Saedceij gvaq ndaej caen vaiq, yaepyet, gou dang lauxsae gaenq 30 bi. Mbouj rox mbouj nyinh, swhgeij sonhag Sawcuengh gaenq ndaej 30 bi! Ciuhvunz miz geijlai aen 30 bi?

30 bi daeuj, gij hagseng gou son gvaq haenx, baenz cien baenz fanh. Ndawde, nienzgeij oiq miz cibgeij bi, laux miz 60 doxhwnj; singqcingz gyoengqde ne, miz boux sienhsoh, miz boux manzgywngz; hag Sawcuengh ne, miz boux heih hag lumj gwn daeuhfouh, miz boux cix hoj hag lumj hwnj mbwn……

Geiq ndaej ngamq bae 1998 gaep dijyuz cunghconhbanh hwnjdangz seiz, raen miz geij laeq hagseng boemz daiz ninz. Gou couh naemj dwg mbouj dwg gou son Sawcuengh gyoengqde mbouj mizyinx? Roengzdangz ma gou couh dajdingq liujgaij cingzgvang. Geij boux lauxsae hwnjdangz aen ban haenx cungj naeuz, geij daeg haenx baez hwnjdangz cawjgoh couh ngunh siengj ninz, hoeng bae hwnjdangz dijyuz couh miz cingsaenz lo. Ndigah ciengzseiz deng fok, mbouj fok gyoengqde aiq ninzndaek fofo mbouj rox ndiu.

Mbat daihngeih gou bae hwnj- dangz, couh riu naeuz, youq gwnz dangz gou, ndaej cwxcaih ninz. Daengx ban doengzhag cungj buenq saenq buenq ngeiz cimyawj gou, ndaw gyausiz caemrwgrwg. Miz laeq hagseng ndeu cam:“Caen ha? Doenghbaez dou ninz cungj deng lauxase wnq ndaq.” Gou ciep naeuz:“Dangyienz caen lo, hoeng, lauxsae yaek caeuq sou dingh geij diuz gvigawj, dingh ndei cij ndaej ninz. Daih’it, gou hwnjdangz cam vwndiz, cam daengz byawz, boux haenx cungj yaek ndwn hwnjdaeuj dap, baugvat bouxninzndaek. Byawz dap deng roxnaeuz cingj boux wnq bang dap deng cij ndaej naengh, mboujnex couh buenx gou ndwn; daihngeih, ninzndaek mbouj ndaej gyaenfofo, neix rox yingjyangj gou hwnjdangz, hix yingjyangj doengz- hag……” Coenz vah gou caengz gangj sat, doengzhag daengx ban cungj riugakgak mbouj dingz.

Daj baezhaenx hwnj, geij daeg hagseng caiq hix mbouj gamj ninz lo, caemhcaiq yied hag yied baenz. Aenvih youq gwnz dangz gou, gou ciengzseiz cam vwndiz, yungh lai cungj fuengfap sonhag, heuh hagseng doegdoeg gangjgangj、caicai naeuz- naeuz, ciengzseiz lij daegdaengq nangqdaengz geij daeg maij ninz haenx. Gyoengqde baez mbouj haeuj- sim dingqgoq, mbouj rox gou cam maz, mbouj rox dap maz, caengz caj gyoengqde cingj doengzhag henz daizsaw bang dap couh deng doengz- hag daengx ban riu nyaenq. Doeklaeng gyoengqde baez dap deng, gou cungj haenh, gyoengqde roxnyinh cij aeu haeujsim dingqgoq, gij vwndiz gou cam hix mbouj hoj, yied hag yied mizyinx, caemhcaiq yied hag yied ndei lo.

Bi 2006, aen beizyinbanh Saw- cuengh daengx gih canghfwen Boux- cuengh youz Swcigih Minzyijveij cawjbanh, youq hagdangz dou haiban. Gyoengq canghfwen neix, mizmbangj gaenq ndaej 60 bi doxhwnj, miz- mbangj cix caengz rim 20 bi. Gyoengqde mizmbangj rox di saw, mizmbangj cix mbouj roxnaj aen cihsaw lawz. Gij doxdoengz dwg, gyoengqde bouxboux haengj eu fwen