Gaxgonq miz song boux lwgnyez seng youq ngoenz he, boux he dwg lwg caizcawj, boux he dwg lwg bouxhoj. Mehyah caizcawj yienznaeuz bizlulu, hoeng mbouj miz cij hawj lwg gwn, caizcawj cijndei umj lwg bae ranz bouxhoj, hawj yah bouxhoj cij lwg de.

Lwg caizcawj ndaej 6 bi seiz, caizcawj cingj boux lauxsae he daengz ranz daeuj son de. Hoeng, de cungj mbouj miz sim bae hag, ngoenzngoenz buet bae ranz bouxhoj caeuq lwg bouxhoj guhcaemz. Doeklaeng caiz- cawj cijndei hawj lwg bouxhoj hix daeuj ranz caeuq lauxsae hag. Baenzneix lwg caizcawj cij nyienh naengh youq daizsaw. Hoeng, lwg caizcawj baengh ranz de miz ngaenz, cungj epbik lwg bouxhoj bang de sij cozyez.

Ndaej 20 bi seiz, song boux lwgnyez majhung baenz bouxcoz lo, caizcawj aeu ngaenz cawx aen guenvih yenling ndeu hawj lwg de bae guh, lwg de angq saedcaih. Hoeng, lwg de yienznaeuz doegsaw cibgeij bi, cozyez cungj dwg ep lwg bouxhoj bang de guh ndwi, de maz cungj hag mbouj ndaej daengz fwngz. Ranz de miz ngaenz, ndigah de couh cingj lwg bouxhoj guh saeyez.

Lwg caizcawj hwnjnyaemh, aeu hwnjdaiz gangjvah. Baenzlawz guh ne? De siengj ok aen banhfap, hawj saeyez sij gij gauj gangjvah okdaeuj. Hoeng, saeyez sij ndei hawj de yawj, de yawj mbouj rox, saeyez siengj gawq he coenz ndeu son de doeg, hix ganj mbouj gib lo. Vanzlij ukgyaeuj de baenq ndaej vaiq, youh siengj ok aen banhfap daeuj.

Ngoenzde, yenling daenj ndei buhguen, daiq ndei mauh guen, naengh cingq youq gwnz daiz, doiqnaj de cuengq miz gij gauj gangjvah ndeu, laj daiz caemrwgrwg, mbouj miz vunz gamj gangj coenz vah ndeu. Seizneix, yenling cingq caj saeyez youq manh baihlaeng naeuz hawj de baenzlawz gangj, de mbouj gamj faensim saekdi, gig haeujsim dingq. Yenzlaiz yenling caeuq saeyez gaenq doxyaeng ndei, saeyez aeu sing iq gangj coenz he, de couh sing sang dwk gangj okdaeuj.

Saeyez gek gij manh yawjraen yenling dawz gij gauj gangjvah hwnjdaeuj yawj, couh gaenjgip sing iq dwk gangj:“Ngoenzneix gou hwnj- nyaemh……” Yenling couh sing hung dwk cungz gangj:“Ngoenzneix gou hwnjnyaemh……” Byawz rox saeyez nyaenx mbouj ndaej fwt ok aen roet raez, yiengj “bu” sing hung ndeu. Yenling roxnyinh gij gauj couhdwg yienghneix, de hix ok sing hung “bu” ndeu daeuj.

Saeyez muengz coihcingq naeuz:“Lauxyez, lauxyez, gou haxbaenh mbouj dwg gangj vah dwg ok roet.” Hoeng, byawx rox yenling hix sing hung dwk cungz gangj:“Lauxyez, lauxyez, gou haxbaenh mbouj dwg gangj vah dwg ok roet.” Saeyez baez dingq ging ndaej ndang ok hanh nit daeuj lo, de doeknaiq gangj coenz vah “dai lo”, yenling hix sing hung dwk cungz gangj “dai lo” coenz vah neix. Laj daiz cauz hwnjdaeuj lo, hoeng, bouxboux cungj lau yenling moq, mbouj gamj hemq sang, gyumqgywt dingq ndaej nyi coenz vah “dai lo”.

Saeyez youq manh baihlaeng roxnyinh muenghduenh lo, miz heiq mbouj miz rengz dwk gangj:“Sojmiz cungj liux lo!” Saeyez gangj sat coenz vah neix couh ngunh gvaqbae lo. Yenling cim gij gauj ndaw fwngz de hix sing hung dwk cungz gangj:“Sojmiz cungj liux lo!” De gangj sat lij dinghdingh dwk gaem gij gauj gangjvah, louzsim dingq saeyez youq manh baihlaeng gangj maz. Hoeng, nanznene cungj mbouj ndaej nyi maz, de hix mbouj rox baenzlawz guh lo. Laj daiz cauz ndaej engq haenq lo.

Doeklaeng hix mbouj rox yenling gangj maz lo, gyoengqvunz laj daiz cungj gag sanq dauqbae lo. Miz vunz cienz gij vah yenling ngoenzneix gangj okbae caez, saeyez singj gvaqdaeuj rox le lau yenling ienq de, couh lienzhaemh buetdeuz lo. Yenling rox swhgeij caiq cang mbouj roengz- bae lo, hix buetdeuz lo.