Gaxgonq, gwnzbiengz bya heu raemx seuq, gve mak rang mbin, dwg aen suenva gyoengq bouxsien daeuj youz ndeu.

Vihliux fuengzre gyoengqvunz gwn gij gve mak daiq lai, Nyawhdaeq fat diuz minghlingh he——lajmbwn lwgminz, sam ngoenz gwn donq ndeu. Caemhcaiq baij boux hak mbongj- mbwt roengz laj daeuj cienz mingh- lingh.

Mbongjmbwt baez daih’it roengz laj daeuj, maez gij gingjsaek gyaeu- ndei lajmbwn, banhaemh yaek dauq gwnz mbwn seiz cij geiq ndaej dawz linghbaiz okdaeuj, ndwn youq gwnz fwj sing hung naeuz:“Nyawhdaeq miz lingh, lajmbwn lwgminz, ngoenz gwn sam donq, daj ngoenzneix hawj hengz.” Byawz rox, de simgaenj lai, “sam ngoenz gwn donq” doeg baenz “ngoenz gwn sam donq”.

Buenq bi gvaqbae, Nyawhdaeq daiq bang bouxsien roengz laj daeuj youz, gij gingjsaek gaxgonq mbouj miz lo, gij rang gve mak hix mbouj miz lo, dauqfanj mup ndaej doenghgij heiq haeu. Baez dajdingq, cij rox mbongj- mbwt cienz lingh loeng lo. Lajmbwn lwgminz vihliux guh daengz ngoenz gwn sam donq, gwn gij gve mak caez vanzlij mbouj gaeuq, gyoengqde nyaengqfoed dangqmaz, caiq bae gwn rum、vat roengz namh bae aeu lwgmaenz daeuj gwn. Baenzneix, lajmbwn lwgminz gwn lai okhaex hix lai, heiq haeu loemh mbwn.

Gij saeh neix Nyawhdaeq rox- nyinh mbouj dwg lwgminz guh loek, dwg mbongjmbwt roengzdaeuj mbouj guh hong gonq, yaek dauq cij cienz lingh, gip ndaej cienz loeng lo. Caemhcaiq gaenq cienz lingh roengz- bae caiq gaij couh mbouj ndei lo. Ndigah, Nyawhdaeq lij dwg hawj lwgminz ngoenz gwn sam donq, fad mbongjmbwt roengz laj daeuj aeu namh moek haex, hawj gij gingjsaek caeuq hoengheiq fukdauq ndaej lumj doenghbaez nei cij ndaej dauq gwnz mbwn.

Daj mwhde hwnj, mbongjmbwt hwnzngoenz moek haex mbouj ndaej dingz, itcig moek daengz seizneix. Byawz rox, lajmbwn lwgminz yied daeuj yied lai, baenzneix yawj hwnjdaeuj, mbongjmbwt moek haex mbouj ndaej caenh, de caiq hix mbouj ndaej dauq gwnzmbwn lo.