Gangj daengz neix, Yenling doeksaet hwnjdaeuj, naeuz:“Yiengh- lawz mbouj geiq ndaej, caen ndeilau ha! Gyoengqde naeuz, haemh- de gyoengqde doengzcaez laihlawh dawz huqgung, vihliux ancienz, gyoengqde youq ndaw canghaeux seiqhenz diemj lab. Hoeng, daengz byonghhwnz, gyoengqde faemxfwg dingqnyi miz vunz hemq hwnjdaeuj, yienzhaeuh ndaw canghaeux couh miz haujlai ngaeuz fangz mbin bae mbin dauq, gij hoenz gyoengqvunz deng hwk biu caez. Gyoengqvunz cingq vuengmuengz seiz, youq gwnz laeuz caengz daihngeih diuq roengz geij duzgvaiq gyaeuj nyoengqnywtnywt nei, co yawj lumj vunz, hoeng de baez cienq laeng le, fajnaj couh bienqbaenz fajnaj duzfangz roxnaeuz duzgvaiq, yawj hwnjbae ndeilau dangqmaz. Gyoengqvunz sijdonz luenhlablab, seizde daj gwnz laeuz caengz daihngeih mbin daeuj ci cieng ndeu, baek haeuj bakaek boux vunz sijdonz ndeu bae, baek haeuj seizde ci cieng saenzdwddwd, yawj hwnjbae miz rengz dangqmaz, boux vunz sijdonz ‘a’ sing ndeu, bak byoq lwed couh dai bae lo, vunzlai engqgya vueng lo. Seizde geij duzgvaiq de couh swngzgei ndonj haeuj gyang gyoengqvunz sijdonz bae, gaj geij boux vunz. Gyoengqvunz sijdonz youh lau youh vueng, rag mid okdaeuj luenh faenz luenh camz, mizmbangj gaj dai vunz swhgeij, mizmbangj vuengmuengz buet deuz, ciengzmienh luenhnyagnyag. Geij boux buet okbae couh buet daengz yaxmonz bauqanq, gou sikhaek daiq bingmax gvaqdaeuj. Hoeng daengz dieg neix seiz huqgung caez mbouj raen lo.”

Veiz Cungh naeuz:“Baenzneix cingq deng lo, gou mbouj saenq lajmbwn miz fangz miz gvaiq, neix cij dwg gyoengqvunz guhcaeg guh aen bajheiq luq vunz ndwi. Cij aenvih seizhaenx luenh lai, gyoengqcaeg cij ndaej caeg huqgung bae.”

Yenling rub le rub gij mumh, naeuz:“Couhsuenq dwg vunz guh, seizneix raeuz hix mbouj rox dwg gyoengqvunz lawz ha?” Veiz Cungh daiq Yenling daeuj daengz gyang ding cang haeux, gip hwnj ci cieng baek haeuj bakaek boux sijdonz, youh heuh boux bing baihhenz aeu ci cieng bingzseiz hoenxciengq daeuj, naeuz:“Yenling, mwngz roxnyinh song ci cieng neix miz maz mbouj dox- doengz?” Yenling yawj le naeuz:“Mbouj miz maz mbouj doengz ha!” Veiz Cungh naeuz:“Mwngz aeu fwngz gaem song ci cieng neix, yienzhaeuh yunghrengz doxdoengz bae saenq, yawj miz maz mbouj doxdoengz.” Yenling ciuq gij vah Veiz Cungh guh, miz di geizheih dahraix, naeuz:“Yunghrengz doxdoengz bae saenq, ci cieng gaj vunz sijdonz saenz- dwddwd, ci cieng dawz bae hoenx- ciengq mbouj saenz.” Veiz Cungh naeuz:“Neix couh deng lo.” “Neix youh gangjmingz maz?”Yenling engq- gya moengjdoengj lo.

Veiz Cungh naemj yaep ndeu, naeuz:“Gou duenhdingh gyoengqvunz caeg huqgung dwg vunz heiqduenz.” Yenling miz di doeksaet, muengz cam:“Vihmaz?” Veiz Cungh menh- menh gangj okdaeuj:“Sien gangj mbaw baengz yiengh lumj vunz caeuq daengloengz. Haemhhaenx, aen cang haeux neix seiqmienh diemj miz lab, yienzhaeuh byonghhwnz couh yawj- raen haujlai ngaeuz fangz mbin bae mbin dauq, neix gizsaed dwg baihrog conghcueng bouxcaeg saj heiq- ngaeuznaeng cauh baenz.”

“Heiqngaeuznaeng?” Yenling mbouj rox neix dwg maz. Veiz Cungh laebdaeb gangj:“Heiqngaeuznaeng dwg aeu naeng roxnaeuz baengz raed bae yiengh bouxvunz, gij mae iq gyaeuj ndeu cin gij naeng roxnaeuz baengz, gyaeuj ndeu cug youq gij diuz faex iq. Biujyienj seiz, diemj lab ciuq gij naeng caeuq baengz, hawj gij ngaeuz ingj hwnj gwnz muqhau bae, vunz youq baihlaeng muqhau bae ning gij diuz faex iq caemhcaiq gangj vah, baenzneix bouxyawj naengh youq baihnaj muqhau, couh lumj gij ngaeuz rox gangj rox ning nei. Seizhaenx bouxcaeg haengjdingh youq congh- cueng sik aen congh gaemxgienz hung ndeu, yienzhaeuh diemj daengloengz, youq henz daengloengz saj heiq- ngaeuznaeng. Ndaw canghaeux seiq- mienh cungj dwg saekhau, ndaw ding youh diemj miz lab, ronghsagsag, ndigah vunz ndaw ding yawj mbouj raen baihrog miz vunz diemj daeng- loengz. Geij boux vunzcaeg youq conghcueng baihrog saj heiqngaeuz- naeng, couh cauh baenz ndaw ding miz haujlai ngaeuzfangz mbin bae mbin dauq. Rox saj heiqngaeuznaeng, gojnwngz dwg vunz ndaw heiq- duenz.”

Yenling roxnyinh Veiz Cungh gangj miz dauhleix, hoeng ndawsim youh mbouj miz geijlai daej, couh cam:“Baengh gij baengz yiengh lumj vunz caeuq daengloengz, couh duenhdingh dwg vunz heiqduenz guh?” Veiz Cungh naeuz:“Neix dangyienz mbouj gaeuq. Hoeng, vunz sijdonz deuz okdaeuj naeuz, haemhde youq gwnz laeuz diuq roengz geij duzgvaiq, mbouj rox dwg vunz dwg fangz, aenvih baez cienq ndang naj de couh bienqbaenz yiengh wnq, neix gizsaed dwg cungj heiqfap bienq naj ndeu, cij aenvih vunz sijdonz Senhlozgoz mbouj raen gvaq, ndigah lau ndaej hoenz biu caez.”

“Bienqnaj, gou yawj heiq seiz raen gvaq, boux biujyenj baez cienq ndang naj de couh bienqbaenz yiengh naj wnq. Ciuq neix daeuj gangj, geij duzgvaiq haenx gizsaed dwg vunz cang baenz, gyoengqcaeg cang guh duzgvaiq bae hwk gyoengqvunz sijdonz, hix miz di dauhleix.” Yenling ngaekgyaeuj naeuz.

Veiz Cungh laebdaeb naeuz:“Neix dwg yienzyinh aen daihngeih. Daihsam, daj ci cieng haenx yawj ok. Vunz heiqduenz biujyienj doxhoenx seiz, ciengzseiz youq gwnz daiz saenq cieng, aenvih cieng hoenxciengq saenq mbouj ndaej baenzneix saenz, ndigah heiqduenz couh aeu cungj diet daegbied ndeu daeuj cauh cieng, hawj ci cieng youq gwnz fwngz aeu di rengz bae saenq couh saenzdikdik, cungj cieng neix, cij miz ndaw heiqduenz miz!”（caengz sat）