Yenling dingq le ngaekgyaeuj naeuz:“Cingq dwg la, gou bae yawj heiq seiz, yawjraen gyoengqvunz biujyienj fwngz gaem cieng, menh saenq di he, yawj hwnjbae couh saenzdikdik, lumj yunghrengz dangq- maz, gizsaed dwg ci cieng de aeu caizliuh daegbied guh baenz, yungh di rengz bae saenq couh saenzdikdik. Haemhde boux sijdonz he deng cieng camz haeuj bakaek le ci cieng haenx lij saenzdikdik, yenzlaiz dwg cieng heiqduenz. Gyoengqvunz sijdonz mbouj rox, raen bouxgvaiq saenq ci cieng haenx saenzdikdik, roxnyinh bouxgvaiq gig miz rengz, ndigah lau dangqmaz, couh engqgya simvueng lo. Veiz Cungh, mwngz gangj caen miz dauhleix. Hoeng, gyoengqcaeg vihmaz ce gij baengzcingq neix roengzdaeuj ne?”

Veiz Cungh dingq yenling baenzneix cam, doq dap naeuz:“Aenvih seizde miz vunz sijdonz vuengmuengz buet deuz, gyoengq bouxcaeg caeg ndaej huqgung le, hix siengj deuz vaiq di. Hozgvang gyoengqde hix lau gij vunz sijdonz deuz ok bae bauqanq, ndigah gyoengqde mbouj miz seizgan bae buqvaih gij baengzcingq neix.”

Veiz Cungh menh gangj, yenling menh dingq menh ngaekgyaeuj, hoeng yenling lij miz di mbouj miz daej, naeuz:“Heiqngaeuznaeng、bienq naj caeuq yungh cieng heiqduenz, baez yawj caen dwg vunz heiqduenz guh. Hoeng bouxvunz mbouj youq heiq- duenz guh hong hix rox bae ra ndaej gij huq neix daeuj a, yienghneix duenhdingh lumj naeuz lij noix di maz.”

Veiz Cungh naeuz:“Yenling mwngz siengj, huqgung baez daengz Dilinz Yen couh deng caeg, gangj- mingz gyoengqcaeg caeux couh rox huqgung daj gizlawz soengq、gvaq gizlawz, ndigah miz cinjbi bae caeg. Soengq huqgung dwg saeh hung、saeh mimiz, danghnaeuz mbouj deng caeg, lienz yenling mwngz hix mbouj rox, bouxvunz bingzciengz baenzlawz rox? Yenling mwngz lij geiq ndaej lwi, ciuzdingz vih banh gingdenj, vuengz- daeq mingling gak dieg gij heiqduenz mizmingz bae guek henz biujyenj, Dilinz Yen ceiq gyawj Senhlozgoz, gij heiqduenz bae Senhlozgoz biujyenj cingq miz heiqduenz Dilinz Yen ha, gyoengqde biujyienj le riengz sijdonz dauqdaeuj, haengjdingh rox soengq huqgung gienh saeh neix.”

Baezneix yenling couh soengheiq lo:“Baenzneix geij diemj hab hwnj- daeuj, couh caen dwg vunz heiqduenz caeg huqgung bae lo! Hoeng, yienh raeuz gungh miz 5 aen heiqduenz, seizneix hix mbouj rox dwg vunz aen heiqduenz he caez guh roxnaeuz geij aen heiqduenz ndawde mbangj vunz guh, dwg bouxlawz hix mbouj cingcuj. Danghnaeuz baij bing bae gaeb gyoengqde hwnjdaeuj, gyoengqde mbouj nyinhcoih hix mbouj miz yungh ha!”

Veiz Cungh riuhaha hwnjdaeuj, naeuz:“Yenling ha, sugvah gangj ndaej deng, vunz vih caiz dai, roeg vih gwn mied. Bouxcaeg vih cienzcaiz guh caeg, hix rox aenvih cienzcaiz mued dai, raeuz couh aeu cienzcaiz guh faenzcieng!” Veiz Cungh gangj le couh youq henz rwz yenling simhsimh, yenling hix riuhaha hwnjdaeuj, naeuz:“Baenz, couh baenzneix guh.”

Ngoenz daihngeih, yenling heuh gyoengq bing bae cienz vah, naeuz gij gingdenj senj guekduh yaek daengz lo, ndaw yienh aeu senj ok 10 boux vunz heiqduenz biujyienj ceiq ndei bae gingsingz biujyienj. Haemhneix youq ndaw yaxmonz biujyienj, byawz bauq- mingz camgya, couh ciengj hawj 20 liengx ngaenz, boux deng senj ndaej lij lai hawj ngaenz ciengj dem. Haemhde, couh miz geij aen heiqduenz haujlai vunz daeuj bauqmingz, hoeng geij aen heiqduenz ndawde lij miz 10 boux vunz mbouj daeuj bauqmingz. Baenz- neix, yenling mingling gyoengq bing riengz 10 boux vunz neix. Ngoenz- laeng, 10 boux caeg huq deng gaeb, huqgung hix ra ndaej dauq lo.

Huqgung ra ndaej dauq le, gyoengqvunz cungj haenh yenling miz maeuz, hoeng yenling riuhaha naeuz:“Saeh neix goenglauz dwg Veiz Cungh, gyo ndaej de naeuz hawj gou baenzlawz bae ra bouxguhcaeg.” Vunzlai couh heuh Veiz Cungh daeuj, camcam de yungh aen fap maz.

Veiz Cungh menhmenh gangj ok gij geiqmaeuz de daeuj: Yenzlaiz, ngoenzde de caeuq yenling duenh- dingh caeg huqgung dwg vunz heiqduenz, de couh youq henz rwz yenling simh, genyi yenling cienz vah okbae naeuz gij gingdenj senj guekduh aeu vunz heiqduenz bae biujyienj, fanzdwg boux bauqmingz biujyienj moix boux ndaej 20 liengx ngaenz. Gij cienz neix dwg bingzseiz biujyienj 10 doeb, ciuq leix daeuj gangj, vunz heiqduenz wnggai vih gij ngaenz neix daeuj bauqmingz. Hoeng, byawz caeg ndaej huqgung, gyoengqde gizlawz lij yawj ndaej hwnj 20 liengx ngaenz neix dem! Ndigah byawz mbouj daeuj bauqmingz byawz couh deng ngeiz! Baenzneix, couh baiq bing bae riengz 10 boux vunz mbouj daeuj bauq- mingz neix, caz gyoengqde baez ndeu. Caen dahraix, gyoengqde couhdwg boux caeg huqgung, ra ndaej boux- caeg, huqgung hix ra ndaej lo.

Vunzlai dingq Veiz Cungh gangj le, bouxboux haenh de lai geiq lai maeuz. Saeh neix sat, yenling gig baiqfug Veiz Cungh, couh ce de roengzdaeuj guh swhyez.（sat）