Yaek daengz sam nyied sam, boux lauxsae mehmbwk son caezgya eu fwen.

Lauxsae naengh youq aen daengq doq damz soujfunghginz doq son eu fwen. De maj ndaej gyaeundei, gij sing de seksak lumj roeghenj ciuz.

Lauxsae fwd fatyienh gyoengq hagseng riengz eu fwen miz vunz eu loek, lij cab miz sing riu dekswdswd. De hai lwgda engq hung bae ra dwg boux hagseng lawz loenghluenh.

Seizhaenx, lauxsae cim daeg hagseng ndeu. Daeg haenx ngamq iet fwngz coh naj daengz laeng dahsau naengh youq baihnaj de. Gij sing riu cingq dwg de fat okdaeuj.

Daeg haenx yawjraen lauxsae yawj coh de, naj hoengzdwdwd lumj deng feiz coemh gvaq, lumjbaenz rox swhgeij guh loek maz nei doq yup fwngz dauq, aen bak hix haep hwnj.

Lauxsae mbouj caiq son caezgya eu fwen, cuengq soujfunghginz youq gyangjdaiz, ndwn hwnjdaeuj sikhaek heuh daeg hagseng haenx ndwn hwnj eu fwen. Daeg haenx ndwn hwnjdaeuj, ngaemgyaeuj, fajrwz ndingmaeq, eu mbouj ok saek gawq.

Lauxsae cam de:“Haxbaenh mwngz guh maz ne, gou son baenzlai baez mwngz vihmaz mbouj rox eu gawq lawz?” Daeg hagseng haenx sing iq dap naeuz:“Gou mbouj guh maz, gou yawjraen laeng de miz duznon, gou bang de dawz roengzdaeuj, lauxsae mwngz couh yawj gou, doeklaeng couh heuh gou ndwn hwnjdaeuj eu fwen.” Lauxsae youh cam:“Dawz roengzdaeuj couh dawz lo, mwngz vihmaz lij riu?” De dap:“Mbouj rox byawz coq duznon youq baihlaeng de, gou raen duznon youq laeng de bin bae bin dauq, de hix mbouj roxnyinh, gou raen ndeiriu.”

Lauxsae byaij daengz henz ndang de, ndawsim lij ngeiz dwg mbouj dwg de coq duznon youq laeng dah hagseng. Seizhaenx, miz boux dah hagseng gingz fwngz hwnjdaeuj. Lauxsae ngaekgyaeuj hawj de ndwn hwnj gangjvah. Dah hagseng neix gangj:“Lauxsae, gou yawjraen duznon youq laeng dah gonq, hoeng gou liz ndaej gyae, couh heuh de bang dawz roengzdaeuj.”Lauxsae baez dingq couh hawj song boux hagseng naengh roengz, caemhcaiq coh daeg hagseng naeuz:“Lauxsae laih- naeuz mwngz hwnjdangz loenghluenh, doiq mbouj hwnj. Doeklaeng caiq bungz gij saeh neix, mwngz couh gingz fwngz lwnh hawj lauxsae, rox lwi? “Wn, gou geiq gij vah lauxsae mwngz gangj youq ndawsim lo, doeklaeng mbouj caiq yingjyangj caezgya.” Daeg hag- seng haenx han naeuz.

Lauxsae riunyumnyum, aeu fajfwngz bae lumh aen gyaeuj daeg hagseng haenx, muengh de mbouj caiq siengj gij saeh haxbaenh, nyinhcaen hag eu fwen. Lauxsae dauq daengz gyangjdaiz dawz soujfunghginz hwnj- daeuj danz, laebdaeb son eu fwen.

Daeg hagseng haenx naengh roengz le, song fwngz coq youq gwnz daizsaw, nyinhcaen hag eu fwen. Dingq ndaej nyi gij sing de lumj raemxrij laelili nei, rwenz raixcaix. Caen dwg siengj mbouj daengz!

Lauxsae gag naemj: Bineix sam nyied sam banh gij doxdax eu fwen, aen ban neix goj ndaej aen mingz lo. Aenvih hagseng aen ban neix doxgiet doxgyaez, caen lumj beixnuengx nei caemhyouq, hab eu fwen wnggai beij ban wnq ndeidingq!