Daj gou doegsaw hwnj, gou miz haujlai aen daehsaw gvaq.

Aen daehsaw daih’it dwg gou haeuj yozcenzbanh daxboh cawx ma. Seizde, gou ngaejrwd daemqdet, hoeng aen daehsaw gou hunghwt, aemq hwnj mbaq bae, daz daengz giujdin gou bae. Gou baez byaij loh, aen daehsaw bibaebbaeb youq baihlaeng gou hwnj- hwnj roengzroengz. Moix baez gou aemq aen daehsaw neix bae hagdangz, doengzhag cungj riu gou, gyoengqde ceng aeu daehsaw gou bae dang giuz dik. Gou ndang iq mbouj miz rengz, ndigah ceng mbouj gvaq gyoengqde, daehsaw gou deng dik bae dik dauq uq dangqmaz. Aen yozgiz ndeu gvaqbae, aen daehsaw gou couh deng dik dwk mbouj baenz yiengh lo.

Miz baez ndeu, daxmeh yaek yawj cozyez gou sij ndaej liux caengz, fwngz baez iet haeuj ndaw daehsaw gou bae, lumh deng maz unqnumq haeuhwt, de doeksaet dwk diuq hwnjdaeuj. Baez yawj yenzlaiz dwg geij aen maenz naeuh, mbouj rox seizlawz deng vunz oet haeuj ndaw daehsaw gou. Doeklaeng daxmeh gou bae hagdangz ra lauxsae gangj gij saeh neix, lauxsae hwnjdangz seiz naeuz caezgya youq aen ban ndeu doegsaw dwg cungj yienzfaenh, wnggai lumj beixnuengx nei doxgyaez doxhuz, mbatneix le couh mbouj miz byawz caiq daeuj loengh daehsaw gou lo.

Hoeng, daengz yozgiz daihngeih, aen daehsaw hung gou couh yungh mbouj ndaej lo. Daxmeh hawj gou aen daeh sozliu he daeuj cang saw, de couhdwg aen daehsaw daihngeih gou. Aen daehsaw neix saekhenj, miz song diuz cag ndei hawj fwngz gaem, gou gig maij de. Gou ngoenzngoenz riuj de bae hagdangz, mizseiz mbaet duj va gyaeundei henz roen baek youq rog daehsaw, mizseiz laeglemx aeu mbaw ceij he suek aen maenz gangq ndaemndwt coq haeuj ndaw bae hag- dangz gwn. Baenzneix, aen daehsaw daihngeih buenx gou haujlai nanz.

Miz ngoenz ndeu gou cuengqhag maranz, daengz buenq loh, aen daehsaw neix mbongq congh lo, saw gou doek okdaeuj, cadi doek haeuj ndaw haexvaiz gwnz loh. Gou cijndei got saw dawz daehsaw vaih neix dauqbae. Ma daengz ranz, gou lwnh hawj daxmeh gou aen daehsaw gou vaih lo. Daxmeh gou yawjyawj aen daehsaw gou, naeuz:“Aen daeh neix mwngz yungh ndaej geij bi lo, gou bang mwngz nyib aen daehbaengz ba!” Ngoenz daihngeih gou baez hwnq- mbonq, aen daehva moqsak ndeu couh dwk youq gwnz daiz lo. “Neix dwg aen daehsaw moq gou!” Gou angq dwk hemq hwnjdaeuj.

Aen daehsaw daihsam gou couh- dwg daehbaengz va neix, de dwg aen daehbeq he, miz diuz sai ndeu hoij youq gwnz mbaq. Aen daehsaw neix daegbied dangqmaz, daengx ban daehsaw doengzhag mbouj miz saek aen caeuq aen daehsaw gou dox- doengz. Aen daehsaw neix gou aemq ndaej aen yozgiz he couh mbouj siengj caiq yungh lo. Aenvih aen daehsaw neix yungzheih nwk lai, gou mbouj miz seizgan bae swiq de, caemhcaiq aen daehsaw neix angj lai, gou lijdwg aemq aen daehsaw bingzciengz ba! Doeklaeng daxmeh gou bae cawx aen daehsaw bingzciengz hawj gou.

Doeklaeng gou doeg cuhcungh lo, ndaej ce saw youq gyausiz, mbouj yungh aeu daehsaw cang saw ngoenz- ngoenz aemq bae hagdangz lo.

Daj gou miz aen daehsaw daih’it hwnj, seizneix gaenq gvaqbae 20 bi lo, seizgan gvaq ndaej gig vaiq ha, gou hix mbouj caiq dwg dah lwgnyez iq lo. Hoeng, gij seizgan geij aen daehsaw buenx gou byaij gvaq gij loh hwnj roengzdangz, hawj gou nanzlumz.