Aenvih Sawcuengh gou roxnaj le Gvanh Swgingh yizsinj, caemh aenvih Sawcuengh gou bae baiq de guh lauxsae, riengz de hag Sawcuengh.

Gvanh Swgingh dwg Cunghgoz Minzcuz Yijvwnz Fanhyizgiz ngeih- gaep yizsinj, giem guh dayoz gyausou, caemhcaiq de hix dwg boux conhgyah fanhoiz Cuengh Gun song cungj saw, youq daengx Guengjsae cungj miz- mingz. Geijcib bi daeuj, de biensij、fanhoiz le haujlai bonj saw gvendaengz gij vwnzva Bouxcuengh, ndaej daengz vunzlai haenh ndei. Gou gig boiqfug de, gig gingqgyaez de, hix gig siengj coh de gouzhag!

Bi’gvaq, gou youq Namzningz camgya aen beizyinbanh gvendaengz Sawcuengh ndeu. Gvanh Swgingh gyausou hawj dou hwnjdangz, gangj gij vwndiz gvendaengz coihgaij《Fueng- anq Sawcuengh》. De rox haujlai doxgaiq, gig miz ginghyen, gangj ndaej sengdoengh raeuh, gou dingq ndaej gig mizyinx.

Roengzdangz le, gou couh bae caeuq de gangjgoj. De gangj vah hozunq, caencingz doiq gou. Aenvih Sawcuengh gou couh ndaej roxnaj Gvanh lauxsae lo. Gou daj bi 2015 haidaeuz hag Sawcuengh, hoeng swhgeij gag hag, mbouj miz vunz son, roxnyinh haemq hojnanz, miz haujlai vwndiz fouzfap gaijgez, gaenq miz di doeknaiq lo. Mwhhaenx ndawsim gou gag naemj, doeklaeng roxnaj le Gvanh lauxsae, baenzbaenz aeu ra gihvei bae cunz de, cingj de vih gou gejdap gij vwndiz gvendaengz Sawcuengh!

Gihvei cungjsuenq deng gou ra ndaej lo. Bineix ndwen 11 ngoenz 11 banhaemh, gou dwk denva hawj Gvanh lauxsae, dajsuenq bae Namz- ningz cunz de, cam de gij vwndiz gvendaengz Sawcuengh. De baez dingq couh sangjswt dapwngq, angq- coux gou ngoenzcog couh daeuj ra de. Siengj mbouj daengz de boux conhgyah mizmingz ndeu baenzneix hozunq doiq vunz, naeksim bang vunz. Gou angq dwk baenz hwnz ninz mbouj ndaek, itcig cengq da daengz ranzrongh.

Ngoenz daihngeih banhaet, gou couh ganj daengz Namzningz lo. Youq aen bangunghsiz Gvanh lauxsae, de nyinhcaen son gou gij cisiz Saw- cuengh. De sien son gou doeg gij singmeh caeuq yinhmeh Sawcuengh, naihsim niujcingq gij doegyaem mbouj cinj gou.

De doiq gou gangj, hag Saw- cuengh mbouj nanz, cijaeu miz saenqsim. Codaeuz hag Sawcuengh, aeu lai doeg, moix ngoenz aeu doeg Sawcuengh 20 faencung doxhwnj. Aeu nyinhcaen doiqbeij gij singmeh、yinhmeh caeuq singdiuh gvendaengz Vahcuengh byauhcunjyinh caeuq Vahcuengh bonjdieg, haeujsim faen- sik, faencing gij doxdoengz caeuq gij mbouj doxdoengz, ra ok gij gvilwd doiqwngq. Baenzneix couh cugbouh sug Sawcuengh, menhmenh hag ndei de. De lij daengq naeuz, hag rox Sawcuengh le, aeu lai yungh Saw- cuengh sij faenzcieng. Daj faenzcieng dinj hainduj, genhciz sij mbouj dingz, baez bien baez bien rom, cungj miz ngoenz ndeu ndaej bienqbaenz boux sij faenzcieng Sawcuengh lauxhangz ndeu……

Ngoenzhaenx, gou soundaej gig lai, baenz ciuh mizik, mboujdan dwg rox baenzlawz hag Sawcuengh, lij rox baenzlawz doiq vunz、baenzlawz bae guh gij saeh caeuq hag bonjlingx.

Youq gwnz loh maranz, gou siengj: Ciuhneix ndaej baiq Gvanh Swgingh yizsinj guh lauxsae, caeuq de hag Sawcuengh, caen dwg cungj fuk- faenh ndeu, hix dwg cungj vuenyungz ndeu! Baezlaeng gou itdingh aeu hag ndei Sawcuengh, doeklaeng vih swnj- cienz gij vwnzva Bouxcuengh bae buek guh, yienghneix cij doiq ndaej hwnj gij sim’eiq Gvanh lauxsae bw!