Dilinz Yen dwg aen yienh gyawj guek rog ndeu. Ngoenzneix, yienh yaxmonz caemrwdrwd, gyoengqvunz ngaemgyaeuj mbouj gangjvah. Yenling youq ndaw ding yaxmonz song fwngz camca youq laeng, byaij bae byaij dauq, gvaq yaep ndeu, cij cangznaek dwk doiq gyoengqvunz naeuz:“Sou youq banhaet ndwn daengz banringz- gvaq le, nanzdauh couh mbouj miz saek di banhfap? Couh lij lw sam ngoenz la, sam ngoenz la!”

Seizneix bouxbingdaeuz yax- monz gvih roengz gwnz namh bae daejnganga naeuz:“Caqcwh dou rox dwg bouxsien roxnaeuz dwg duzfangz, dou buek diuz mingh neix hix mbouj lau dai, hoeng seizneix dauqdaej dwg bouxsien dwg duzfangz guh, raeuz mbouj rox……” Yenling naj hau lumj ceij, nam dwk naeuz:“Vuengzdaeq gaenq roengz swngcij daeuj, ngoenz gingdenj yawj mbouj raen gij bauj de, raeuz bouxboux gyaeuj doek!” Gwnz ding gyoengqvunz dingq le luenh- nyagnyag, sing ienq sing daej mbouj dingz mbouj duenh. Yenling cangz mbat naek ndeu, simcieg dwk naeuz:“Suenq lo, suenq lo, gou rox sou caenhrengz gvaq lo, sou dauqbae ranz guh hong ba, aen anq neix gou daeuj dingj, caj bingz ywdoeg roengz hoz bae, gienh saeh neix couh sat lo.” Gangj neix yenling daj ndaw genbuh mbon ok bingz ywdoeg ndeu, cingq yaek ndingq roengz bak bae.

Mboujliuh seizneix cung ok boux doegsaw ndeu, heuh naeuz:“Yenling, gaej guh yienghneix, aeu buqanq, mbouj dwg mbouj miz banhfap!” Vah neix baez ok, gwnz ding youh caem roengzdaeuj le, Yenzling baez ngawh, naeuz:“Veiz Cungh, neix dwg saeh hung, mbouj ndaej gangj riu bw! Mwngz youh baenzlawz rox aen anq neix buq ndaej!”

Yenzlaiz boux doegsaw neix heuhguh Veiz Cungh. Veiz Cungh youh naeuz: “Ciuzdingz gvidingh, bouxlawz mbouj miz guenvih mbouj ndaej camgya duenq anq, gou cij dwg boux bae gingsingz ganj gauj deng doek buengj ndeu, dauq ranz loh gvaq gizneix, gyo yenling mwngz gyaez maij, hawj gou ce youq ndaw yaxmonz duenh seizgan ndeu. Geij ngoenz gonq ok gij saeh neix le, bouxniemhsei heuh gou bae dieg anq fat bang de. Gou fatyienh, gizhaenx miz haujlai riz. Geij ngoenz neix daeuj gou siengj hwnj siengj roengz, cingjleix ndaej di lohnaemj lo. Seizneix yenling mwngz gag nyinh buq mbouj ndaej anq, mboujyawx dingq gou gangjgangj le caiq guh gietdingh.”

“Nanzdauh mwngz miz banh- fap?” Yenling muengz cam. Veiz Cungh naeuz:“Saeh neix naeuz geiz- heih ma, gizsaed siengj daeuj hix mbouj suenq, raeuz bae nyuenzdieg menh yawj menh gangj!” Yenling baez dingq sim siengj: Gou hawj boux doegsaw neix ce youq ndaw yaxmonz, de gyo’mbaiq gou, mbouj rox haih gou. Caiq gangj de mbouj miz di gaengawq, mbouj gamj luenh gangjvah. Baenzneix, yenling couh daiq gyoengq bing riengz Veiz Cungh doengz bae daengz nyuenzdieg.

Yenzlaiz, yenling gangj gij anq vuengzdaeq roengz swngcij aeu caz, couhdwg gij huq Senhlozgoz gung hawj Vuengzdaeq deng caeg. Seizde cingq dwg Mingzcauz vuengzdaeq senj Baekging guh guekduh moq, vuengzdaeq aeu banh aen gingdenj ndeu, iucingj guek henz daeuj camgya, couh baij sijdonz daiq gag dieg gij heiqduenz haemq mizmingz bae guek henz biujyenj, vih yienh’ok Mingz- cauz gueklig maenh’ak, beksingq youq onj gaenx guh. Gyoengq guek de dingqnyi Mingzcauz vuengzdaeq aeu banh gingdenj, faenfaen baij vunz soengq huqgung hawj. Senhlozgoz dwg aen guek daih’it baij vunz soengq huqgung daeuj, byawz rox huqgung ngamq haeuj Mingzcauz camh daih- it——Dilinz Yen, couh deng caeg bae lo, gyoengqvunz soengq huqgung dingzlai deng gaj, cij miz geij boux vunz ndaej buet deuz.

Vuengzdaeq dingqnyi gienh saeh neix, hozhwnj dangqmaz, roengz swngcij aeu Dilinz Yen buq aen anq neix, hanh youq gingdenj ngoenzde gaxgonq ra huqgung dauq, mboujnex gyoengqvunz yaxmonz bouxboux cungj miz coih. Gij eiqsei vuengzdaeq caiq mingzbeg mbouj gvaq lo, couhdwg aen anq neix mbouj doq buq ndaej, bouxboux deng gaj caez. Yenling coux ndaej swngcij, gaenjgip dangqmaz, sikhaek ciucomz gyoengqvunz ndaw yaxmonz caz gienh anq neix. Hoeng, buenq ndwen gvaqbae, vanzlij caengz ra ndaej saek di riz. Yawj ngoenz gingdenj yied daeuj yied gyawj lo, yenling roxnyinh caiq caz mbouj ok le, couh deng gaj lo. Fouznaih lai, de couh siengj gaggaj.

Yenling seizneix dingqnyi Veiz Cungh gangj buqanq miz riz, couh daiq vunz riengz laeng Veiz Cungh bae nyuenzdieg yawjyawj.

Nyuenzdieg dwg aen canghaeux gaeuq ndeu, gaxgonq gyoengq bing dawz henzguek aeu aen canghaeux neix daenz haeux. Canghaeux miz song caengz, gvangq dangqmaz, caengz daih’it seiq mienh aeu hoi daz gvaq, cungj lumj aeu ceij hau nem nei. Gaxgonq caengz daih’it youq vunz, caengz daihngeih daenz haeux. Seiz- neix gaenq mbouj daenz haeux lo, hoeng lij seiz mbouj seiz guh diegyouq gyoengqvunz baedauq. Aenvih huq- gung youq gizneix deng caeg, seizneix gizneix miz bing dawz.

Daeuj daengz canghaeux, Veiz Cungh daiq yenling yawj moix aen conghcueng, yienzhaeuh naeuz:“Yen- ling, mwngz mbouj roxnyinh aen canghaeux neix seiq mienh congh- cueng miz di giuj ma?” Yenling cam:“Miz maz giuj?” Veiz Cungh vix aen cueng ndeu naeuz:“Mwngz yawj, aen cueng neix miz aen congh ndeu, gaemxgienz hung, caemhcaiq seiq mienh cueng cungj miz aen congh yienghneix.” “Neix miz maz geiz- heih?” Yenling miz di moengjdoengj. Veiz Cungh youq henz cueng gip hwnj mbaw baengz ndeu, doq ndenq hawj yenling doq naeuz:“Yenling mwngz yawj, mbaw baengz neix yiengh lumj bouxvunz.” Yenling cam:“Neix youh gangjmingz maz ne?” Veiz Cungh mbouj han, youh youq henz conghcueng gip hwnj aen daengloengz ndeu, cam Yenling:“Mwngz lij geiq ndaej ok saeh le gyoengqvunz sijdonz deuz okdaeuj haenx baenzlawz gangj gij saeh haemhde?”

（caengz sat）