“Dinghlingling …… dingling- ling ……” Gou riengz dwk gij sing lingz hwnjdangz byaij haeuj ndaw gyausiz bae.

Ngamq yamq haeuj bakdou gyausiz, dah banhcangj cug song mengq baegfofo buet daeuj lwnh naeuz caengz raen Lij Ningz daeuj hagdangz. Gou coh aen diegnaengh Lij Ningz yawj bae, gwnz daiz hoengqhanghang, bingzseiz laeq lwg neix mbouj daeuj gvaiz gvaq ha, ngoenzneix dwg baenzlawz lune? Gou mbouj gamj caiq naemj, sikhaek dawz soujgih okdaeuj dwk denva cam boh de.

“Dued…… dued…… dued……” Lingz yiengj le sam baez, miz vunz ciep lo. “Vei, mwngz ndei. Mwngz dwg boh Lij Ningz lwi? Gou dwg Cinz lauxsae, haetneix baenzlawz caengz raen Lij Ningz daeuj hagdangz ne? Dwg mbouj dwg lwg neix ndangdaej miz maz mbouj soeng lo?” Gou gig simgip dwk cam.

“Cinz lauxsae ndei!” Boh Lij Ningz dingq gij vah gou le coh gou han ndei. Raen gou gangj Lij Ningz caengz daengz hagdangz, de sikhaek gaenjgip naeuz Lij Ningz caeux couh gaen daxbuz byaij ok ranz bae hagdangz lo. Dingq daengz neix, gou anbaiz hagseng daengx ban gag doegsaw, swhgeij ganjgip bae bakdou hung hagdangz yawjyawj. Aenvih bingzseiz miz hagseng daeuj gvaiz le couh mbouj gamj haeuj bakdou hung hagdangz lo.

Ngamq yamq daengz bakdou hung hagdangz couh dingqnyi sing daej lwgnyez. Gou swnh gij sing daej yawj gvaqbae, yawjraen laj gofaex baihgvaz bakdou hung hagdangz miz bouxlaux he caeuq boux lwgnyez he, song vunz cingq gangjsebseb. Gou byaij gvaqbae baez yawj, cingq dwg Lij Ningz ban dou, daxbuz henz ndang couhdwg daxbuz de. Daeklaeng gou cix rox: Daxbuz Lij Ningz song ngoenz neix ngamq daj lajmbanj daeuj, de in lan gyaez lan. Ndigah haetneix boh Lij Ningz miz saeh bae danvih haemq caeux, de couh aeu caenndang daiq lan daeuj hagdangz. Daxbuz Lij Ningz dwg boux lajmbanj, mbouj rox gij gvigawj gyauhdungh ndaw singz, cij geiq maenh gij vah boh Lij Ningz daengq hawj de: Daeng saekhoengz dingz, daeng saekloeg byaij.

Mboujliuh song buzlan byaij daengz bakloh cibcih, aen daeng saekloeg doiqnaj couh yaepmib ndaep lo. Daxbuz Lij Ningz laihnaeuz lij ndaej gvaqbae, couh dawz aen daehsaw daeglan caemjramram byaij gvaq maxloh. Lij Ningz hemq daxbuz dauq, naeuz daeng saekloeg ndaep lo, aeu dingz din, aenvih daeng saekhoengz sikhaek couh rongh lo.

Hoeng daxbuz Lij Ningz mbouj dingq, heuh Lij Ningz doq gaen de byaij, ciengj ndaej gvaqbae, de doq gangj doq gag byaij gij loh de. Daxbuz Lij Ningz vunz sang ga raez, ndang byom din mbaeu, sam yamq gyaep baenz song yamq, geij yamq couh byaij daengz doiqnaj maxloh lo. Lij Ningz cij ngonz daxbuz caemjramram gvaq maxloh, de cix dinghdingh ndwn youq henz loh caj doeklaeng daeng saekloeg caiq rongh. Baenzneix, gyoengqde ngamq byaij daengz laj gofaex rog bakdou hung hagdangz, gij sing lingz hwnjdangz couh yiengj lo, Lij Ningz daeuj gvaiz lo. Aen sim de diuqbubbub, mbouj ndei eiqseiq haeuj hagdangz bae gyausiz, ndigah couh youq bakdou daejnyenye……

Dingq song buzlan gangj sat, gou sikhaek haenh Lij Ningz guh ndaej ndei, dwg aen yienghndei wnggai deng doengzhag daengx ban daeuj hagsib. Caemhcaiq gou hix bihbingz daxbuz Lij Ningz, aeu souj gij gvigawj gyauhdungh, mbouj ndaej vih ganj roen couh maenh roemx, baenzneix yungzheih fatseng saeh rwix.

Doeklaeng gou naemj, gij hingzveiz daxbuz Lij Ningz hix aeu lijgaij. De youq lajmbanj gvenq lo, lajmbanj mbouj miz maz bakloh cibcih, engq mbouj aeu gangj miz daeng saekhoengz roxnaeuz saekloeg, gvaq maxloh cungj dwg siengj byaij couh byaij, siengj ngut couh ngut. Ngamq daeuj ndaw singz, hix aeu miz vunz daeuj son de cij ndaej.

Vihneix, gou youq ndaw ban cienmonz aeu ciet go ndeu daeuj gangj gij ancienz youq gwnz loh. Gou nyienh gyoengq lwgnyez daj gienh saeh neix hwnj, baezlaeng byaij roen rox menhmenh byaij, mbouj ndaej gwq byaij baenaj, lij aeu rox dingzdingz ngonzngonz. Saekseiz, miz seizgan daeuj gvaiz hix dwg faenh fukheiq, ciuhvunz baenzneix raez, caen mbouj wnggai youq gwnz loh ceng faencung he.