Gaxgonq, aen ndaeng duzciengh mbouj lumj seizneix baenzneix raez, cij miz gyoengqvunz daenj gij haizvi nei raez ndwi. Miz duzciengh nyaeq geizheih ndeu, de doiq saeh maz cungj siengj rox daengz daej, ndigah cungj cam neix dwg vihmaz, haenx dwg vihmaz, cam mbouj ndaej dingz. Mbouj dwg cam “vihmaz da max dwg saekhoengz”, couhdwg cam “rieng duzdouq vihmaz baenzneix dinj, rieng noucoengz vihmaz baenzneix raez”, lij cam “vihmaz gwnz ndang loeghozraez miz baenzlai diemj raiz gyaeundei, hoeng gou mbouj miz”, baenzngoenz cam haujlai aen vwndiz.

Caengz dap aen vwndiz neix sat, de youh mauh’ok aen vwndiz wnq lo. Daxboh、daxmeh nem au、baj daengj sojmiz caencik de, cungj deng de cam ndaej simnyap daeuq caez. Gyoengqde sim’angq caemhcaiq hoengq seiz couh han de saek gawq song gawq. Miz saeh guh mbouj ndaej bien seiz, couh mbouj dap de, moeb caekhaex de baez ndeu. Baez daengz seizneix, duzciengh nyaeq hix roxnyinh gig geizgvaiq, siengj mbouj doeng gyoengqde vihmaz moeb caekhaex de. Hoeng, mbouj- guenj duzciengh nyaeq deng moeb geijlai baez, de lijdwg miz maz vwndiz couh cam.

Miz ngoenz ndeu haetromh, daengngoenz ronghsag, duzciengh nyaeq baez hai lwgda, couh bae cam gyoengqvunz aen vwndiz ndeu:“Duz- ngozyiz baeznaengz gwn maz ne?” Gyoengq duzciengh ngamq hwnq- daeuj, cingq gwn gyoijhom, mbouj siengj dam de, couh moeb caekhaex de, hwk ndaej de doq buetdeuz.

Hoeng, de gig vaiq couh lumz in lo, youh hainduj bae cam gizyawz doenghduz aen vwndiz neix. De yawjraen roegdingfaex, couh cam:“Gou cam mwngz, duzngozyiz baez- naengz gwn maz ne?”

Roegdingfaex caeux couh rox duzciengh nyaeq neix ceiq maij cam vwndiz geizheih, ndigah daegdaengq mbouj cigciep han de, cij naeuz:“Mwngz swhgeij bae gwnz Dahbop yawjyawj ba!” Duzciengh nyaeq neix baez dingq gig angq, gipmuengz coh Dahbop buet bae.

De ngamq daengz henz Dahbop, yawjraen gwnz rin henz dah heux miz duznuem raiz, couh angqvauvau buet gvaqbae, hai bak couh cam:“Gou cam mwngz, mwngz raen gvaq duzngozyiz lwi?”

Byawz rox duznuem gaenbonj mbouj nyienh dam de, mbouj han fanj cam:“Mwngz cam neix guh maz?” Aenvih duzciengh nyaeq neix maij cam vwndiz lai, aen “mingz ndei” de caeux couh cienz okbae lo. Ndigah duznuem neix baez raen de couh mbouj dajsuenq dam de.

Duzciengh nyaeq neix mbouj cam ndaej dapanq mbouj gamsim, cam aen vwndiz gaxgonq:“Mwngz rox duz- ngozyiz baeznaengz gwn maz ne?” Duznuem mbouj ok sing, mbehai aen ndang de, fwd aeu rieng moeb caekhaex duzciengh nyaeq neix.

Duzciengh nyaeq neix in ndaej doq ndoj deuz, ndawsim lij gag ngeix: De vihmaz moeb gou? Yienznaeuz deng moeb, hoeng, aen vwndiz “duz- ngozyiz baeznaengz gwn maz” lij yo youq ndaw uk de, de laebdaeb coh henz Dahbop byaij bae.

Sawqmwh, duzciengh nyaeq neix fatyienh gwnz Dahbop fouz miz gyaengh faex he, gwnz de miz fouq lwgda ndeu coh de yaepyaep! Duzciengh nyaeq neix couh cam de:“Gou cam mwngz, mwngz raen gvaq duzngozyiz lwi?” Gyaengh faex haenx youh yaepyaep lwgda naeuz:“Gou couhdwg duzngozyiz ha!” Duzciengh nyaeq neix baez dingq angq raixcaix, de siengj: Baezneix cungjsuenq ra ndaej aen dapanq vwndiz lo! De cam:“Mwngz baeznaengz gwn maz ne?”

Duzngozyiz nyaenx riu, cang ok gij yienghceij hozunq, sing daemq doiq duzciengh nyaeq neix naeuz:“Gvaqdaeuj gyawj gou di, lwgciengh nyaeq, gou laeglemx lwnh hawj mwngz!” Duzciengh nyaeq neix laux- saed dwk iet aen gyaeuj de gvaqbae. Byawz rox duzngozyiz gaemz ndeu couh haeb aen ndaeng de, haenqrengz rag de coh ndaw dah. Duzciengh nyaeq neix buekmingh coh haenzdah beng. Song de rag bae rag dauq, aen ndaeng duzciengh nyaeq neix yied rag yied raez. Duzciengh nyaeq neix yienznaeuz lij iq, hoeng de miz rengz lai, doeklaeng dauqdaej cengq duet lo. Hoeng, aen ndaeng de cix bienq ndaej miz mij lai raez bae!

Duzciengh nyaeq neix siengsim dangqmaz, doeklaeng aen ndaeng de caeuq caezgya cungj mbouj doxdoengz lo. De rag aen ndaeng raezrang daejfwtfwt coh ranz byaij bae. Sawqmwh, miz duznyungz hung he daeuj haeb de, de simnyap dwk baez baet ndaeng raez. Ha! Duznyungz gawqyienz deng moeb dai lo! De mbouj caiq baenzneix siengsim lo, hainduj sawq ning ndaeng raez de. De angq dwk aeu aen ndaeng raez de bae mbaet mak gwnz faex daeuj gwn……

Ha ha! Siengj mbouj daengz, ndaeng raez lij miz baenzlai ndeicawq! Duzciengh nyaeq neix angqvauvau dwk buet ma ranz. De yienh’ok gij ndeicawq aen ndaeng raez le, sojmiz duzciengh cungj hozhaenz ndaeng raez de, doq cam de baenzlawz bienq ndaej raez. De couh menhmenh gangj okdaeuj caez.

Doeklaeng gyoengq duzciengh couh buet daengz henz Dahbop bae ra duzngozyiz, yaeuh duzngozyiz haeb aen ndaeng gyoengqde le caiq roengz- rengz rag dauq. Baenzneix, aen ndaeng gyoengq duzciengh cungj ndaej bienq raez lo.