Gyongrwi Bouxcuengh dwg cungj yozgi ndaekndek caeuq buenx- ndaek daj ciuhgeq cienz roengzdaeuj ndeu. Beixnuengx Bouxcuengh gvaq cieng gvaq ciet、saehhoengz saehbieg、mbaenj gouz fungsou doenghgij hozdung neix, cungj aeu roq gyong diuqfoux eufwen, ndawde yienj ndaej ceiq haenqrem haenx couhdwg gyongrwi Bouxcuengh. Gyongrwi, baez yawjraen couh hawj vunz siengj daengz duzrwi, gizsaed gij lingzganj gyongrwi Bouxcuengh couhdwg daj laeng duzrwi daeuj, aenvih gij yienghsiengq aende lumj ndang duzrwi nei cix ndaej heuhguh gyongrwi.

Gyongrwi daj Ciuhsung satbyai couh youq doengh dieg Bouxcuengh Guengjsae riuzcienz, daengz seizneix gaenq miz gyawj cien bi lizsij. Gyongrwi caemh heuhguh “gyong- meng (aenvih dungxgyong dwg aeu naezniu baenqguh oenq baenz meng guhbaenz)”“gyong’vax”, youh aenvih ndaej venjvang youq najaek ndaek- yienj cix caemh heuhguh “gyong- vang”“gyonghwet”. Seizneix youq Hozciz Si、Vujmingz Gih ranghdieg neix, gyongrwi lij louzce miz gij cienzdoengj oenq meng guh dungx- gyong haenx; youq Cingsih Si doengh dieg neix, caemh miz aeu faex daeuj guh gyongrwi, naenggyong cigciep aeu cimgyong ding youq song gyaeuj aen’gyong; youq Laizbinh Si Vujsenh Yen、Hinghbinh Gih lij raen miz aeu dietmbang caeuq doengzmbang daeuj guh gyongrwi, yienghsiengq iqhung caeuq gyongrwi meng doxdoengz, gangjmingz youq geij bak bi gaxgonq, beixnuengx Bouxcuengh raeuz guh gyongrwi gaenq miz gij dinfwngz ak caeuq gij naemjfap gaijndei yiengh gyongrwi. Gyongrwi cauhguh caeuq riuzcienz youq Laizbinh Si Hinghbinh Gih、Siengcouh Yen、Vujsenh Yen, Liujcouh Si Liujgyangh Yen, Namz- ningz Si Vujmingz Gih、Yunghningz Gih、Sanglinz Yen、Binhyangz Yen, Gveigangj Si Cinhdangz Gih, Hozciz Si Yizcouh Si、Ginhcwngzgyangh Gih, Baksaek Si、Gveilinz Si、Ginhcouh Si mbangj dieg Bouxcuengh caemh raen miz gyongrwi riuzcienz. Youq Laiz- binh Si raen yolouz miz gyongrwi haemq lai, ndawbiengz caeuq ndaw mbanj Bouxcuengh, cungj yolouz miz gak loih gyongrwi baenzaen caeuq aen’eiguh, binjcungj haemq lai yienghsik caemh mbouj doxdoengz, seizneix ndaej caz rox daengx si gyongrwi yolouz ndaej ndei haenx miz 150 lai aen. Cawz Bouxcuengh le, gyongrwi youq ndawbiengz Yauzcuz、Mauznanzcuz caemh raen miz riuzcienz.

Gyongrwi miz meng guh、faex guh song cungj, dingzlai dwg meng guh, song gyaeuj goemq naeng caemhcaiq aeu cag cug rag ndaetrem, gyaeuj ndeu hung gyaeuj ndeu loq iq, baenz aen raez 62～64 lizmij, ndaej fat ok song cungj yaemsaek. Ndaek- yienj seiz gyaeuj iq aeu mbaenqfaex dinj ndaek, gyaeuj hung aeu angjfwngz bek, singyaem naekcaem guggok, ndaej venjvang youq najaek, ndwn roxnaeuz byaij (foux) dwk ndaekyienj, caemh ndaej cuengq vang gwnz song ga roxnaeuz gwnz gyaqgyong naengh dwk ndaekyienj. Daj ciuhgeq gvaqdaeuj goengsae Bouxcungh noix mbouj ndaej gyong- rwi, miz gyongrwi couh itdingh miz heiqgoengsae、fouxgoengsae, gijneix couh baenz le cungj vunqsik goeng- sae Bouxcuengh biujyienj ndeu. Gaxgonq biujyienj gyongrwi cawz caeq saenz gyaep cez、siu nanh mbaenj fuk doenghgij neiyungz neix le, lij miz gangj、ciengq gij riuzcienz ndawbiengz caeuq gojgaeq lizsij, daih cienz daih mbouj gat gvaq. Mwh ndaekyienj cix dwg boux vunz ndeu yienj lai aen giek, aeu ciengq guhcawj, gij neiyungz ciengq dwg fwen caet cih raezrangh lai, saekseiz sing sang goksa, saekseiz gangjriu loenghriu, saekseiz cab miz gangjbeg, caemhcaiq guh di dungcoz diuqfoux ndeu; yozgi buenxndaek cawz gyong- rwi le, lij miz gyong iq、aenlaz daengj yozgi ndaekndek. Gij diuhciengq gyongrwi nyuenz miz geijcib cungj gizbaiz, gvaqlaeng saetcienz haujlai, seizneix dan lw miz 7 cungj gizbaiz, miz “diuh huhliuh lienghlij”“diuh huh’wzliuh” daengj, youq gwnz daizheiq dieg Mbanjcuengh riuzcienz mbouj gat.