Duzmeuz meh miz song duz meuz iq, duz he henj, duz he raiz. Song duz meuz iq gij da lumj doengzlingz nei hung, bwnnyumyum, dwggyaez dangqmaz. Duzmeuz meh maij gyoengqde baenzmaz, ngoenzngoenz ciengq go hawj gyoengqde dingq, daiq gyoengqde okrog bae youz, huq maz ndeigwn cungj ce hawj gyoengqde gwn gonq. Baenzneix, song duz meuz iq menhmenh ndang cangq sim vuen dwk majhung lo.

Raen song duz meuz iq ngoenz beij ngoenz majhung, duzmeuz meh doiq gyoengqde naeuz:“Gou son sou bonjlingx ba.” Song duz meuz iq dingq le angqvauvau, diuq hwnjdaeuj heuh:“Ye, dou ndaej hag bonjlingx lo, dou ndaej hag bonjlingx lo.”

Baez daih’it, duzmeuz meh son gyoengqde diuqsang, gyoengqde mbouj rox diuq, duzmeuz meh couh diuq hawj gyoengqde yawj. Seizhaenx, duzmeuz henj doeng yawjyawj sae muenghmuengh, cungj mbouj yungh- sim yawj meuzmeh baenzlawz diuq. Hoeng, duzmeuz raiz da caengz ndaej gig hung, baez he hix mbouj yaep dwk yawj daxmeh diuq.

Duzmeuz meh hawj gyoengqde diuq hwnj aen daengq, duzmeuz henj diuq gonq. De mbouj yawj aen daengq miz geijlai sang, couh doq diuq gvaqbae, doeklaeng diuq mbouj hwnj lij deng sieng. Duzmeuz meh naeuz:“Danghnaeuz mwngz yawj cinj aen daengq caiq diuq, couh ndaej lo.” Daengz duzmeuz raiz diuq, de hag gij fuengfap daxmeh diuq, mbat he couh diuq hwnjbae lo. Duzmeuz haenh naeuz:“Mwngz gvai lai lo, hag ndaej caen vaiq.”

Baez daihngeih, duzmeuz meh son gyoengqde bin faex. Duzmeuz meh sien bin hawj gyoengqde yawj, dingjlingz miz duzmbaj mbin gvaq, duzmeuz henj couh buet gvaqbae caeuq duzmbaj guhcaemz. Duzmeuz raiz raen le, doiq duzmeuz henj gangj:“Daegnuengx, mwngz mbouj yunghsim hag, doeklaeng baenzlawz rox bin faex ne?” Duzmeuz henj dingq le, dasang gangj:“Gou coengmingz, bin faex doiq gou gangj gig yungzheih, gou mbouj hag hix rox.” Duzmeuz raiz dingq le cijndei ngauzgyaeuj, mbouj dam de, gag bae hag.

Duzmeuz meh son sat, couh hawj songde bin faex. Duzmeuz henj saenqsim nyubnyub, doiq daxmeh gangj:“Siuj saeh, yawj gou baenzlawz bin.” Hoeng, ngamq bin hwnj gij ganjfaex couh doek roengzdaeuj lo, caiq bin youh doek roengz, daengx ndang in raeuh. De hozhwnj dwk ngauzngauz diuz rieng naeuz:“Go faex neix luemj lai, ndigah gou bin mbouj hwnjbae.”

Duzmeuz meh naeuz:“Mbouj dwg go faex neix luemj lai, dwg mwngz caengz rox baenzlawz bin.” Duzmeuz henj mbouj fugheiq naeuz:“Couhdwg go faex neix luemj lai, mbouj saenq mwngz heuh daeggo bin.”

Duzmeuz raiz hag gij yiengh daxmeh bin faex, gaem maenh gij ganjfaex, yunghrengz mbat yat couh bin hwnj lo. Duzmeuz meh yawj coh duzmeuz henj.

Duzmeuz henj yawjraen le, naj- hoengz lo. Duzmeuz meh doiq de naeuz:“Cax raeh baengh roengz rinbaenz, caixhangz baengh gaenx guh. Hag bonjlingx mbouj dwg miz coengmingz ndwi couh hag ndaej, lij aeu nyinhcaen, gaenx guh.”

Daj seizhaenx hwnj, duzmeuz henj nyinhcaen hag bonjlingx, caiq hix mbouj faensim lo.