Youq Denhngoz、Nanzdanh、Dunghlanz、Fungsanh doengh dieg ranghdah Dahraemxhoengz baih- saebaek Guengjsae raeuz, moix bi ndwencieng cungj banh ciengz hozdung cienzdoengj hoenghhwd youh daiq miz eiqsei cunghgyau ciuhnduj mdeu — “cietcaemzgvej”, ndawde 《fouxcaemhgvej》couh dwg gij cujyau neiyungz ngoenzciet de. Ciet Vwnzva Fungsug Ndawbiengz Caemzgvej Bouxcuengh Dahraemx- hoengz dwg ngoenzciet cienzdoengj daegsaek Bouxcuengh gagmiz, daengz seizneix gaemq miz 1000 lai bi lizsij, bi 2005 ndaej lied haeuj buek daih’it guekgya gaep feihvuzciz vwnzva yizcanj mingzloeg, caemhcaiq soengq hawj le “Cungguek cietgingq ceiq miz daegsaek minzcuz”“Cung- guek cietgingq feihvuzciz vwnzva yizcanj ceiq ndei”, baenz dangdieg mbawmingzcoh daegsaek lijyouz mizmingz ndeu.

《Fouxcaemzgvej》 Bouxcuengh caeuq gij yisuz ciuhgeq ityiengh, daj biengz vunzloih ciuhnduj cienz roengzdaeuj. Seiz ciuhnduj, vunz ciuhnduj Bouxcuengh haeuj daengz dajndaem vwnzmingz le, youq ndaw vanzgingz seizde, daj ndaw saedceij、guhhong rox daengz duzgoep swenj- heuh caeuq raemxfwn miz gvanhaeh maedciet, itbuen cingzgvang lajde, duzgoep baez swenjheuh, couh byaj- raez fwndoek; gij dieg duzgoep lai haenx, gomiuz baenzbingh fatnon couh noix, soucingz couh ndei. Ndawbiengz riuzcienz ndawde, vunz ciuhnduj Bouxcuengh nyinhnaeuz duzgoep dwg dahlwg saenzbyajraez, dwg bouxsawj saenzbyajraez baij daengz ndawbiengz bouxvunz, mwh vunzraeuz muengh fwndoek, couh lwnh hawj duzgoep, duzgoep couh doiq gwnzmbwn swenjheuh, saenz- byajraez dingqnyi duzgoep swenjheuh le, couh roengz fwn hawj vunzraeuz yungh. Baenzneix, youq ndawsim vunz ciuhnduj Bouxcuengh, duzgoep couh dwg ndanglawh bouxsaenz, cungj gig aeueiq gingqcungh duz- goep. Ndigah, youq moix bi ndwen- cieng satbyai daengz ndwenngeih co yaek dajndaem gaxgonq, dieg Bouxcuengh cungj hoenghhwd banh gij hozdung caeqbaiq duzgoep, comz gyoengq saimbwk rengzak caez diuq fouxcaemzgvej angqyangz haenx, mbaenj daengx bi rumz swnh fwn yinz, haeux ndaej fungsou.

《Fouxcaemzgvej》 Bouxcuengh dwg cungj foux ndawbiengz ei yiengh yatdiuq、byaijdoengh duzgoep ndeu, gij yiengh doengh de dingzlai dwg yiengh duzgoep byaij caeuq yiengh duzgoep yatdiuq, youq mwh byaij diuq doenggvaq fwngz、ga、gyaeuj caeuq hwet niujdoengh, gienjgiet yienhsag, goqsingq daegbied, yienghsiengq mingzbeg, mizyinx raixcaix. Fouxcaemzgvej itbuen miz “foux gyongnaeng”“foux goep okseiq”“gepbenj raez gingq goep”“foux baiq nyenz”“foux ndaemnaz”“foux ciemzgyaj”“foux hoh fungsou”“foux rauqnaz”“foux dwkbya lauzgungq”“foux dozmae daemjrok” doenghgij neiyungz foux neix, baijok le gij yiengh daegbied duzgoep caeuq guhhong vunz ciuhnduj, hawj vunz yaenqsiengq laeglwd.

《Fouxcaemzgvej》Bouxcuengh aeu gij yiengh ndangdaej doengh diuq lai cungj lai yiengh youh yinx vunz haenx, lwnhgangj le gij vwnzva cienzdoengj caeuq lizsij gyaenanz Bouxcuengh, caemhcaiq cugboux hwngfat baenz cungj hingzsik biuj- yienj ndeu, hamz miz gij singqcaet swnjciep、cienzboq、dinfwngz、vwnz- va、minzcuz, de ndaej swnjcienz、hwngfat caeuq cienzboq doiq saenqhwng cingsaenz Bouxcuengh, cauxguh yienghsiengq daegbied Guengjsae gagmiz, hoengzyiengz vwnzva minzcuz Guengjsae miz yienhsaed yiyi hungloet.