Mboengqneix, gicej bae caijfangj “ranz Sawcuengh” ndaw aen hawsingz neix ndeu, neix dwg aen ranz bouxguhnaz bingzciengz ndeu youq Mbanjyaujyenz Nanzyauj Cin Liengz- ging Gih Namzningz Si, bohranz Cungh Hihcwngh youq bi 1969 seng, seizneix guh boux fucujyin cunh- veijvei Mbanjyaujyenz.

Gij cungsim gicej caijfangj dwg: Aen ranz bouxguhnaz ndeu, liz aen si cungsim ngamq 50 goengleix, seizneix vunzmbanj cungj dap hwnj aen civaiq hawsingz haenq hwngfat nyauznyauz, lengq vunz lij guh sengeiq fat gij caiz hawsingz, hoeng daengx ranz vunz de cix vih gijmaz simmaez youq hag yungh Sawcuengh ndawde ni?

Aenvih Sawcuengh, de hawj bouxwnq deng gaeu cienzciengj

Bi 1988 ndwen 2, Cungh Hih- cwngh lij doeg gauhcungh, cingqngamj bungz hagdangz vihliux ciepcoux gauhgauj cix laemzseiz haibanh aen ban son 10 ngoenz Sawcuengh ndeu, aen ban neix iucingj Vangz Gyahcuj boux lauxsae hagdangz Sawcuengh ndaw yienh neix daeuj son Saw- cuengh. De bauqmingz bae camgya hag Sawcuengh. Baez son Sawcuengh neix sat le, lauxsae Sawcuengh dauq- bae hagdangz Sawcuengh lo. Doek- laeng, Cungh Hihcwngh ciengzseiz yungh Sawcuengh caeuq lauxsae Sawcuengh de doengsaenq, lauxsae ciengzseiz youq ndaw saenq haenh de, naeuz de Sawcuengh hag ndaej ndei, caemhcaiq gujli de laebdaeb roengz- rengz hag, daengzcog vih cienzboq gij vwnzva Bouxcuengh guh’ok gij gung- yen wnggai miz haenx.

Hag rox Sawcuengh le, couh maqmuengh miz gij saw Sawcuengh buenx ndang, hoeng seizhaenx Cungh Hihcwngh cij miz dauq 《Gobwnj Ganbu》 Sawcuengh ndeu, neix baenz- lawz doh gij aeuyungh de ndaej ni? Youq ndaw saenq Cungh Hihcwngh gaenq caeuq lauxsae Sawcuengh de geqhaemz gvaq, lauxsae sonyinx de dinghyawj faenh 《Gvangjsih Minzcuz Bau》(banj Sawcuengh) ndeu. Gig vaiq, Cungh Hihcwngh couh bae youzcwng cihgiz ndaw yangh henzgyawj hag- dangz dingh le faenh 《Gvangjsih Minzcuz Bau》(banj Sawcuengh) ndeu, hoeng aenvih bouxguhhong youzcwng cihgiz ndaw yangh guh hong guh loeng, gij bauqceij de dinghyawj haenx ciengzseiz deng doek. Aenvih caen daj ndaw sim maij bauqceij Sawcuengh, Cungh Hihcwngh bae youzcwng cihgiz fanjyingj cingzgvang gvaq, bouxguhhong youzcwng cihgiz raen dan dwg doek faenh bauqceij iq ndeu, couh mbouj dawz haeuj rwz lo. Cungh Hihcwngh yawjraen le hozndat dangqmaz, raiz saenq bae daengz youzcwnggiz ndaw yienh fanjyingj, doeklaeng bouxguhhong doxgven youzcwng cihgiz deng gaeu bae 3 ndwen cienzciengj.

Gauhgauj saetbaih le dauqma ranz guh hongreih hongnaz, hoeng Cungh Hihcwngh cix mbouj vutvak Sawcuengh bae, ciengzgeiz laebdaeb gag okcienz dinghyawj《Gvangjsih Minzcuz Bau》(banj Sawcuengh) caeuq 《Sam Nyied Sam》 (banj Sawcuengh). Bi 1989, ndaej daengz Lij Cungzsiz boux vunz mwhhaenx guh boux fucungjbien Gvangjsih Sam Nyied Sam Cazcise neix yiedcingz bangcoh, de camgya le aen ban son yungh Sawcuengh raiz faenzcieng haenx, hainduj yungh Sawcuengh raiz faenzcieng douzgauj. Bi 1990, 《Cawx Byalwg》 bien faenzcieng Cungh Hihcwngh baez daih’it yungh Sawcuengh raiz baenz neix dauqdaej youq 《Sam Nyied Sam》(banj Sawcuengh) geiz daihngeih bihaenx fatbiuj lo, neix hawj de angq raixcaix, daj neix hainduj de couh maij hwnj yungh Sawcuengh raiz faenzcieng lo.

Gij ndwenngoenz guh hongreih hongnaz nyaengq lai. Hoeng baez ndaejhoengq, Cungh Hihcwngh cungj dwg mbouj lumz yungh Sawcuengh yungh gij vwnzdij sawcuenh、sanj- vwnz、fwen daengj raiz di faenzcieng Sawcuengh fanjyingj gij ndwenngoenz lajmbanj haenx. Gaenh 30 bi neix daeuj, Cungh Hihcwngh lienzdaemh youq 《Gvangjsih Minzcuz Bau》(banj Sawcuengh)、《Sam Nyied Sam》(banj Sawcuengh) fatbiuj le 200 lai bien faenzcieng Sawcuengh. Aenvih gij faenzcieng de douzgauj haenx caet- liengh haemq sang、soqliengh haemq lai, de ndaej Gvangjsih Minzcuz Bause bingz baenz nienzdoh dungh- sinyenz maenhndei haujlai baez gvaq.

Aenvih Sawcuengh, de ra ndaej bouxvunz caencingq rox bonjfaenh caemhcaiq guh baenz gvanbaz

Ngamq hag raiz faenzcieng geij bi haenx, vihliux doxhag, Cungh Hih- cwngh lai gyau baengzyoux, youq gak dieg Mbanjcuengh cungj miz geij boux youxbit、youxsaenq, ndawde couh miz boux lauxsae Laizbinh ndeu heuhguh Hoz Cunghliuj, de lai baez son Cungh Hihcwngh raiz faenzcieng gvaq. Miz baez ndeu, Cungh Hihcwngh bae daengz ranz yawj Hoz lauxsae, youq Hoz lauxsae gizhaenx de roxnaj le dah lwgsau ndeu heuhguh Se Ginh- lungz, Se Ginhlungz caengz ndaej hag Sawcuengh gvaq, gig boiqfug gij dungxcaiz raiz faenzcieng Sawcuengh Cungh Hihcwngh, yienghneix song vunz de aenvih Sawcuengh guh moiz couh doxmaij lo. Baenzgya le, Cungh Hihcwngh lij dwg caeuq haujlai baengzyoux raiz faenzcieng haenx miz saenq baedauq, youq gij baengzyoux raiz faenzcieng haenx ndawde, miz bouxsai hix miz mehmbwk, gij saenq baedauq haenx cungj dwg yungh Sawcuengh daeuj raiz. Mbouj rox daj seizlawz hainduj, Se Ginhlungz doiq gij saenq Sawcuengh baengzyoux Cungh Hihcwngh fat ma haenx yied daeuj yied raen miz yinx lo. Se Ginhlungz cungj dwg youq seiz ndaej- hoengq aeu gij saenq haenx daeuj cang vunq guh yiengh dwk yawj, couh lumj doeg ndaej rox gij neiyungz de nei.

Mwhhaenx, Cungh Hihcwngh maij youq haetromh caeuq banhaemh yungh gij yaem biucinj doeg Sawcuengh, moix baez daengz mwh de yungh singyaem gyaeundei miz gamjcingz bae doeg gij faenzcieng gwnz bauqceij ganhvuz, Se Ginhlungz couh maij youq henz de nyinhcaen dingq de doeg. Nanz le, Se Ginhlungz hix yawj rox Sawcuengh lo, de mbouj- dan yawj rox gij saenq gyoengq baengzyoux raiz faenzcieng haenx raiz daeuj hawj goenggvan haenx, lij hag rox yungh Sawcuengh raiz faenzcieng, engq hawj Cungh Hihcwngh doeksaet dwg, mehyah doeklaeng hix youq gwnz 《Gvangjsih Minzcuz Bau》(banj Sawcuengh) fatbiuj le bien faenzcieng Sawcuengh coh heuhguh 《Angq Baenz Meh》 ndeu.

Aenvih Sawcuengh, dahlwg de bauq doeg aen ciennieb vahsaw minzcuz

Cungh Hihcwngh gvanbaz miz song dah lwg, dahdaih heuhguh Cungh Yujgingh, dahngeih heuhguh Cungh Yuzsiu. Youq ndaw rizroen song dah lwg majhung, Cungh Hihcwngh daeg- daengq son Vahcuengh biucinj caeuq Sawcuengh hawj gyoengqde rox gonq. Mwh song dah lwg hainduj hag gangjvah, Cungh Hihcwngh couh son gyoengqde yungh Vahcuengh biucinj gangj vah. Miz baez ndeu baengzyoux daeuj yawj de, dingqnyi dahngeih Cungh Hihcwngh ngamq hwnj youwzyenz haenx yungh Vahcuengh biucinj heuh de “daxboh”, couh geizheih cam naeuz: “Gyoengqsou gizneix dwg gangj Vahcuengh biucinj ha?“Aenvih Mbanjyaujyenz yienz- naeuz dwg mbanj Bouxcuengh, hoeng aenvih dieg youq gyawj henz hawsingz, caeuq vunz ndaw sing doxgyau haemq lai, seizneix vunz ndaw mbanj dingzlai dwg gangj Begvah Namzningz caeuq Vahbuj- dungh, ndigah baengzyoux couh miz gij ngeizvaeg baenzneix lo.

Doiq gij ngeizvaeg baengzyoux, Cungh Hihcwngh baenzneix dap: Moix bi daengz seizciet cingmingz, yawjraen baenz bang baenz bang bouxsauqmoh dingzlai vunz cungj dwg gangj Begvah Namzningz caeuq Vah- bujdungh, de caeuq lumj gangj vahriu nei doiq song dah lwg naeuz: “Gij vah doenghgij vunz neix gangj haenx, cojcoeng coenz ndeu hix dingq mbouj rox, gyoengqde cungj lumz cojcoeng bonjfaenh liux lo, sou gaej hag gyoengqde bw!” Cungh Hihcwngh lij naeuz, son song dah lwg hag Vah- cuengh biucinj dwg vihliux hawj gyoengqde hag Sawcuengh, engq ndei bae swnjcienz vahcoj. Dingq gij vah daj ndaw sim okdaeuj neix liux, baengzyoux couh engq boiqfug lo.

Song dah lwg daj iq couh dingq daxboh doeg Sawcuengh, dingq gij go Vahcuengh Daegsaenq majhung, deng yingjyangj nanz le, hix hag rox Sawcuengh lo. Dahdaih doeg siujyoz haj nienzgaep hainduj couh yungh Sawcuengh raiz faenzcieng ndaej lo, lij douzgauj hawj 《Gvangjsih Minzcuz Bau》 gvaq, seizneix dahngeih cingq doeg cuhcungh haenx hix yawj rox gij bauqceij cazci Sawcuengh. Bi 2016, dahdaih aenvih cingzcik ndei gauj hwnj aen ciennieb vwnzyoz vahsaw minzcuz vunznoix Cunghyangh Minz- cuz Dayoz, gauj hwnj aen hagdangz mizmingz Baekging caen dwg mbouj ngaih.

Aenvih Sawcuengh, de guh boux fujdaujyenz hagdangz

Cungh Hihcwngh cawz son vunz ndaw ranz hag Sawcuengh, de lij miz aen maqmuengh baenzneix dem——maqmuengh Sawcuengh ndaej youq gwnzbiengz cienzdoh wngqyungh, ndaej haeuj hagdangz. Muengh le haujlai bi, gihvei dauqdaej daeuj lo, bi 2015 ndwen 3, Cungh Hihcwngh ndaej aen saunenzgungh hagdangz lajmbanj Nanzyauj Cin Cungsim Hag- dangz cingj bae guh boux fujdaujyenz roghag. De yungh Sawcuengh bien raiz le haujlai hot fwenliuzloh caemhcaiq son hagseng eu dem, ndawde bien cozbinj 《Aen Loqsiengj Cungguek Fukhwng Itdingh Baenz》de camgya cauhguh neix aeundaej ngeih daengj- ciengj daihcib gaiq Namzningz Si cungh siujyoz ndawhag yingjsiciengj bingzsenj hozdung caeuq ngaenzciengj Cunghyangh Den’gyaugvanj ndawhag yingjsi cezmuz maenhndei, lij youq “segih mingzsingh hung” doxdax Aen Binzdau Hawsingz Gvangjsih Densi- daiz aeundaej cingzcik ndei. 《Bae Daengz Bya Lawz Eu Fwen Lawz》 bien cozbinj de cauhguh neix riengz aendoih vwnzyi hagdangz wngqiu bae camgya Aen Vanjvei “Fanj Seiq Cungj Fungheiq” Gijveij Namzningz Si banh haenx gvaq, lij daibyauj Liengzging Gih bae Sanglinz camgya eu fwen doxdax Namzningz Si banh haenx, aeundaej ciengjmaenhndei. Bi 2016 ndwen 12, Cungh Hihcwngh sonyinx hagseng aen hagdangz neix camgya Namzningz Si gaiq daih’it Vahcuengh biucinj doeg ginghdenj doxdax, aeundaej cizdijcuj sam daengj- ciengj.

Cungh Hihcwngh lij maqmuengh, daengzcog ndaej youq hagdangz bangcoengh lajde haibanh saek aen ban Sawcuengh yinxdaeuz, aeu gij cihsiz Vahcuengh Sawcuengh bonj- faenh hag ndaej haenx son hawj gyoengq hagseng, hawj gyoengqde ndaej yungh Sawcuengh daeuj geiqloeg go Vahcuengh, aeu gij vwnz- va conzdungj maenhndei Bouxcuengh swnjcienz fatyiengz roengzbae.