Seizdoeng mauxdan hai

Dujduj gvai youh langh

Va hai youq dieg gvangq

Ngonz ma angqfwngfwng

《Fueng’anq Sawcuengh》 ok

Fwjmok sanq bae gyae

Bouxcuengh hwnj mbaeklae

Yawj ndaej gyae raixcaix

Bouxcuengh lizsij raez

Vwnzva geiq ndaej dinj

Mbouj miz saw daeuj nyinh

Guh baenz binj dauq laeng

Yungh sawndip geiq saeh

Caezgya nanz rox ngonz

Mbouj miz bouxsae son

Cag con cim mbouj gvaq

Sawcuengh saw gyoepyaem

Sim caem hag couh rox

Conhgyah cauh saw moq

Doeg sij doq fuengbienh

Sawcuengh haeuj siujyoz

Hagseng goj angqriu

Hag ndei sing yinh diuh

Liuz rox geiq cih saw

Hagseng hwnj cuhcungh

Yungh Sawcuengh sij coenz

Faenzcieng menh raen roen

Gij hoenz gaenq vanq roengz

Sawcuengh haeuj sevei

Gyauhliuz ndei fazcanj

Caez roengzrengz swnghcanj

Ganj nyaemz haeuj siujgangh

Vwnzva nyumx bouxvunz

Cuengh Gun caez baenaj

Gohgi gwih hwnj max

Mbouj caj vunz yaeng bien

Miz 《Fueng’anq Sawcuengh》

Hwngvuengh yinx raeuz bae

60 bi roen gyae

Gingjsaek maez vunz doh