Doengh bi neix daeuj, Fuconh Yauzcuz Swciyen haenqrengz caux- guh “diegaeubae lizyouz vwnzva Yauzcuz Cungguek”, dawz ciepswnj caeuq hoengzyiengz vwnzva lizsij Yauzcuz caeuq hwngfat hongsaeh lijyouz daegsaek giethab hwnjdaeuj, daj yienghdingh caeuq yienghdoengh song fuengmienh bae guh ndei hong baujhoh foux gyongraez Yauzcuz, gungganq ndei bouxswnjcienz foux gyongraez Yauzcuz, caemhcaiq youq Sinhvaz Yangh Mbanjhujmajlingj、Mbanjdacingj caeuq Sinhvaz Yangh Cuhcungh laebbaenz le dieggoek swnjcienz. Seizneix, foux gyongraez Yauzcuz mboujdan youq Mbanj- canghyienz Siusuij、Mbanjyauz Fung- hih、Huzsaenzsien doengh dieg gingjgih lijyouz haenx biujyienj, lij dawz daizheiq ietnangq daengz ndaw gih rog gih bae, baijyienj gij minghhoengh yinxvunz yiengh dij- bauj vwnzva yisuz Yauzcuz Fuconh neix hawj vunzlai roxyiuj.

Foux gyongraez Yauzcuz caemh heuhguh foux gyongraez aenvenz Yauzcuz, ndawbiengz heuhguh foux boq venz daemh gyong, dwg diuqfoux minzcuz Yauzcuz Fuconh gag miz, gyoebcomz miz Fuconh Bingzdiyauz lizsij vwnzva、guhhong gvaq saedceij、coenggyauq saenqyiengj、yisuz vwnz- va, swnjcienz daengz seizneix gaenq miz 1300 lai bi lizsij, youq Fuconh Sinhvanz Yangh、Fuzli Cin、Sizgyah Yangh、Gozboh Cin doengh gij mbanj Bingzdiyauz haenx riuzcienz haemq hwnghoengh. Cungj foux neix youq ndaw yizsi cienzdoengj cuengqcaeq Buenzvuengz Yauzcuz caeuq mbangj hozdung guhmo gyaepfangz gyaepcez、ywbingh suenqmingh seiz diuq lai, doeklaeng hwngfat daengz ngoenzciet cienzdoengj、angqhoh fungsou、senj haeuj ranz moq、aeubawx haqsau doengh ngoenz angqyangz biujyienj, seizneix gaenq baenz le hangh hozdung vunzlai doxcaemh guh’angq ndeu.

Foux gyongraez Yauzcuz Fu- conh cingzciet sengdoengh, yiengh- foux rengzrwd cocat, diuhgo lwd- wenq gvangqlangh、gyaeundei、ndiepcingz, funggek daegbied, daeg- saek minzcuz naekgywg. Yiengh- doengh diuqfoux gungh miz caetcib ngeih dauq, youh heuhguh caetcib ngeih bienq, youz foux gyongraez、yaem’wenq buenx yienj、singhemq diuqfoux caeuq go gyongraez gyoeb- baenz, seizneix cienz roengzdaeuj lij haemq caezcienz haenx miz gyaeuj baiq seiq baiq、saulengj baenz sueng、naenghdangq caez、baihswix caet daengj cib lai dauq dem, gij yienghdoengh diuqfoux de itbuen miz song vunz boq venz, song vunz roq gyong, song vunz roq laz roq cemq, seiq boux roxnaeuz roek boux vunzsai rengzak ram aen gyongraez hung caez hopheux diuqfoux, bouxboqvenz doq boq doq diuq, boux boq dig hix boq dwk sing sepset, gyongraez hung、gyongraez iq caeuq boux roq gyonglaz itmienh ciuq ciethoh yaem’wenq haenqnyieg bekroq, itmienh hemq haha hwhw dem heiqfaenh, gij sing gyonglaz、sing venz、sing dig sekrwz caeuq gij sing gyongraez cietbek huzndei nem gij sing hemq haenx, gyoebbaenz singhab ndeidingq, sangngau doenghdaenh, ciengzmienh hungloet, hawj vunz sim’angq, gij daegcwng yawjngonz de yienhsag, baenz gij dijbauj yisuz minzcuz najrongh Yauzcuz Fuconh daihdaih swnjcienz haenx.

Bi 1957 caeuq bi 1964, aen doih “foux gyongraez aenvenz Yauz- cuz”Mbanjhujmajlingj、Mbanjdacingj gonqlaeng bae Baekging vih boux- lingjdauj guekgya biujyienj gvaq, vanzlij bae camgya daengx guek yindungvei caeuq swcigih minzyinvei biujyienj hanghmoeg biujyienj hauj- lai baez caemhcaiq ndaej ciengj gvaq. Haujlai bi gvaqdaeuj, miz haujlai canghdiuqfoux、Cangh- yauzyoz、canghyinzleiyoz ndaw guek gonqlaeng bae Fuconh yawjngonz、mumaeq caeuq hagsib foux gyongraez aenvenz Yauzcuz, caemhcaiq aeu gijneix guh sucaiz cauhguh le haulai diuqfoux Yauzcuz caeuq gij cozbinj yaem’wenq Yauzcuz. Bi 2008, “foux gyongraez aenvenz Yauzcuz Fuconh” ndaej Gozvuyenz liedhaeuj buek daihngeih guekgya feihvuzciz vwnzva yizcanj mingzloeg.