Sunh Vugungh youq byavah- gojsanh sou boux lwgsae le, boux lwgsae neix gag an coh guh “Sunh Siujswng”.

Miz ngoenz ndeu, Sunh Siujswng caeuq baengzyoux de duzmui Beibei bae gunghyenz youz. Daeujdaengz gunghyenz, Sunh Siujswng baez yat couh yat hwnj gwnz ndaek rin he bae, ndiengq din hwnj, fwngz dangj gwnz da, yawj couh giz gyae. Sawqmwh, de lumj yawjraen gijmaz nei, angq dwk doiq duzmui Beibei naeuz: “Vaiq yawj, baihnaj miz aen dingz gyaeundei he, raeuz bae gizde guhcaemz ba!” Lij caengz caj duzmui Beibei han, Sunh Siujswng couh baez yat baez saet buet gvaqbae lo. Cij raen Sunh Siujswng bin hwnj diuz saeu he bae, venj dauqdingq. Mwhhaenx de gag siengj: “Sunh Vugungh aen coh neix boux- boux cungj rox, gou hix hawj daihgya rox aen coh Sunh Siujswng gou. Deng lo, couh youq gwnz saeu neix louz roengz aencoh gou ba!” Cij raen de daj gwnz ndang ciemz diuz bwn he, yaengyaeng boq mbat he, diuz bwn haenx couh bienqbaenz gonj mauzbit he. Sunh Siujswng dawz bit youq gwnz saeu sij roengz le “Sunh Siujswng daengz gizneix youz gvaq”.

Mwh Sunh Siujswng cingq daek- eiq fwngfwng, duzmui Beibei ganj daengz lo. De ngiengx gyaeuj yawjraen gij cih gwnz saeu, couh sikhaek yiemz dwk naeuz: “Sunh Siujswng, mwngz baenzlawz youq gwnz saeu luenh sij luenh veh? Danghnaeuz daihgya cungj lumj nwngz yienghneix, gunghyenz ndaej luenh baenz gijmaz yiengh lo?” Sunh Siujswng naj sikhaek nding daengz goekrwz, de mbouj eiqseiq ngaem gyaeuj roengzdaeuj, najmong dwk naeuz: “Doiq mbouj hwnj, dwg gou mbouj ndei, gou sikhaek gaij.” Gangj sat, Sunh Siujswng riengjret bin hwnj gwnz saeu bae uet gij cih de sij haenx bae. Aennaj duzmui Beibei yiemzswd haenx sikhaek riu lo: “Siujswng, mwngz rox loek couh gaij, gig ndei bw, cigndaej vunz haenh!”

(sam nienzgaep Yangz Gwngjyez)