyied di, hoeng saedsaeh cix dauqbyonj. De ndingq caz hawj dahsau neix, dahsau neix cij riu mbouj gangj. Hainduj goeng daegmbauq roxnyinh dahsau neix miz di lau- nyaenq, hoeng gvaq le geij ngoenz dahsau neix lij dwg baenzneix, hawj goeng daegmbauq miz di sienrox mbouj ndei.

Gvaqcieng haemhhaenx nda caeuzndaep ndei, goeng daegmbauq simhoengz dwk nip byaeknoh hawj dahsau neix, dahsau neix lijdwg cij riunyumnyum mbouj gangj saek gawq vah. Gwn sat, goeng daegmbauq rag daegmbauq daengz rug laeglemx cam:“Lan a, mwngz gangj bouxyoux mwngz dwg mbouj dwg bouxngoemx, baenz- lawz cungj mbouj gangj coenz vah lawz ne?” Song bouxcoz ngoenzcog couh aeu dauqbae guh hong lo, goeng daegmbauq siengj cam ndaej mingz- beg.

Daegmbauq rox caiq mbouj ndaej muenz roengzbae lo, geij ngoenz neix de caeuq bouxyoux de hix lau, lau deng goeng de rox le couh mbouj doengzeiq songde doxaeu, hoeng yied muenz yied lau. Seizneix gangj ok daeuj hix dwg saeh ndei. Daegmbauq menh gangj:“Daxgoeng, gou gangj okdaeuj, mwngz gaej hozgaek. Gou gaxgonq dwg youq aen gunghswh guh hong, doeklaeng gunghswh anbaiz gou bae Yizbwnj, youq gizhaenx gou roxnaj le dahsau neix……” Goeng daegmbauq baez dingqnyi “Yizbwnj” couh anj lo, mbouj rox han maz.

Yenzlaiz gaxgonq goeng daeg- mbauq lij coz seiz, Yizbwnj daeuj hangzciemq guek raeuz. Guekgya miz nanh, bouxboux bae gouq, vunzvunz okrengz, goeng daegmbauq couh bae dangbing, gaen Cunghgoz gungcanj- dangj daj Guengjsae hoenx daengz baihbaek. Miz baez he hoenxciengq, rwz de deng bing Yizbwnj nyingz roengz, ndigah seizneix de cij miz aen rwz he ndwi. Ciuhvunz neix de ceiq haemz Yizbwnj, daegmbauq iq seiz couh dingq goeng de gangj bing Yizbwnj baenzlawz vaih. Hoeng dahsau neix, bouxyoux de, cix dwg vunz Yizbwnj, ndigah mbouj rox gangj Vahcungguek, caeuq goeng daeg- mbauq doxyouq cij rox riu.

Haemhhaenx, song boux goeng- lan doeklaeng maz hix mbouj gangj lo, gag caemrwd bae ninz, hoeng songde baenzlawz hix ninz mbouj ndaek.

Ngoenz daihngeih, song bouxcoz sousib buhvaq yaek lizbae seiz, goeng daegmbauq fwd ndwn youq henz gyoengqde, hix mbouj gangj vah. Dahsau neix gungj hwet le aeu Yizyij gangj coenz vah he. Goeng daegmbauq yienznaeuz mbouj rox, hoeng han:“Ndaejhoengq sou song boux itdingh aeu caiq dauq yawj bouxlaux gou bw! Gaej lumz lubw, sou song boux!”