Haeuxnaengj hajsaek dwg gijgwn conzdungj Bouxcuengh raeuz. Aenvih Bouxcuengh raeuz guh haeuxnaengj miz henj、ndaem、gyaemq、nding caeuq hau haj cungj saek, ndigah heuhguh “haeuxnaengj hajsaek”.

Bouxcuengh raeuz maij gwn haeuxnaengj hajsaek baenzmaz, moix bi daengz liggaeuq sam nyied sam roxnaeuz miz saeh ndei, Bouxcuengh raeuz cungj aeu guh haeuxnaengj hajsaek. Guh haeuxnaengj daeuj caeq cojcoeng caeq bouxsien, mbaenj gyoengqde baujyouh lwglan daihgit daihleih caemhcaiq ngaenz haeux doq lai. Gwn haeuxnaengj hajsaek, mbouj aeu dawh hix mbouj aeu vanj, swiq fwngz seuqcingh couh cigciep aeu fwngz gaem aeu gwn.

Guh haeuxnaengj hajsaek aeu bwh ndei haeuxcid、vamai、mbawraeu caeuq go’gyaemq. Miz vunz haengj- dingh yaek cam, mbouj dwg haeux- naengj hajsaek, baenzlawz cij miz sam cungj gij nyumx? Mwngz yawj roengz- bae couh rox lo.

Guh haeuxnaengj henj aeu vamai daeuj swiq seuq cawj goenj, baez raemx daih’it mbouj aeu, bokbak. Baez daihngeih cawj goenj, raemxhenj couh okdaeuj lo. Caj gij raemxhenj daengz haj、roekcib doh le, swiq haeuxcid seuq raix roengzbae cimq, cimq ndaej geij aen cungdaeuz, lauz haeux hwnjdaeuj cuengq haeuj caengq bae naengj cug, haeuxnaengj henj- rwgrwg couh guh baenz lo.

Guh haeuxnaengj ndaem aeu mbawraeu caeuq naeng ganjoiq caez daem yungz, dawz ok hawj sak le cuengq roengz ndaw raemx bae cimq ngoenz caeuq hwnz ndeu, daih nyaq cingh couh guh baenz gij raemxndaem lo. Cawj gij raemxndaem daengz haj、roekcib doh le, swiq haeuxcid seuq caiq bok roengz raemxndaem cimq haemh ndeu, haetlaeng lauz haeux hwnjdaeuj cuengq haeuj caengq naengj cug, haeuxnaengj ndaem- ndutndut couh guh baenz lo.

Guh haeuxnaengj gyaemq caeuq haeuxnaengj nding aeu go’gyaemq daeuj cawj. Go’gyaemq mbaw lai raez caemhcaiq saek laeg couh cawj baenz saekgyaemq, mbaw lai nduen caemh- caiq saek oiq couh cawj baenz saek- nding. Song cungj raemx guh baenz le, swiq haeuxcid seuq faenbied cuengq haeuj raemx mizsaek bae cimq, cimq ndaej geij aen cungdaeuz couh lauz haeux hwnjdaeuj cuengq haeuj caengq bae naengj cug, haeuxnaengj gyaemq- ngwtngwt caeuq haeuxnaengj nding- yanyan couh guh baenz lo.

Guh haeuxnaengj hau swiq haeuxcid seuq caiq cuengq roengz ndaw raemx raeuj bae cimq, cimq ndaej geij aen cungdaeuz couh lauz haeux hwnjdaeuj cuengq haeuj caengq bae naengj cug, haeuxnaengj hausak- sak couh guh baenz lo. Guh haeux- naengj hau mbouj aeu maz nyumx, haeuxcid naengj okdaeuj couhdwg saekhau lo.

Bingzciengz guh haeuxnaengj hajsaek mbouj yungh dwgrengz baenzlai, guh ndei 4 cungj raemx- nyumx, caiq swiq gij haeuxcid ndei, doeklaeng faenbied cimq youq ndaw raemxnyumx bae, ngoenz daihngeih dawz haeuj caengq bae naengj cug, haeuxnaengj hajsaek unq rang couh guh baenz lo.

Haeuxnaengj hajsaek saek lai ronghsien, aeu gij doenghgo daeuj nyumx, gij feih gak saek cungj mbouj doxdoengz, gak miz gij rang. Mizseiz guh haeuxnaengj hajsaek seiz lij naengj gij nohcaj dem, nohcaj cup gij rang doenghgo, gwn cungj mbouj nywnx.

Lij ndaejgeiq seiziq daxmeh gou baez guh haeuxnaengj hajsaek, beix- nuengx dou geij boux couh dadaengx myaiz lae dwk humx youq henz, cij deq haeuxnaengj hajsaek baez dawz ok caengqfaex, hix mboujguenj ndat mbouj ndat fwngz lo, cung hwnjbae doxceng gwn gaemz daih’it. Daxmeh gou baez raen couh hemq:“Gyoengq fangzlwg, guh haeuxnaengj hajsaek okdaeuj aeu caeq cojcoeng gonq, gyoengqsou lij gwn, daengz haemh rox ok nyouh dwk mbonq.” Daxmeh gou yienznaeuz baenzneix gangj, hoeng gaemh gaemz haeuxnaengj hajsaek hawj gyoengqdou laeglemx dawz bae faen gwn. Gij feih seizde gou daengz seizneix lij mbouj lumz.