Heiqmoegyou maeriuj dwg cungj heiq ndawbiengz vunzlai Bouxcuengh Cingsih Si gyaez yawj ndeu, caemh heuhguh “heiqfaexdeu”“heiqdoj”, binaengz youq ndwen- cieng、roeb bi’nyinh roxnaeuz miz hekgviq daengz seiz, youz boux canghheiq laux mingzdaeuz ndei haenx yienj hawj vunzlai yawj. Heiqmoegyou maeriuj youq Cingsih riuzcienz daengz seizneix gaenq miz 700 lai bi lizsij.

Mwh yienj heiqmoegyou mae- riuj, youq dieghoengq gyangdien aeu benjfaex dap aen daizheiq ndeu, baihndaw venj fan baengzmuq ndeu guh raeblaeng daizheiq, bouxyienj youq baihgwnz raeblaeng baengzmuq cuengq moegyou okdaeuj gaembaenq dwk doq ciengq doq yienj, mwh yienjheiq bouxyienj boux ndeu yaek yienj song aen giek caeuq aeu song cungj diuhciengq ciengq vahndawheiq, mbangj canghheiq bonjsaeh ak haenx lij ndaej yienj baenz 3 daengz 6 aen giek ne, ndaw heiq gawq miz lwnh citgoj lumj boux youq henz lwnh nei, youh miz gij dungcoz yienhciengz yienj haenx, ndei dingq ndei yawj.

Heiqmoegyou maeriuj mwh yienjciengq dingzlai aeu bangciengq daeuj dakdaix heiqfaenh. Vah ciengq ca mbouj geijlai cungj dwg aeu gij yaem fwen dawzyinh ndawbiengz Bouxcuengh, aeu Vahcuengh ciengq lai. Diuhciengq miz diuhmbaetva、diuhbingzsang、diuhgyangznaek、diuhdaej daengj. Gij najveh de itbuen dwg aeu faexmakbug roxnaeuz faexgingq daeuj gaekdeu baenz, daz liuhsaek hwnjbae, ciuq gij singqcingz bouxvunz yaek yienj haenx aeu maeg veh da veh bak, bouxcungcig boux- yakrwix baez yawj couh mingzbeg, sai mbwk laux nyaeq faen ndaej cing, gig miz daegsaek deihfueng caeuq daegsaek minzcuz.

Heiqmoegyou maeriuj mbouj miz bonj sawheiq dingh’aeu yawh- bien haenx, canghyienj youq yienj- heiq gaxgonq yawj sawcuenh, geiq- maenh doiqvah、cingzciet, hwnjdaiz le doq bien doq ciengq. Citheiq dingzlai bae ndaw 《Fungsaenz Yenjyi》《Suizdangz Yenjyi》《Cieng Ranz Yiengz》《Goj Ngwzhau》doenghgij sawcuenh ciuhgeq neix genj aeu. Doengh bi neix daeuj gyoengq canghheiq caemh aeu goj- gaeq ndawbiengz caeuq citheiq ciuhneix daeuj biujyienj, gyalai le gij neiyungz heiqmoegyou maeriuj.

Heiqmoegyou maeriuj youq Cingsih gyoebbaenz、hwngfat、hoenghvuengh, riuzcienz ndaej gig nanz gig gvangq. Bi 2012, heiq- moegyou maeriuj ndaej lied haeuj swcigih gaep feihvuzciz vwnzva yizcanj henhoh mingzloeg. Vihliux engq ndei swnjcienz vwnzva cienz- doengj Cingsih, daezswng gij suij- bingz yisuz biujyienj bouxyienj heiqmoegyou maeriuj, daj bi 2013 gvaqdaeuj, Cingsih Si gyarengz guh hong swnjcienz、henhoh heiqmoegyou maeriuj, bued ngaenz cienhangh youq Liengbyauj Cunh Mbanjfuzhang laebbaenz dieggoek songanq swnj- cienz heiqmoegyou maeriuj, dingh- geiz heuhcomz gyoengq bouxyienj heiqmoegyou maeriuj guh songanq, guh gij hozdung heiqmoegyou maeriuj haeuj hagdangz, caemhcaiq dawz yienj heiqmoegyou maeriuj bien haeuj ndaw aendoih hung hozdung cetcunz fungsug minzcuz bae, hawj heiqmoegyou maeriuj youq ndaw swnjcienz hwngfat goegcangq hwnj- daeuj. Geij bi neix daeuj, heiq- moegyou maeriuj Cingsih gonqlaeng biujyienj 200 lai ciengzbaez hawj gyoengq baengzyoux guekrog Meij- goz、Yizbwnj、Sinhgyahboh、Daigoz、Hanzgoz、Fazgoz、Hozlanz daengj caeuq gij vwnzva donzdij nem lauxhangz、bouxmaeq ndaw guek haenx, mienhyingjyangj ngoenz beij ngoenz gvangq.