1957 nienz 11 nyied 29 hauh, Couh Wnhlaiz cungjlij cujciz ciuhai Gozvuyen daih 63 baez conzdij veiyi, doenggvaq liux 《Fueng’anq Sawcuengh》, baecinj youq Dieg- cuengh doihengz. Daj ngoenzhaenx hwnj, Bouxcuengh raeuz cingqsik miz saw bonjfaenh lo. Sawcuengh caeuq Vahcuengh doxngamj, gig gohyoz, rox Sawcuengh le, caiq mbouj yungh aeu sawndip daeuj geiq fwen sij fwen lo.

《Fueng’anq Sawcuengh》 gungh- bu le, dieg Bouxcuengh raeuz couh hainduj doihengz, daengz seizneix gaenq ndaej 60 bi lo. Geijcib bi gvaqdaeuj, yienznaeuz diuz loh doihengz Sawcuengh deng ndit dak fwn soen gvaq, dauqngeix hwnjdaeuj, miz song aen seizgeiz hawj vunz nanz lumz.

Seiz daih’it dwg 1957 nienz daengz 1958 nienz. Gou ndaejgeiq, cienzmienh doihengz Sawcuengh dwg daj 1957 nienz 4 yied haidaeuz. Youq dieg Bouxcuengh gwnz haw、 lajmbanj、ndaw rungh caeuq ndaw lueg, vunzlai yungjfoedfoed dwk bauqmingz bae hag Sawcuengh, hoenghhwd dangq- maz. Gawq swhliu gyoepsuenq, dang bi couh miz 35 fanh lwgmbauq caeuq dahsau camgya aen ban son Sawcuengh. Daengz 1958 nienz, bae hag Sawcuengh vunz engqgya lai, demgya daengz 290 fanh. Ginggvaq hag Sawcuengh ndaej duetmengz couh miz 100 lai fanh vunz.

Youq diegrungh dieglueg haenx caiq mbouj miz vunz naeuz“Duznou caeg gwn goengfaen” coenz vah neix lo. Aenvih seizhaenx boux geiq goengfaen haenx dingzlai mbouj rox saw, couh aeu haeuxyangz rox duhhenj daeuj geiq goengfaen, doeklaeng haeuxyangz rox duhhenj cungj deng duznou caeg gwn caez bae, baenzneix byawz ndaej geijlai goengfaen couh mbouj rox lo. Sinhoj guh hong mbouj miz goengfaen, mwngz naeuz dwg- caengz mbouj dwgcaengz?

Seizhaenx, vih boiqhab doihengz Sawcuengh, Gvangjsih Cuenghveij (seizneix heuhguh Minzyijveij) couh hainduj guh gij hong beizyin ganbu, yaenq saw hai ban, gonqlaeng laeb miz gih、di caeuq yen sam gaep Sawcuengh hagdangz 52 aen, cienmonz son Sawcuengh. Miz ganbu 3000 lai vunz, saujmangz lauxsae 4 fanh lai vunz.

Doengzseiz doqswnh laeb baenz Gvangjsih Minzcuz Yinsazcangj caeuq Gvangjsih Minzcuz Cuzbanjse, vih yaenq caeuq okbanj gij saw Saw- cuengh fuzvu. Seizhaenx, Gvangjsih Minzcuz Cuzbanjse gungh okbanj saw Sawcuengh 350 lai cungj. Ndawde miz gobwnj、swzdenj, lij miz gij saw gvendaengz cwngci、ginghci、nungzyez swnghcanj、gohgi、vwnzva caeuq yisuz daengj, fathengz 1000 lai fanh cek. 《Bauq Sawcuengh》 caemh ok miz 500 lai geiz. Cunghyangh Yinzminz Gvangjbo Dendaiz caeuq Gvangjsih Yinzminz Gvangjbo Dendaiz lij miz Vahcuengh gvangjbo dem. 《Yinzminz Vabau》 caeuq 《Minzcuz Vabau》lij okbanj banj Sawcuengh, song cungj bau banj Sawcuengh cawz youq dieg Bouxcuengh fathengz, lij fathengz daengz seiqgyaiq 13 aen guekgya dem.

Seizhaenx doihengz Sawcuengh caen hoenghfwdfwd, Sawcuengh hawj gij lizsij Bouxcuengh bienq ndaej engq gyaeundei caeuq ronghsien, aenvih gij vwnzva Bouxcuengh miz saw daeuj geiq lo, gaxgonq dingzlai dwg bak gangj uk geiq ndwi, couh lumj youq haemhlaep byaij, lumhlaep bae ndwi. Yienznaeuz miz sawndip, hoeng sawndip dingzlai dwg bouxvunz gag caux ok gag yungh, cij miz lengqboux vunz rox, vunzlai mbouj rox yungh.

（caengz sat）