Bi 2017 doxdaeuj, Denhngoz Yen cungfaen leihyungh hagdangz aen dieg gyauyuz caeuq cienzboq neix, gvangqlangh haiguh hong vwnzva minzcuz haeuj hagdangz, hawj gak cuz hagseng roxyiuj vwnzva minzcuz、hag vwnzva minzcuz、swnjcienz vwnzva minzcuz, hagdangz vwnzva minzcuz heiqfaenh naek- gywg, gij yenzsu vwnzva minzcuz yienhda.

It dwg laebbaenz aen lingjdauj siujcuj hong vwnzva minzcuz haeuj hagdangz miz hagdangz yaucangj camgya haenx, baujcang hong vwnzva minzcuz haeuj hagdangz ndaej cingqciengz guh. Ngeih dwg dingh’ok gij fueng’anq hengzguh hong son’gyauq vwnzva minzcuz, aeu son’gyauq vwnzva minzcuz liedhaeuj gij neiyungz son’gyauq sonhag caeuq guhhong dajveh bae, daj hozdung ciengzdieg、hozdung gicaiz、gij ngaenzcienz hozdung daengj hawj daegbied baujcang. Sam dwg gyagiengz hwnjguh aen doih lauxsae, gaenxmaenx cujciz lauxsae camgya gak gaep gak loih son’gyauq yezvu vwnzva minzcuz haenx, lai roenloh daezsang gij suijbingz yezvu caeuq gij naengzlig guhhong lauxsae. Seiq dwg youq dangzgoq sonhag hawj baujcang, dangzdijyuz minzcuz dijyuz sonhag neiyungz ciemq cungj dangzdijyuz sam faenh cih it doxhwnj, dangzciengqgo aeu fwen dangdieg gvihaeuj sonhag neiyungz, haiguh hwnjguh ndawhag miz daegsaek minzcuz caeuq go minzcuz、foux minzcuz、dinfwngz minzcuz、dijyuz hozdung minzcuz gig miz daegsaek dangdieg haenx, daezhawj aen bingzdaiz hawj hag- seng langhbaij dungxcaiz minzcuz vwnzva. Haj dwg binaengz ndaw yienh banh ciet lijyouz vwnzva caeuq aen vanjvei coux ndwencieng cungj ceijdingh hagdangz anbaiz gij cezmuz dijyuz vwnzva minzcuz camgya yienjok. Roek dwg gyagiengz yienh caeuq yienh、hagdangz caeuq hagdangz doxgyau dox baedauq hozdung, mboujduenh daezsang hagdangz lauxsae hagseng roxyiuj vwnzva minzcuz.

(Veiz Gozdai)