Mbwn fuemx roengzdaeuj, gij rongh aendaeng baenz di baenz di sajdoek youq ndaw hawsingz, ndaw ranz Yiz Mingzfung nanz mbouj nanz miz gij sing daemjrok cienz okdaeuj, buenxriengz aendaeuq cuenq bae cuenq dauq, baenz diuz baenz diuz mae miz saek san ok baenz fan baenz fan Mancuengh dozanq sengdoengh、saekdiuh ronghsag.

Haj bi seizgan, daj ngamq hainduj mbouj rox saekdi, daengz sugrox yungh gak cungj fuengfap daemj man conz- dungj, caiq daengz yungh Mancuengh yenzgiu cauhguh haifat gij huq vwnzva cauxeiq miz daegsaek, Yiz Mingzfung caeuq Mancuengh giet roengz yienz- faenh naekna. Hawj gij dinfwngz fwngzguh conzdungj yo youq ndaw mbanj laeglaeg haenx ndaej doenggvaq cungj fuengsik wnq yienh okdaeuj, de hix laegdaeuq roxnyinh daengz gij yiyi baujhoh caeuq swnjcienz feihvuzciz vwnzva yizcanj.

Yiz Mingzfung youq Gvangjsih Bozvuzgvanj guhhong, fucwz gij hong haifat caeuq dajveh gij huq vwnzva cauxeiq.

Gij bienqvaq gvaqbae 5 bi

Haj bi gaxgonq, Yiz Mingzfung doiq Mancuengh lij dwg byongh rox byongh mbouj rox. Aenvih guhhong, de miz gihvei haeujlaeg Gvangjsih gak dieg bae hag caeuq roxyiuj gij dinfwngz daemj man Bouxcuengh, caemhcaiq youq mboengq haenx maij hwnj Mancuengh, hainduj hag gij fuengfap daemj Mancuengh, yenzgiu gij vwnzva Mancuengh, seizneix engq dwg roengz- rengz youq yenzgiu cauhguh haifat gij huq vwnzva cauxeiq Mancuengh.

Gij maqmuengh coglaeng 5 bi

Maqmuengh ndaej doenggvaq bonjfaenh roengzrengz hawj engq lai vunz nyinhrox caeuq maij hwnj Mancuengh, caemhcaiq doenggvaq yenzgiu cauhguh haifat gij huq vwnzva cauxeiq yiengh gyaeundei youh miz yungh haenx, hawj faenh dinfwngz gaeuqgeq gaenq cienz roengzdaeuj gig nanz neix fatok rengzhoengh moq.

Guhhong diuyenz ndaej raen gij dinfwngz Mancuengh

Mancuengh vih gijmaz ndaej haenh baenz seiq cungj man hung okmingz Cungguek ndawde cungj ndeu? Gij fuengfap daemj de miz gijmaz daegbied? Gij doz mbouj doxdoengz miz gijmaz eiqsei? Dangh- naeuz dwg youq haj bi gaxgonq, Yiz Mingzfung wnggai caeuq bouxwnq doxlumj, roxyiuj Mancuengh dandan daengx youq gwnz biujmienh eiqsei cihsaw, roxnaeuz dan dwg maij, mbouj bae damqcaz yenzgiu gij gojgaeq raeblaeng de, engq mbouj rox raeblaeng moix fan Mancuengh hamz miz gij yunghsim baenzlawz yiengh.

Bi 2012, Yiz Mingzfung lij dwg bouxvunz moq ngamq camgya guh- hong, cujyau youq Senhgyaubu Gvangjsih Bozvuzgvanj guh gij hong ciepdaih. Bihaenx, canghheiq guh gij huq fwngzguh daj Daizvanh daeuj haenx dajsuenq daeuj Gvangjsih gak dieg gaujcaz diuyenz gij cingzgvang seizneix gij huq fwngzguh conzdungj haenx, Yiz Mingzfung bouxvunz bae buenx neix daj neix hwnj haiok le duenh ginglig miz daegbied yiyi ndeu.

Youq mwh doihgaujcaz daeuj- daengz Cingsih, Yiz Mingzfung raen daengz Mancuengh gij huq fwngzguh minzcuz ceiq miz daibyaujsing dieg Bouxcuengh Gvangjsih haenx. Youq bi 2006, gij dinfwngz man Bouxcuengh Cingsih couh ndaej liedhaeuj gij mingzloeg baujhoh buek daih’it feih- vuzciz vwnzva yizcanj guekgya, couh- cinj ndaw ranz vunzlai bingzciengz gaenq gig noix raen gij ciengzgingj mehdaemjrok yungh congzrokfaex daemjrok, hoeng aenvih gij hwngfat Aencangj Mancuengh Cingsih, faenh dinfwngz minzcuz gaeuqgeq neix ndaej youq ndaw swnjcienz mbouj gat mbouj duenh.

Daj gij lizsij gyaeraez Man- cuengh, daengz gij goekdaej vwnzva gak cungj doz conzdungj, hawj Yiz Mingzfung bouxvunz soqlaiz cungj maij gij vwnzva minzcuz neix maez youq ndawde, neix engq hawj de miz gij siengjfap hag daemjman lo. Ndigah, moix ngoenz banringz daengz seiz yietnaiq, Yiz Mingzfung couh caeuq mehdaemjrok ndaw aencangj Man- cuengh haenx hag daemjman, caemh- caiq yungh aen singhgiz seizgan dinjdet ndeu rox gij fuengfap daemj- man gihbwnj lo.

Haeujlaeg lajmbanj damqra gij vwnzva feihyiz

Va’mbu、 vamauxdan、 raiz- mbungqmbaj、raizfwj、raizlwggyoux、raizraemx……Gij doz Mancuengh gyaeundei gyaqciq hawj Yiz Mingz- fung dauqma Namzningz le lij lumz mbouj ndaej. Vihliux vaiqdi sugrox gij fuengfap daemjman, Yiz Mingzfung moix ngoenz roengzban le cungj cien- monz yungh 1～2 aen cungdaeuz daeuj lienh daemjman.

Rox Yiz Mingzfung doiq Man- cuengh miz yinxdaeuz naekna, boux gvanjcangj Gvangjsih Bozvuzgvanj Vuz Veijfungh gig haeujcoengh, engq gujli de lai byaijbyaij lai yawjyawj. Vuz Veijfungh ciengzgeiz guh gij hong yenzgiu vwnzva minzcuz gaenq okbanj 《Dauqsaw Gvangjsih Feih- vuzciz Vwnzva Yizcanj Guek- gyagaep——Dinfwngz Daemjman Bouxcuengh》, Yiz Mingzfung ndaej gujli lai hix laeglemx roengzdingh gietsim, mboujdan aeu hag ndei daemjman, lij aeu lai cungsaed caeuq fungfouq gij cihsiz Mancuengh.

Doeklaeng, Yiz Mingzfung byaij doh Cingsih、Binhyangz、Dasinh、Yinhcwngz、Sanhgyangh、Hocouh daengj dieg ca mbouj geijlai 10 aen yanghcin geijcib aen mbanj, damq- cunz canghheiq guh gij huq fwngzguh dangdieg haenx, hagsib doxgyau gij gingniemh daemjman, yenzgiu geiqloeg gij vwnzva Mancuengh. Gij dinfwngz daemjman Yiz Mingzfung hix vih neix menhmenh cingsaeq, engq gyau ndaej haujlai baengzyoux ndei.

Youq Yinhcwngz miz meh- daemjrok geq ndaej caet betcib bi ndeu gig hawj Yiz Mingzfung gamj- doengh. Yinhcwngz Yen dwg dieg goekgaen ok Mancuengh Gvangjsih ndawde dieg ndeu, Mancuengh Yinh- cwngz gaenq dwg gij huq Mancuengh Gvangjsih, dangguh gungbinj soengq haeuj ndaw vangzgungh bae. Youq ndaw ndwenngoenz raezrangrang, daemjman gaenq bienqbaenz aen bouhfaenh giepnoix mbouj ndaej ndeu ndaw ndwenngoenz mehdaemj- rok geq haenx, de hix guhcingq le Mancuengh hwnghoengh caeuq baih- doek.

Najdoiq Yiz Mingzfung lai baez daeuj cunz、caensim maij hag, mehdaemjrok geq yienzbonj mizdi mbouj maij vunzrog neix dauqdaej cuengqsim roengzdaeuj, sim soeng dwk dang de baenz dahlan nei daeuj doiqdaih, engq sim’angq dwk gaem dawz aen fwngz Yiz Mingzfung naeuz: “Mancuengh raeuz dauqdaej miz vunzlaeng lo, caj gou daemj mbouj ndaej le couh aeu aen congzrok gaeuq ndaw ranz cienz hawj mwngz.”

Swnjcienz feihyiz yenzgiu cauhguh haifat gij huq vwnzva cauxeiq

Bi 2015, Yiz Mingzfung an ranz youq Namzningz, aen hung aen iq song aen congzrok ciemqyouq gij dieg cujyau aen rug, bak lai fan Mancuengh yungh fwngz daemj daj gak dieg soucomz daeuj haenx bienqbaenz gij doxgaiq dajcang ceiq miz yinx aen ranz iq raeujrub neix. Ginggvaq 3 bi mboujduenh hag lienh, Yiz Mingzfung doiq daemjman engqgya swnh sim swnh fwngz lo, lij rox gij fuengfap daemj cujyau Mancuengh Gvangjsih gak dieg.

Seiz bozvuzgvanj banh hozdung hung, Yiz Mingzfung couh daenj buhvaq minzcuz vunznoix, bienqbaenz mehdaemjrok unqswnh, baij gij din- fwngz daemjman okdaeuj hawj gyoengq hekyouz yawj, caemhcaiq yungh gij fuengsik haeujlaeg rox ngaih bae cekgej gij yiyi caeuq eiqsei baihndaw moix cungj doz conzdungj. Daj ngamq hainduj aenvih maij cix bae hag, daengz haeujlaeg yenzgiu gij vwnzva lizsij de, baenzlawz guh cij ndaej engq ndei bae swnjcienz caeuq hwngfat gij Mancuengh? Yiz Mingzfung hix miz siengjfap moq lo.

Bi gonq, Yiz Mingzfung daj senh- gyaubu daengz aen cungsim huq vwnzva cauxeiq guhhong, hainduj yenzgiu aeu gij yenzsu Mancuengh gaeuqgeq haenx yungh haeuj ndaw gij huq ndwenngoenz yungh daihneix bae, bohmeh Yiz Mingzfung gig haeuj- coengh de, lij bang de ok cawjeiq, guh di hong yungh fwngz guh bonjfaenh guh ndaej haenx.

Bineix ndwen 9 ngoenz 11, Aen- hoih Langhbaij Huq Vwnzva Cauxeiq Gozci Cungguek Baekging Gaiq Daih Cibngeih youq Cungguek Gozci Canj- lanj Cungsim banh sam ngoenz haenx, gij huq vwnzva cauxeiq baenzdauq Mancuengh Yiz Mingzfung caen fwngz guh haenx baez daih’it baij okdaeuj hawj vunzlai yawj, yinhsiengh、aen- ging、habyw daiq ngaih、gaeu yaekseiz daengj doenghgij huq gingciengz raen neix deng Mancuengh dajcang moqsag, aenvih gij yiengh lingzgiuj youh gig mizyungh, ndigah gig ndaej vunzlai angqcoux.

“Gij huq fwngzguh conzdungj miz gij raeuj ndaw fwngz canghheiq guh gij huq fwngzguh, hix miz gij giendingh caeuq genhciz gyoengqde. Yienznaeuz gou dwg vunz Bouxgun, hoeng gou nyinhnaeuz moix bouxvunz cungj ndaej bienqbaenz bouxswnjcienz gij vwnzva minzcuz vunznoix.” Yiz Mingzfung gig miz maqmuengh dwk naeuz, de maqmuengh coglaeng ndaej hailaeb gij gocwngz son Mancuengh, caemhcaiq yungh aen congzrok iq ginggvaq gaijndei haenx, vih gyoengq lwgnyez ndaw hagdangz daezhawj gihvei ndaej raen caeuq hag Mancuengh, hawj cehfaen feihvuzciz vwnzva yizcanj youq ndaw sim gyoengq lwgnyez doekrag didnyez.