Bi 2003 ndwen 11 ngoenz 8, Aenciet Yisuz Minzgoh Gozci Namz- ningz “Haemh Fungcingz Dungh- nanzya”, “Lwgmbwk Gyoebhab Danzciengq Dingzdingj Lungzcouh” umj aen dingzdingj, din ngauz roix lingz, doq danz doq ciengq, hot dingzdingj danzciengq 《Go Ciengq- mbwn》he ciengq gij go ciuhgeq riuzcienz baenz cien bi haenx goksa, hawj daengx seiqgyaiq roxyiuj le dingzdingj Bouxcuengh. Gij yisuz danzciengq dingzdingj yiemj deng saetcienz haenx, ginggvaq bouxmaeq vwnzva Bouxcuengh bae vatgud cingjleix, youhdauq yaprongh gwnz- biengz. Bi 2007 ndwen 1, yisuz dingzdingj Lungzcouh ndaej lied haeuj le Guengjsae buek daih’it feihvuzciz vwnzva yizcanj mingzloeg.

Dingzdingj dwg gij daibyauj daegsaek gagmiz vwnzva minzcuz Loegvet ndawde cungj ndeu, caemh dwg Bouxcuengh sam cungj yozgiz ndaekndek ceiq gaeuqgeq ndawde cungj ndeu, youq Lungzcouh、Ningz- mingz caeuq Fangzcwngz gij rangh- dieg baihsaenamz Guengjsae caeuq Yeznanz gapgyaiq haenx riuzcienz, daengz seizneix gaenq miz baenz cien lai bi lizsij. Beixnuengx Bouxcuengh Lungzcouh ciuq gij sing cungj yozgi neix fat okdaeuj haenx heuh aende guh “dingzdingj”, dwg cungj yozgiz vunz dangdieg guh gij hozdung caeqbaiq、gangjciengq caeuq saedceij ngoenznaengz noix mbouj ndaej ndeu. Dingzdingj dwg youz ganjgimz、sugyienz、maxgimz、yienzgimz caeuq gyonggimz aeu byuklwggyoux guh- baenz haenx gyoebbaenz, ndaej gag danz、habdanz roxnaeuz vih gofoux buenxdanz, bouxdanz baeznaengz aeu raek roix lingzdin ndeu riengz cietbek ngauzdoengh. Dingzdingj cezcou byotbet mingzbeg、mbaeu- mbengq saetdiuq, hamz miz cungj heiq saenzmaed ndeu, gig miz daegsaek Bouxcuengh.

Gij yiengh dingzdingj lumj ngeihyienz benj, hoeng caizliuh、gezgou、dinghyienz cix mbouj dox- doengz. Diuz ganjgimz de dwg aeu faexyienq daengj gofaex genggenq dijbauj dieg Bouxcuengh cij miz haenx daeuj guh, raez mij ndeu, deu miz rizraiz gyaeplungz, gyaeujgimz deu baenz yiengh duzfungh、aenyaenq dungjsai、daengngoenz roxnaeuz ronghndwen, mbangj ndaej yut ok faen baenz sam gyaengh oetcoux haeuj daeh’aemq, fuengbienh daiq okrog; swixgvaz gak daep diuz sugyienz aeu faex guh ndeu; doengz- gimz aeu lwggyoux roxnaeuz mbok- faexcuk guhbaenz, lumj buenq aen giuz nei, na 10 lizmij, mbiengj gyoeng aeu ronggya roxnaeuz benj- mbang faexgyaeuq nemndaet, diuz- yienzrog dingh guh yaemdaemq, yaemsaek doiqbeij mingzyienj, fueng- bienh danzyienj singhab. Dingzdingj miz sam cungj biujyienj hingzsik, it dwg “danzmbwn”, couh dwg gagdanz, ngeih dwg “ciengqmbwn”, couh dwg buenxdanz yienjciengq, sam dwg “diuqmbwn”, couh dwg doq danz doq ciengq doq diuq. Gij biujyienj hingzsik neix miz bouxmaeq naeuz dwg gij yinhyoz guhmo ciuhgeq Loegvet gaenq deng ciedraeg haenx, nyuenz dwg yahgimq (yahsien) vih vunzraeuz guhmo siu nanh yw bingh seiz yungh daengz, gvaqlaeng cungj gofoux danzgimz daiq miz singqcaet guhmo nei yienjbienq baenz le gij hozdung yienjheiq guh’angq vunzlai caemh guh ndeu. Ciuq mbangj laux- hangz gaujcingq, gij diuhgo yinhyoz guhmo ciuhgeq Bouxcuengh miz 72 cungj baenz lai, seizneix caenh miz 20 lai cungj ndaej riuzcienz roengz- daeuj. Yinhyoz dingzdingj dingzlai aeu gij hingzsik singhab okyienh, gij fuengsik giethab de miz singnga、doiqbeij、 rw’ngon caeuq gak cungj yaem’wenq dakdaix, bienqvaq lai cungj lai yiengh. Ndaw go ciengz- ciengz miz yaem dinghgyang, baenz- neix ok le cungj yaem diuhgyang geizheih ndei dingq ndeu.

Seizneix, dingzdingj gaenq baenz le Lungzcouh Yen aen binjbaiz vwnzva mizmingz ndeu, yisuz dingz- dingj ndaej daengz vatgud caeuq cienzdoh. Daj bi 2008 gvaqdaeuj, Lungzcouh Yen moix bi cungj banh ciet yisuz vwnzva dingzdingj, doeng- gvaq ngoenzciet gyagiengz caeuq ndaw guek rog guek yisuz donzdij doxgyau, daezsang gij binjbaiz caeuq mingzdaeuz dingzdingj; daj bi 2011 hainduj, gij siujyoz ndaw yienh cungj laeb le aenban son danz dingzdingj, daengx yienh moix bi miz bouxhag dingzdingj sam seiq bak vunz ndaej hag rox danz dingzdingj, yisuz dingzdingj ndaej daih dem daih swnjcienz roengzbae.