Daj yamq hwnj sam cik gyangjdaiz, gou itcig dang boux banhcujyin ndeu. Daj lajmbanj haeuj ndaw singz sonhag, seizgan nanz le, gou nanz mbouj nanz cungj siengjniemh gij saedceij youq laj- mbanj sonhag haenx.

Geiq ndaej bi 2002 ngamq ma mbanjranz sonhag, gou son sam nienzgaep ban ndeu yijvwnz, caemh dang banhcujyin. Ndaw ban miz 32 boux hagseng, couh miz 24 boux hagseng bohmeh youq rog dajgoeng, it bi daengz haemh ngamq ma saek baez song baez, mizmbangj geij bi ngamq dauq baez he. Gyoengq hagseng gig noix ndaej raen bohmeh baez he.

Miz boux hagseng iqet ndeu hawj gou gig haeujsim. Daeg hagseng neix heuhguh Vangz Swngh, gyoengqvunz cungj heuh de guh Daegswngh. De ndang byombyetbyet, najnoh hausek, doiq lwgda ndongqliklik. Ceiq yienjda dwg aen gyaeuj de, gyomq hung byoem youh ndaem, dak ndaej aen ndang de byombetbet, caen dwg lumj gyaeuj lauxbaeg iq.

Daj seiziq de couh caeuq daxgoeng daxbuz de guhdoih youq, bohmeh de youq Guengjdoeng guh hong, cij miz ndwencieng songde cij dauqma ranz gvaqcieng. Daegswngh youq ndaw ban najnomj vah youh siuj, bingzseiz gig noix caeuq doengzhag guhcaemz, roengzdangz de couh gag boux ndeu naengh youq henz daizsaw, caemcaem muengh dingj ranz ngaezngwdngwd. Mizseiz doengzhag iu de bae guhcaemz, de cungj fan dahau daeuj caengz boux daeuj iu de, mizseiz lij maenj aen bak bongzbetbet.

Hawj gou haeujsim daengz Daegswngh dwg baez daih’it gaujsi gvaq le, de gauj ndaej mingz daih’it daengx aen nienzgaep. Bingzseiz hwnjdangz sat anbaiz cozyez, Daeg- swngh cungj guh ndaej cingjcingj caezcaez, hoeng, gou mbouj caengz siengj daengz boux lwgnyez neix baenzneix roengzrengz doegsaw. Fat gaujgenj roengzbae le, gou heuh Daegswngh caeuq gou naengh laj gofaex henz cauhcangz gangjvah dajging. Hoeng, de daj goek daengz byai cungj dwg ngaemgyaeuj, mbouj ok saek di sing, gou cam de, de hix mbouj ngiengxgyaeuj, hix mbouj han gou saek coenz.

Doeklaeng gou gietdingh bae ranz Daegswngh yawjyawj. Ngoenz haenx dwg ngoenz singhgiz ngeih, banringz cuengqhag le, gou caeuq Daegswngh guhdoih byaij bae ranz de. Daegswngh aemq aen daehsaw byaij baihnaj, seiz mbouj seiz aeu din dik ndaek rin iq gwnz loh, gyaeuj cungj mbouj baenq dauq yawj gou saek da. Gou seiz mbouj seiz cam Daegswngh song sam coenz, hoeng de lumj mbouj ndaejnyi nei, cungj mbouj han saek coenz, de cij guenj gag byaij gag loh. Cigsoh byaij coh baihsae, yawjraen aen ranz gadog youq gyaeuj mbanj laj dinbya, seiqhenz cungj baet ndaej seuqsatsat.

Daegswngh byaij gvaqbae dingz roengzdaeuj nyoengx hai faj doubenj, couh cigsoh byaij haeujbae lo. Daihgaiq dingqnyi sing bakdou hai, baihndaw couh cienz daeuj gij sing cauzcwdcwd——duzgaeq ndaw rongz diuq hwnj diuq roengz, hemqguggug; duzbit daj ndaw geh ciengz baizdoih byaij okdaeuj, youq laj roq doq ndoet gaemz raemx doq iet hoz heuhsapsap. Ciepdwk ndaw ranz miz vunz byaij okdaeuj cam:“Byawz ha?” Dingqnyi sing cam, Daegswngh sikhaek cuengq aen daehsaw, cacoemj haeuj ndaw ranz bae. “Daxbuz, daxbuz, dwg gou, gou cuengqhag dauqma lo!” Daeg- swngh doq haeujbae doq angqvauvau dap naeuz.

Yaep he song buzlan byaij okdaeuj. Raen gou ndwn youq ndaw gyanghongh, daxbuz Daegswngh naj riunyumj dwk cam:“Ei! Mwngz dwg……?” Daxbuz Daegswngh mbouj roxnaj gou, Daegswngh youh ndoj youq baihlaeng daxbuz de najnding dwk mbouj gangjvah. Gou gangj:“Daxbuz Daegswngh mwngz ndei, gou dwg lauxsae Daegswngh, Daegswngh youq hagdangz cingzcik gig ndei, baezneix gou daegdaengq daengz ranz coh gyoengqsou haenh de.”

Daxbuz Daegswngh baez dingq gou gangj, gwnz naj de sikhaek riu ndaej lumj dujva seizcin ngamq hailangh nei. Daxbuz Daegswngh gaem fwngz gou couh naengh youq bakdou, doq naengh roengzdaeuj doq caeuq gou gangj:“Seizneix daxgoeng Daegswngh bae ndawnaz guh hong lo. Daeglan gou gig gaenx guh hong, moix ngoenz cuengqhag dauqranz de cungj gag bae gueng gaeq gueng bit, rap raemx cawj haeux, cungj mbouj aeu son de daengq de, de couh gag rox guh caez…… Daxbuz sim soh bak vaiq, daj saeh Daegswngh gangj daengz saeh ndaw ranz, daj saeh ndaw ranz gangj daengz saeh ranznden, gou youq henz lauxsaed dwk dingq, seiz mbouj seiz ngaekgyaeuj.

Gangj daengz bohmeh Daeg- swngh, daxbuz Daegswngh mbouj gangj maz, cij daengq Daegswngh aeu laebdaeb roengzrengz doegsaw, daengz ngoenzlaeng ra ndaej gwn guh ndaej bae, bohmeh de itdingh dauqma caeuq gyoengqde itheij an’an onjonj gvaq saedceij. Gou roxnyinh Daegswngh itcig roxsoq: Youq ranz gaenx guh, youq hagdangz haenqrengz hag, mbouj yungh daxgoeng daxbuz vih de causim saek faen! Gou caeuq daxbuz Daeg- swngh gangjvah seiz, Daegswngh gueng gaeq le youh gueng bit, rap raemx venj doengj hwnj faexhanz seiz lij coh song dou riuhehe. Haemh haenx gou caeuq daxbuz Daegswngh gangj daengz mbwn laep cij dauqranz.

Daj seizhaenx hwnj, gou fatyienh Daegswngh lai maij riu, roengzdangz le mbouj caiq lumj gaxgonq lo, de mizseiz lij caeuq doengzhag guhcaemz lune. Miz baez ndeu, gou hwnjdangz cam gyoengq hagseng:“Byawz maij gwn binghgizlinz?” Gou ngamq cam seiz, raen Daegswngh sikhaek ngiengxgyaeuj yawj coh gou, cik fwngz sangsang yaengx hwnjdaeuj! Gou couh hawj de ndwn hwnjdaeuj dap aen vwndiz neix. De dap sat, gou raen de riunyumnyum, lumj dujva cingq coh gij ndit ronghsagsag haenqrengz hailangh.

Mizseiz caeuq gyoengq doengz- saeh gangjgoj, miz boux gangj daengz gij lwgnyez lajmbanj naj heiz fwngz uq、gwn hoj daenj vaih, gou mbouj gangj dwg gij saeh Daegswngh, cij lwnh gou dingqnaeuz miz boux hagseng baenzlawz gaenx guh hong- ranz caemhcaiq roengzrengz doegsaw hawj gyoengqde nyi.

Mboujguenj gij saedceij ndaw singz baenzlawz ndei、baenzlawz yinx vunz, gou cungj geiq hwnj gij saedceij doenghbaez youq lajmbanj sonhag. Gou nyienh bienqbaenz gij ndit raeuj, saj youq aen dieg dinghrwgrwg lajmbanj, hawj gyoengq lwgnyez lajmbanj ndaej youq laj ndit raeuj maj hung maj sang.