12 nyied 4 hauh, Gveilinz Si Gunghcwngz Yauzcuz Swciyen Gvanhyinh Yangh Suijbinh Cunh gaiq daihbet ciet Buenzvuengz Yauzcuz nem gaiq daihhaj ciet vwnzva Meizsanh banh ndaej hoenghhwd.

Mbat hozdung neix miz conzdungj Buenzvuengz boiznyienh、youzcaz couxhek、angqhoh aeuhaq Yauzcuz、ciengj bya、ciengj mouduenh、bau aendomq、aemq bawxmoq、gofoux minzcuz、hoenxgienz caeuq cezmuz cawjdaez Cibgouj Daih daengj lai cungj lai yiengh hozdung. Gak hangh hozdung ndei yawj raixcaix, baenz fanh lai hekyouz daj seiqlengq daeuj haenx cungj caez comz haeuj Suijbinh Cunh, daihcaez gamjsouh gij fungcingz daegsaek gagmiz Yauzcuz.

(Cwng Ciminj/郑智敏 Vangz Yifungh/黄玉峰 Cinz Siujyingh/陈小英)