Hoeng, 1959 nienz gvaqlaeng, aenvih ginghci fazcanj mbouj hwnj, dwg guek raeuz seiz gannanz, nungz- yez、gunghyez、vwnzgyau caeuq veiswngh daengj gak hangz gak nieb deng yingjyangj, hong Sawcuengh hix deng caemyikyik roengzdaeuj lo, mbouj miz vunz han. Mbouj geijlai nanz, vwnzgwz youh daeuj, sawqmwh mbwn laepyamyam, fwj ndaem- aeujaeuj raq rumz yak ci doh daengx guek, gihgou gvendaengz Sawcuengh deng gaijsan, gyoengq ganbu gaxgonq guh hong Sawcuengh cungj gaijhangz, yozyau raeuz deng dingz banh, cojgvaq dahraix!

Dangj hai cib’it gai sam cung conzvei le, daengx guek fwj sanq mbwn rongh, gij cwngcwz minzcuz dangj daezok ndongqda, Sawcuengh youh ndaej dauqlix; doihengz Saw- cuengh byaij haeuj geiz hoizfuk. Daj 1980 nienz daengz 1989 nienz, dwg seiz hoizfuk Sawcuengh fazcanj ceiq rem he, gij sawqdiemj doihengz Sawcuengh daj 22 aen yienh mbe- gvangq daengz 47 aen yienh, daengx- heij miz 385 aen siujyoz 1033 aen ban, 305 aen yozcenzbanh, hagseng miz 34431 vunz. Youq Vujmingz Yen caeuq Dwzbauj Yen miz cunghyoz hai ban son Sawcuengh, hagseng miz 293 vunz. Doeklaeng, Swcigih Minzyijveij cungjgez ginghyen ndei le, youq cunghyoz hai ban son Sawcuengh mbe’gvangq daengz 22 aen yienh.

Seizhaenx yozyau dou ndaej fuk banh lo. Doeklaeng hagseng yaek miz baenz cien vunz. Geij bi haenx Swcigih gvidingh gak gaiq daihhag nem da cunghconh bizyezswngh Bouxcuengh bizyez le, lij aeu daengz Gvangjsih Sawcuengh Hagdangz ganbu beizyinbanh hag Sawcuengh dem. Caemhcaiq Lij gvidingh gak gisuzyenz gauj cizcwngh gisuz, rox Sawcuengh couh mbouj yungh gauj yinghyij lo. Gyoengqvunz raen rox Sawcuengh miz gizndei byawz mbouj siengj hag Sawcuengh ne?

Geij bi haenx, ndaw guek rog guek miz haujlai aen canhgvanhdonz daeuj hagdangz dou hag ginghyen, caeuq raeuz gyauhliuz. Gvangjsih Minzyen caeuq Cunghyangh Minzyen caemh hai aen conhyez son Saw- cuengh. Doengzseiz, Nanzningz、Gvei- linz、Bwzswz caeuq Bahmaj seiq aen si(yen) neix gij hagdangz swhfan minzcuz aeu go Sawcuengh baenz gobizsiuh.

Gaendwk gij gyauyuz gvendaengz Sawcuengh ndaej fazcanj, Swcigih Minzyijveij Caeuq Gvangjsih Yinz- minz Gvangjbo Dendaiz doxgap hai gij gyangjco gvendaengz gvangjbo Sawcuengh, youq aen gihcuj neix banh hwnj aen hagdangz gvangjbo Sawcuengh. Doenggvaq gvangjbo gaisau gak cungj cihsiz. Hawj dieg Bouxcuengh raeuz engq vaiq vut gungz bienqfouq. Gij fanveiz sawjyungh Sawcuengh ciemh ngoenz ciemh gvangq, mbe’gvangq daengz sij saenq、sawfaenz sijsa、swhfaz susung、bau- ganh senhconz daengjdaengj.

1991 nienz Daihseiq Gaiq Daengx Guek Siujsoq Minzcuz Yin- dungvei youq Nanzningz hai, vih yienjok gij daegsaek minzcuz Sw- cigih Bouxcuengh, Swcigih sojmiz danhvei mboujguenj hung’iq cungj gaij venj gij baiz sij miz Sawcuengh Sawgun song cungj saw. Baez “hozdung gaij baiz” neix, hawj gij baiz miz Sawcuengh Sawgun song cungj saw cienzmienh hai va. Gou naemj, neix aiq dwg daihngeih aen gauhcauz doihengz Sawcuengh lo!

Doeng bae cin daeuj, gij hong doihengz Sawcuengh ginggvaq le ndit dak fwn rwed, yienznaeuz gannanz, hoeng youq cwngcwz minzcuz ciuq- rongh lajde, vunzlai yied daeuj yied yawjnaek gij vwnva minzcuz, Saw- cuengh ndaej daengz fazcanj, ngoenz- neix go faex Sawcuengh lij maj ndaej maqhuz mwncup maenhrem.

Gwnz Yinzminzbi lij yaenq miz Sawcuengh ronghsagsag, bauganh gvendaengz Sawcuengh miz 《Gvangj- sih Minzcuz Bau》 caeuq 《Sam Nyied Sam》, lij fathengz gij saw 《Dwng Siujbingz Vwnzsenj》、《Gyangh Cwz- minz Vwnzsenj》 nanueknuek hoeng gyoengqvunz cungj haengj doeg. Gvangjsih Hagdangz Sawcuengh lij fazcanj, gij sing Vahcuengh gvangjbo lij goksadsad. Sawcuengh lij ndaej haeuj Baekging Yinzminz Daveidangz vih gyoengq daibyauj fuzvu. Hai Daihbet Gaiq Daengx Guek Yinzda Baez Daih’it Veiyi bihaenx, gou ndaej bae ndaw Daveidangz guh Vahcuengh dungzbu fanhoiz, gou guh boux laux- sae Sawcuengh ndaej haeuj Davei- dangz roxnyinh baenzlai gvangh- yungz!

Gaendwk Siz Ginbingz cungj- suhgi youq Cibgouj Daih daezok, aeu vih genhciz caeuq fazcanj gij vwnzva sevei cujyi miz daegsaek Cungguek guh gungyen, haenqrengz bongh baenaj. Dangj caeuq guekgya vih rungx ndei gofaex Sawcuengh dwg- rengz lo, muengh gofaex Sawcuengh yied maj yied mwn.

（sat）