Youq Namzningz Si Yunghningz Gih, doenghgij hozdung angqhoh lumjbaenz aeubawx haqsau、hoh souhyienz、ranzmoq guhbaenz、coux- hek haenx, cungj miz ban betyaem boq dwk boksad dem angqyangz. Bi 2006, Betyaem Bouxcuengh Yungh- ningz ndaej lied haeuj Guengjsae buek daih’it feihvuzciz vwnzva yiz- canj mingzloeg, Yungzningz Gih bi 2009 youq Bujmyau Cin Liengzsin Cunh laebbaenz le dieggoek swnj- cienz baujhoh betyaem Bouxcuengh. Daj bi 2010 gvaqdaeuj, Yunghningz Gih moix bi cungj banh ciet lijyouz vwnzva betyaem Bouxcuengh, yinx geij fanh hekyouz ndaw gih rog gih bae yawjngonz cetyouz. Aen hangh- moeg feihvuzciz vwnzva yizcanj baengh “boq” okdaeuj neix, baenz le aen binjbaiz vwnzva minzcuz gig mizmingz ndeu.

Betyaem Bouxcuengh Yungh- ningz cienz daengz seizneix gaenq miz baenz bak bi lizsij, gvaqlaeng riengz gij heiqban Heiqbegvah dox- caeh haeuj Guengjsae daeuj yienj- heiq, betyaem Bouxcuengh Yungh- ningz caemh youq gwnz goekdaej boqboq ndaekndaek miz daegsaek minzcuz caeuq fungsug ndawbiengz de, supsou aeu gijndei yinhyoz Guengjdoeng, cugciemh gyoebbaenz “betyaem Bouxcuengh Yunghningz” gig miz daegsaek Bouxcuengh haenx, caemhcaiq youq ndaw diegguenj Yunghningz hwnghoengh roengz- daeuj. Gij yozdui betyaem Boux- cuengh Yunghningz dwg youz loxlez hung、loxlez iq、digfouzcongh、ngeihyienz、Cinzgimz、gyong、laz、nauz caeuq gyongrwi doenghgij neix gyoebbaenz. Boqyienj seiz faen ciengzfaenz caeuq ciengzfoux, bet- yaem ciengzfoux caenh cij boq lox- lez, boiq roq gyong laz nauz doengh- gij yozgi neix, ciengzmienh nauhyied hoenghhwd; betyaem ciengzfaenz dwg boq dig ngod yienz caeuq gij yozgi ndaekndek iqmbaeu haenx yienj- ndaek, boiq sing bouxvunz yienj- ciengq, gij yiengh de mbaeumbet biuyeg, gyaeundei yinxvunz. Gij go boq ndaek de dwg daj diuh citheiq caeuq fwen ndawbiengz Bouxcuengh senjaeu, gungh miz cien lai souj baenzlai. Aen sigij gonq 90 nienzdaih satbyai, Yunghningz laebbaenz le aen doihbetyaem Bouxcuengh miz 100 lai vunz ndeu okbae yienjok, baenzneix gij hozdung boqyienj bet- yaem youq singz mbanj Yunghningz ndaej doigvangq okbae. Riengzlaeng ginggvaq Yunghningz vwnzva bouh- monz bae vatgud、cingjleix、daezsang lai bi le, betyaem Bouxcuengh boqyienj daj caenh cij “boqboq ndaekndaek”, yienjbienq baenz le cungj yisuz biujyienj demgya miz seiq vunz caez roq gyonghung Boux- cuengh、digfouzcongh, caiq boiq miz ram giuhva、aemq bawxmoq、foux vaizcin、fouxgyongrwi、fouxnyaebcaz doenghgij biujyienj fungcingz Boux- cuengh, daegsaek minzcuz naekgywg ndeu.

Betyaem Bouxcuengh youq Yunghningz Gih miz goekdaej vunz- lai gvangqlangh, Bujmyau、Nazlaeuz、Sinhgyangh、Cunghhoz doenghgij yanghcin neix raen miz ceiq lai, moix aen hingzcwng cunh cungj miz haujlai aen doih betyaem, seiqseiz youq lajmbanj boqyienj. Seizneix, ca mbouj lai gak aen yanghcin gak aen cunhmbanj cungj miz aen doih bet- yaem swhgeij, youq gak aen cunh- mbanj, doenghgij dieg angqhoh haenx cungj cingj doih betyaem bae boq- yienj, baenzneix miz le cungj gangj- fap “betyaem baez yiengj, saeh’angq lienzdaemh” neix. Betyaem Boux- cuengh gaenq baenz le ngarengz- hoengh vwnzva lajmbanj caeuq aendoih biujyienj vunzlai lajmbanj mwh guh hozdung noix mbouj ndaej ndeu, ndaej daengz gyoengq vunzlai singz mbanj haengjgyaez.

Doengh bi neix daeuj, Doih Betyaem Bouxcuengh Yunghningz cawz youq ndaw gvaengh diegguenj guh boqyienj hozdung le, lij miz haujlai baez ndaej cingj bae namz- ningz、Baekging、Hangzcouh doengh- gij hawsingz hung neix camgya gak cungj doxdax roxnaeuz angqhoh biujyienj hozdung, mingzdaeuz riuz doh daengx guek. Bi 2005 ndwen 12, Doih Betyaem Bouxcuengh Yungh- ningz ndaej Cunghsenhbu、Vwnzvabu soengq hawj aen cwnghauh “Aen duenzdaej biujyienj vwnzyi minzyingz senhcin daengx guek”.