Laebcin daengz laebhah,

Raemx gvaq Dahcanzcan;

Naemj daengz meh youq ranz,

Simfanz lai youh daej.

Okrog bae dajgoeng,

Cij doeng meh gannanz;

Ce meh gag youq ranz,

Naeuz mbouj fanz dwg gyaj.

Bi bae bi youh daeuj,

Meh gyaeuj hau hwet gungq;

Ninz mbouj ndaek buh nungh,

Cungj nanz lumz yiengh meh.

Seizhaenx meh hix lengj,

Ngoenz roengzrengz ndaem naz;

Vih ciengx lwg ndaej maj,

Guh hong naj deng ndit.

Bi caenh lai sinhoj,

Coq haeuj bak couh haiz;

Raemxda doeksaisai,

Nanz baiz ok youh guh.

Gwn maenz youh gwn biek,

Meh gaenxmbaet baenzlai;

Ciengx lwgmbwk lwgsai,

Caiq baeg sim hix nyienh.

Baenz saekdi bingh nyaeq,

Meh daej daengz caeugaen;

Ganq raeuz yungh sim caenh,

Aencingz laeg gvaq haij.

Baez naemj daengz swhgeij,

Youh beij roeg gwnz bya;

Duz coh heuh roegga,

Majhung ciengx meh dauq.

Daj ngoenzneix haidaeuz,

Aeu ndei doiq bouxlaux;

Gaej caeuq meh gaeqgyauq,

Laux saekseiz lumj lwg.

Saedceij baeyaeuyaeu,

Daxmeh raeuz bienq laux;

Daihgya caez rox hauq,

Bouxlaux couh vuenyungz.

Caenhsim goq meh ndei,

Beij hawj ngaenz mizik;

Noh cij ce miz dip,

Aeu rox nip hawj meh.

Dangh hauq raeuz guh daengz,

Ndaem vaeng goj bienq haeux;

Daxmeh ndaej souhgyaeu,

Lumj ranz caeu miz bauj.

Daengq raeuz gyoengq beixnuengx,

Muengz hix aeu maranz;

Gaej raen meh simfanz,

Banlwg aeu gingq laux.

Raeuz aeu gyaez bouxlaux,

Hauq lumj raemx ciengz lae;

Daih ciep daih roengzbae,

Conzdungj ndaej doxswnj.

Seizneix raeuz gaenq maj,

Cingz daxmeh lumj haij;

Lwglan baihlaeng byaij,

Hauqgingq fanh daih riengz.